ތަރައްގީގެ ކުލަ ނުހަނު ބޮޑަށް ގަދަވަމުން އަންނަަ ޒަމާނެއްގައި ފޮތަށް ލޯބިކުރާ ފޮތް ކިޔުމާއި ފޮތް އުފެއްދުމަށް ލޯބިކުރާ ކުޑަކުދިން ފެންނަނީ ވަރަށް މަދުންނެވެ. ސްކިލް ޓްރެއިނިންގ ސެންޓަރ ގެ ފައުންޑަރ ދިމްނާ ފާކިރު އަދި އެމް.އެން.ޑީ.އެފްގެ ކާނަލް ޢަލީ މަނިކު (ދާރީ) ގެ 7 އަަހަރުގެ އަންހެން ދަރިފުޅު މަކީނާ ނައުޝީން އަލީ (ނޮއްޗި)އަކީ އަދުގެ ހެދިބޮޑުވަމުން އަންނަ ޖީލަށް ފުރިހަމަ ނަމޫނާއެކެވެ. ވަރަށް ތުއްތު އިރުއްސުރެ ފޮތްތަކަށް ޝައުގުވެރިކަން އުފެދި، ފޮތް ދެކެ ލޯބިވާ ފޮތް އުފެއްދުމަށް ލޯބިކުރާ ކުޑަކުޑަ ނައުޝީން ވަނީ ދާދި ފަހުން އިނގިރޭސި ބަހުން ޅެން ފޮތެއްވެސް އުފައްދާފައެވެ. އަދި ނައުޝީންގެ މަންމައާއި ބައްޕަ ވަނީ މި ފޮތް ފަރުމާކޮށް ލޯންޗުކޮށްދީފައެވެ.
ނައުޝީން ފޮތްތަކަށް ޝައުގުވެރިވީ ގޮތާއި މިހާތަނަށް ނައުޝީން އައުމުގައި ކޮށްފައިވާ މިންނެތް މަސައްކަތާއި ހިންމަތުގެ ވާހަކަ ހިއްސާކޮށްލަދިނީ ނައުޝީންގެ މަންމަ ދިމްނާ ފާކިރު، ދިމީއެވެ.
އެންމެ ފުރަތަމަ އުމުރުން ތިންމަސްވެސް ނުވަނީސް ކުޅޭ އެއްޗެހީގެ ބަދަލުގައި ނައުޝީންގެ މޫނަށް އުޖާލާ ހިނިތުންވުން ގެނެސްދިނީ ފޮތެވެ. އެއީ ފުރަތަމަ ނައުޝީނަށް ފޮތެއް ފެނުނު ފަހަރުވެސް މެއެވެ. އެންމެ ފުރަތަމަ ފޮތިފޮތްތައް ދިނުމުން އޭގެ އަޑުތަކާއި ކުލައަށް ޝައުގުވެރިވެ، އެއަށް ބަލަހައްޓައިގެން އޮވެ ހީނލުމާއި އުފާވާ އަޑުއަޑު ލައްވައި ހެދުމުން ތުއްތުތުއްތު ނައުޝީން ކުޅޭ އެއްޗެއްސަށްވުރެ ގަޔާވީ އެ ފޮތްތަކަށް ކަން ފާހަގަކުރެވުނީއެވެ. އެހިސާބުން ފެށިގެން ނައުޝީން ފޮތުގެ ދުނިޔޭގައި ފިޔަވަޅު އެޅީއެވެ.
ދިވެހިބަހުން އެވަރުގެ ކުދިންގެ ފޮތްތައް ލިބެން ނުހުންނާތީ، އާއިލާއިން ނައުޝީނަށް ހާއްސަކޮށްގެން ދިވެހިބަހުގެ ފޮތްތައް ތައްޔާރު ކޮށްދިނެވެ. ނައުޝީންގެ މަންމަމެން ދިޔައީ އުމުރާ ގުޅޭ ގިނަ ފޮތްތައް ދިވެހިންނާާއި އިނގިރޭސިން ނައުޝީނަށް ހޯދައިދެމުންނެވެ. ދެތިން ފަހަރު ކިޔައިދިނުމުން ނައުޝީން އަމިއްލައަށް ބަސްތައް ކިޔަމުން ގޮސް ހަމަ އެންމެ ދެއަހަރުގައި ނައުޝީން ފޮތްތައް ކިޔަން ފެށިއެވެ.
