އިމިގްރޭޝަންގެ ޗެލެންޖަކީ ރައީސްގެ ވައުދުފުޅާ އެއްގޮތަށް ބިދޭސީންގެ މައްސަލައަށް އަވަސް ހައްލެއް ހޯދުން އެއިދާރާގެ ކޮންޓްރޯލަރ ޖެނެރަލް މުހައްމަދު ޝައްމާނު ވަހީދު ވިދާޅުވެއްޖެއެވެ.
ޝައްމާނު މިހެން ވިދާޅުވެފައިވަނީ އިއްޔެ އެކްސްގައި ކުރެއްވި ޕޯސްޓެއްގައެވެ. އެ ޕޯސްޓުގައި އޭނާ ވިދާޅުވެފައިވަނީ އިމިގްރޭޝަނުން ކުރަމުންދާ މަސައްކަތަކީ ސިޔާސީ ގޮތުން ވަކި މީހަކާ ނުވަތަ ކުރީގެ މިކަންކަމާ ހަވާލުވެ ތިބި ފަރާތްތަކަކާ ޗެލެންޖުކުރާ ކަމެއް ނޫން ކަމަށެވެ. އެކަމަކު އެ އިދާރާގެ މަސައްކަތުގެ މައިގަނޑު ޗެލެންޖަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވައުދުފުޅާ އެއްގޮތަށް ގައުމަށް ދިމާވެފައިވާ ބިދޭސީންގެ މައްސަލައަށް އަވަހަށް ހައްލެއް ހޯދައިދިނުން ކަމަށެވެ.
"އަޅުގަނޑުގެ ޗެލެންޖަކީ ރައީސް ޑރ މުހައްމަދު މުއިއްޒުގެ ވައުދުފުޅާ އެއްގޮތަށް، ޤައުމަށް ދިމާވެފައިވާ މި ސީރިއަސް މައްސަލައަށް އަވަސް ހައްލެއް ހޯދުން،" ޝައްމާނު ވިދާޅުވިއެވެ.
ހަމައެހެންމެ ޝައްމާނު ވިދާޅުވީ އިމިގްރޭޝަނުން މަސައްކަތް ކުރަމުންދަނީ އާންމު ރައްޔިތުންގެ އިތުބާރު ހޯދުމަށް ކަމަށެވެ. އަދި މި މަސައްކަތުގައި ވަކި ކުލައެއް އިސްތިސްނާ ނުކޮށް އެންމެހާ ފަރާތްތަކުގެ އެއްބާރުލުން ބޭނުންވާ ކަމަށްވެސް އޭނާ ފާހަގަކުރެއްވިއެވެ.
ބިދޭސީންގެ މައްސަލައަކީ ދިވެހިރާއްޖެއަށް ދިމާވެފައިވާ އެންމެ ބޮޑު އެއް ގޮންޖެހުން ކަމަށްވާއިރު، މި މައްސަލަ ހައްލުކުރުމަށް އަވަސް ފިޔަވަޅުތަކެއް އެޅުމަކީ ރައީސް ޑރ މުއިއްޒުގެ އެއް ވައުދުފުޅެވެ.
މިހާރު ގައުމުގައި ބޮޑުވެފައިވާ ބިދޭސީންގެ މައްސަލައަށް ހައްލު ހޯދުމަށް ކުރަމުންދާ މަސައްކަތްތަކުގެ ތެރެއިން މާލެ ސަރަހައްދުގެ އެކި ތަންތަން ބަލައި ޗެކްކޮށް ގަވާއިދާ ހިލާފަށް އުޅެމުންދާ ގިނަ ބިދޭސީންތަކެއް މިހާރުވެސް ވަނީ އިމިގްރޭޝަނުގެ ބެލުމުގެ ދަށަށް ގެނެވިފައެވެ، އޭގެ ތެރެއިން އެންމެ ބޮޑަށް ފާހަގަކޮށްލެވެނީީ "އިމިގްރޭޝަން ވޮޗް" އަށް ލިބުނު މަޢުލޫމާތެއްގެ މައްޗަށް ބިނާކޮށް، ބިދޭސީން ވިޔަފާރީގެ ބޭނުމަށް އެކި ބާވަތުގެ ކާބޯތަކެތި ތައްޔާރުކުރަމުންދިޔަ ގޯސްވެފައިވާ ގެއަކާ ގުޅޭގޮތުން ލިބުނު މައުލޫމާތަށް އެގެ ބަލައި ފާސްކޮށް ބިދޭސީންތަކެއް ހައްޔަރުކުރި މައްސަލައެެވ. އެގޭގެ ނުތާހިރުކަމާއި ކާތަކެތި ގެންގުޅެފައިވާ ގޮތުގެ މަންޒަރު ފެނުމުން ގައުމުގެ ހާލަތު ގޮސްފައިވާ ނިކަމެތި ހިސާބަކީ ކިހާ ކަންބޮޑުވާންޖެހޭ ހިސާބެއްކަން އިހުސާސްވާނެއެވެ.
ދިވެހިރާއްޖޭގައި ހެދިފައިވާ ޤާނޫނުތަކާއި ޤަވާއިދުތަކަށް ބޯ ނުލަނބާ، ޤާނޫނު ތަކާއި ޤަވާއިދުތައް މުގުރަމުން ، އާއްމު މަސްލަހަތު ގެއްލޭ ގޮތަށް އަމަލު ކުރަމުންދާ ބިދޭސީންނަށް ދޫކޮށްފައިވާ ހުއްދަ ބާތިލު ކޮށް، އެ ފަރާތްތަކަށް ދިވެހިރާއްޖެއިން ފުރުވާލެވޭނެ ކަމަށް މީގެ ކުރިންވެސް ޝައްމާނު ވަނީ ވިދާޅުވެފައެވެ.