"ފޮތްތައް ބަލައިގެން ކިޔާތީ އެނގޭ ހިތުދަސްކޮށްފައި ނޫންކަން، ކޮންމެ ފޮތަކުން ދައްކާލިއަސް ކިޔާނެ، އެހެންވެ ފޮތްތަކަށް ބޮޑަށް އަހުލުވެރިކުރުމުގެ ނިޔަތުގައި "ނައުޝީން ބުކްސް އެންޑް ޓޯއިސް" ހެދީ، ކޮންމެ އުފަންދުވަހެއްގައިވެސް ނައުޝީނަށް ކޮންމެވެސް ފޮތެއް ނޫނީ ކޮންމެވެސް އެއްޗެއް ހަދާލެވޭތޯ ބަލަން. އެގޮތުން އެންމެ ފުރަތަމަ އުފަންދުވަހު ނެރުނީ ފިރިމީހާގެ އެހީއާއެކު އަޅުގަނޑު ހެދި ފޮތެއް، ދިވެހިބަހުން ފޮތިފޮތެއް ނެރުނީ، އޭރު ދިވެހި ފޮތި ފޮތެއް ނުހުރޭ، ދެން ދެވަަނަ އުފަންދުވަހަށް އަކުރުބޯޑު ހެދީ، ޕަޒްލްސް ކުޅެން ނައުޝީން ވަރަށް ޝައުގު ހުންނާތީވެ، އަކުރުބޯޑު ހެދީ، ތިންވަނަ އުފަންދުވަހު ހެދީ "އަކުރުކުނާ". މިހެން ކޮންމެ އުފަންދުވަހަކަށްވެސް ކޮންމެވެސް ހާއްސަ އެއްޗެއް ދެމުން އައީ،"
ދިމީ ކިޔައިދިން ގޮތުގައި ނައުޝީނަކީ އާބަސްތައް ދަސްކުރާ ހިތްވާ ކުއްޖެކެވެ. އިނގިރޭސި ބަހުގެ ދިވެހި ބަސް އެނގުމުން ނައުޝީން ވަރަށް ބޮޑަށް އުފާވާކަން ފާހަގަކޮށް ދިމީބުނީ ފުރަތަމަ ލޭޑީބާޑަށް ކިޔަނީ ނަލަމަޑި ކަން އެނގުމުން ނައުޝީން ވަރަށް ބޮޑަށް އުފާވި ކަމުގައެވެ.
"ނޭނގޭ، ވަރަށް އުފާވާނެ ލަޔަން އަށް ކިޔަނީ ސިންގާކަން، މިގޮތަށް ދިވެހި ނަންތައް އެނގުނީމަ،" ނައުޝީންގެ މަންމަ ދިމީ ކިޔައިދިން ގޮތުގައި ނައުޝީން ބޮޑުވަމުން އައި ވަރަކަށް ކިޔަވައިދިނުމާއި އުނގަންނައިދިނުން، ތަރުބިއްޔަތުގެ ހުރިހާ ކަމެއްހެން ކުރަމުން އައީ ކުޑަކުއްޖެއްގެ ހިތަށާއި ސިކުނޑިއަށް ކަންކަން ފަހުމުކޮށްދިނުމަށް އެންމެ ފަސޭހަވާނެހެން ކުޅޭ ކުޅިވަރެއް ގޮތަށް ކަމަށެވެ. އެއްވެސް ކަމެއްގައި މަޖުބޫރު ނުކޮށް އެކަމެއް ކުރުމަށް ހިތްޖެހޭނެ ފަދަ ގޮތަކަށް މަގު ދެއްކުމުން ވަރަށް ފަސޭހައިން އެކަމަކަށް ކުދިންގެ ހިތްޖެހޭނެއެވެ. އެހެންކަމުން ނައުޝީންގެ މަންމަމެން ވަނީ ގޭތެރެއިން އެފަދަ މާހައުލެއް އުފައްދާފައެވެ.
ހަމައެހެންމެ އެންމެ ތުއްތު އިރުއްސުރެވެސް ނައުޝީން، ބޭރަށް ގެންދިއުމާއި ޕާކުފަދަ ތަންތަނަށް މޫދާއި ގޮނޑުދޮށުގެ ވެލިގަނޑަށް ގެންދިއުމަކީ ވެސް ގަވާއިދުން ކުރަމުން އަންނަ ކަމެކެވެ.
ނައުޝީން ފޮތެއް ކިޔުމުގައި، މިވެވެސް ނައުޝީންގެފޮތެއް
ނައުޝީނަކީ ދިވެހި ބަހަށް ވަރަށްވެސް ލޯބިކުރާ ކުއްޖެއްކަން ފާހަގަކޮށްލަމެވެ. މިޒަމާނަކީ އިނގިރޭސިބަހުން ވާހަކަދެއްކުން އާންމު ޒަމާނެކެވެ. ހާއްސަކޮށް ސުކޫލުގައި ކިޔެވުމަށް އިނގިރޭސިން ރަނގަޅަށް ވާހަކަ ދައްކަން އެނގުމަކީ ކޮންމެހެން ވަރަށް މުހިންމު ކަމެއްވެސްމެއެވެ. މިއަށްވުރެ ބޮޑު ކަމަކީ ދިވެހިބަހުގެ ފޮތްތައް މަދުވުމެވެ. ބޮޑުވަމުން އަންނަ ދިވެހި ފޮތް ކިޔާހިތްވާ ކުއްޖަކު އެއްއަހަރު ވަންދެން ކިޔާލާއިރު ލައިބްރަރީ ނުވަތަ ބުކްޝޮޕްތަކުގައި ހުންނަ ކުޑަކުދިންގެ ފޮތްތައް ހުންނާނީ ކިޔައިނިމިފައެވެ. ދެފަހަރު ތިން ފަހަރު ކިޔާލުމަށްފަހު ދެން އަބަދު އެއްފޮތެއް ކިޔާހިތެއް ނުވާނެތާއެވެ. އެހެންކަމުން ކުޑަކުދިން ކިޔާނެ ފޮތްތައް ނެތުމުން ދެން އޮންނާނީ ކިޔަން އިނގިރޭސި ފޮތްތާއެވެ.
ނައުޝީންގެ މަންމަވެސް ފާހަގަކުރި އެއް ކަމަކީ މިއީއެވެ. ކުޑަކުދިންގެ ވިސްނުމާއި ފިކުރާ ގުޅޭ، ފެންވަރު ރަނގަޅު ދިވެހި ފޮތްތައް މަދުވުމަކީ ދެރަކަމެއްކަން ގައިމެވެ. ކުރިން އަބަދު ދިވެހިން ވާހަކަދެއްކި ނަމަވެސް މިހާރު ނައުޝީންވެސް ގިނައިން ވާހަކަ ދައްކައި އުޅެނީ އިނގިރޭސި ބަހުންނެވެ. އެހެންނަމަވެސް ނައުޝީންގެ ހާއްސަ ކަމެއް ހުރެއެވެ. ދިވެހި ބަހާއި އިނގިރޭސި ބަސް މަސްހުނި ކޮށްގެން ވާހަކަ ދެއްކުމުގެ އެއްވެސް ގޮތެއް ނައުޝީންގެ ނުހުރެއެވެ.
"ދިވެހިން ވާހަކަ ދައްކާނަމަ ދިވެހިން ދައްކާނީ، އިނގިރޭސި ނަމަ އިނގިރޭސިން، ދެބަސް އެއްކޮށްގެން ނުދައްކާނެ ވާހަކައެއް، ނައުޝިންގެ ބައްޕަ ނައުޝީނާ ވާހަކަ ދައްކާނީ މުޅިންވެސް ދިވެހިބަހުން. އަޅުގަނޑު ވާހަކަ ދައްކަނީ އިނގިރޭސިން،" ދިމީ ކިޔައިދިނެވެ.
ނައުޝީން ޗެސްކުޅުމުގައިވެސްުހުނަރުވެރި……ފޮޓޯ:ދިމީ
ނައުޝީން އަކުރުތައް ދަސްކުރީ އަޑުންނެވެ. މިއީ އެންމެ ފަސޭހައިން ކޮންމެ އަކުރެއްވެސް ދަސްކުރެވޭނެ ގޮތެވެ. އަދި އެންމެ ރަނގަޅު ގޮތްވެސްމެއެވެ. ސަބަބަކީ "އަކުރު" މިއީ އަޑެެއް ކަމަށްވާތީއެވެ. (އަކުރަކީ ފުއްޕާމެއިން ނުކުންނަ ވައި ކަރުތެރެއިން އަޑުނަރު ފަހަނައަޅައި ގޮސް ދުލާއި ތައްޔާއި ދަތް ހިމެނޭހެން އަނގައިގެ ތެރެއިން އެވައި ނުކުންނައިރު އެޖެހޭ ތަނަަކުން އުފައްދާ އަޑަށް ދީފައި ހުންނަ "ސިމްބަލްސް" ނުވަތަ "ނިޝާން" ތަކެކެވެ.) ނައުޝީންގެ ކިޔެވުން ވެސް ކުރިއަށް ދަނީ ކުޑަކުއްޖަކަށް ވާތީ ފޫހިނުވާނެ އުސޫލުން ކުޅިވަރުގެ ތެރެއިންނެވެ. އަދި އަމަލީ ދިރިއުޅުމުގެ ހަރަކާތްތަކުގެ ތެރެއިން އުނގެނޭ ފަދަ ގޮތަކަށްވެ. ނައުޝީންގެ ކަންކަން މަންމަ ދިމީ އަދި ބައްޕަ ދާރީ ކުރަމުން އަންނަނީ ރޭވިފައިވާ އުސޫލަަކުން ހަރުދަނާ ގޮތަކަށެވެ. ނައުޝީންގެ ކޮންމެ ކުރިއެރުމަކަށް އަތުގައި ހިފައިގެން އެހީތެރިވެދީ މަގުފަހިކޮށްދެމުންނެވެ. ފޭސްބުކް ޕޭޖް "ނައުޝީން ބުކްސް އެންޑް ޓޯއިސް" އުފައްދައިފައިވަނީ ވެސް ނައުޝީނާ ގުޅުވައިގެން މަންމައާއި ބައްޕައެވެ.
ނައުޝީން ހުސްވަގުތުތަކުގައި ފޮތް ކިޔުމަކީ ފާހަގަ ކުރެވޭ ހައިރާންވެސް ކުރުވަނިވި ކަމެކެވެ. އެހެން ކުޑަކުދިންތަކޭ އެއްގޮތަށް ނައުޝީންވެސް ކުޅިވަރު ކުޅުމުގައި ވަގުތު ހޭދަކުރެއެވެ. އެހެންނަމަވެސް ގިނަ ވަގުތު ހޭދަކުރެވެނީ ފޮތް ކިޔުމުގެވެ. ނައުޝީން ފޮތް ކިޔުމަށް ޝައުގުވެރިކަން ހުންނަ ވަރު ފެނުމުން، ދިމީގެ ފޮތްތައްވެސް ނަގައި ބަލައި ކިޔާތީވެ، އެހިސާބުން ނައުޝީންއަށްވެސް އަމިއްލަ ފޮތެއް ހަދައިދޭން ވެއްޖެކަން ދިމީއަށް އިހުސާސް ކުރެވުނެވެ.
އެގޮތަށް ފޮތް ކިޔާތީވެ، ނައުޝީނަށްވެސް ފޮތެއް ހަދައިދޭންވީއޭ ހިތަށް އަރާފައި ހުންނަނީ، ދެން ޑްރާފްޓް ފޮތް ނައުޝީން ނިދާފައި އޮއްވާ ހަދާލަނީ، އަނެއް ދުވަހު ހެނދުނު ހޭލުމުން އެ ފޮތް ދިނުމުން ނައުޝީން ވަރަށް އުފާވެފައި ހުންނާނީ،" ދިމީ ކިޔައިދިނެވެ. މިގޮތަށް ކަންތައް ވަމުން ގޮސް "އަޅުގަނޑުވެސް ފޮތެއް ހަދަން ބޭނުން،" ނައުޝީން އަމިއްލައަށް ބުނި ވަގުތު ނައުޝީނަށް ފޮތެއް ހަދައިދިނުމާމެދު ދިމީ ގޮތް ނިންމީއެވެ.
"އުމުރަކީ އަޅުގަނޑު ގަބޫލު ކުރާ ގޮތުގައި ނަންބަރެއް، އެހެންވެ ނައުޝީނަށް ފޮތެއް ހަަދައިދޭން ނިންމީ،"
ކޮންމެއަކަސް އެތަކެއް މަރުހަލާތަކެއް ކަޑައްތު ކުރުމަށްފަހު މިއަދު ކުޑަކުޑަ ނައުޝީނަކީ ރާއްޖޭގައި އެންމެނަށްވެސް އެނގޭ ލިޔުންތެރިއެކެވެ. ދިމީ ދެންނެވި ގޮތަށް އުމުރަކީ ނަންބަރެކެވެ. ކުއްޖަކުގެ ހުނަރާއި އެކުއްޖެއްގެ ހިލްމު، އުމުރަށްވުރެ ކިތަންމެހާވެސް ބޮޑުވެދާނެއެވެ.
ނައުޝީނަކީ މިއަދު ރާއްޖޭގައި އިން ހަމައެންމެ ހަގު ލިޔުންތެރިޔާ އޭ ބުނުމަކީ ދޮގަކަށް ނުވާނެކަން ގައިމެވެ. "ދަ ޔަންގެސްޓް އޯތަރ" އަޅުގަނޑު ނައުޝީނަށް ދޭން ބޭނުންވާ ނަމަކީ މިއީއެވެ.
ނައުޝީންގެ ކޮންމެ އުފަންދުވަހަކުވެސް ކޮންމެވެސް ކަހަލަ ހާއްސަ ގޮތަކަށް ފާހަގަ ކުރަނީ ނައުޝީންގެ އެކުވެރި ރަހުމަތްތެރިން ހިމެނޭހެނެވެ. މިފަދަަ ކޮންމެ ކަމަކީވެސް ނައުޝީންް ނިހާޔަތަށް އުފާކުރުވާ ކަމެއްކަން ދިމީ ވަނީ ފާހަގަަކޮށްފައެވެ. މިހުރިހާ ކަމެއްގެ ތެރެއިންވެސް ނައުޝީނަށް ލިބޭ އެންމެ ބޮޑު އުފަލަކީ ފޮތްތައް ކަންވެސް ފާހަގަކޮށްލަމެވެ.
މިހާރު ނައުޝީންގެ އަމިއްލަ ފޮތް މިވަނީ ބާޒާރަށް ނެރެފައެވެ. ހަމައެކަނި ރާއްޖޭގެ ބާޒާރަކަށް ނޫނެވެ. ބައިނަލް އަގުވާމީ ބާޒާރަށްވެސް ނައުޝީންގެ ފޮތް މިއަދު ވަނީ ނެރެފައެވެ.
ކޮންމެ މަންމައަކުވެސް، އަދި ބައްޕައަކުވެސް، ނުވަތަ ކޮންމެ ބެލެނިވެރިއަކުވެސް ތިމާގެ ދަރިފުޅާމެދު ގިނ ހުވަފެންތަކެއް ދެކޭނެއެވެ. ދަރިފުޅު ދުނިޔެއަށް އަންނަން އުޅޭ ކަމުގެ ފުރަތަމަ އިޝާރާތް އިހުސާސް ވާ ވަގުތުން ފެށިގެން ތާވަލުތައް ހަދައި ރޭވުންތައް ރާވައެވެ. ހަގީގަތުގައި މިއީ ކަން އޮންނަން ޖެހޭ ގޮތްވެސްމެއެވެ.
ދަރިންގެ އުއްމީދުތައް ތިމާގެ އުއްމީދުތަކަށް ހަދާ މައިންބަފައިންގެ ހިތަށް ލިބޭ އެންމެ ބޮޑު ހަމަޖެހުމަކީ އެދަރިފުޅުގެ އުއްމީދުތައް ރޯޝަން ކޮށްދިނުމަށް މަގުފަހިކޮށްދިނުމެވެ. މިފަދަ މައިންބަފައިނަކީ ދަރިފުޅުގެ މުސްތަގުބަލުގެ ޗާޓު އެދަރިފުޅާ އެކުލަވައިގެން، ކުރަހައި އެޔަށް ހަގީގީ ކުލަ ގެނައުމުގައި އެހީވަމުން އަންނަ ފަރާތްތައްކަން ޔަގީނެވެ.
ނައުޝީން، ބައްޕަ ދާރީ އަލިމަނިކު އަދި މަންމަ ދިމްނާފާކިރު،ދިމީއާއެކު
ދަރިންގެ އުއްމީދުތައް ތިމާގެ އުއްމީދުތަކަށް ހަދާ މައިންބަފައިންގެ ހިތަށް ލިބޭ އެންމެ ބޮޑު ހަމަޖެހުމަކީ އެދަރިފުޅުގެ އުއްމީދުތައް ރޯޝަން ކޮށްދިނުމަށް މަގުފަހިކޮށްދިނުމެވެ. މިފަދަ މައިންބަފައިނަކީ ދަރިފުޅުގެ މުސްތަގުބަލުގެ ޗާޓު އެދަރިފުޅާ އެކުލަވައިގެން، ކުރަހައި އެޔަށް ހަގީގީ ކުލަ ގެނައުމުގައި އެހީވަމުން އަންނަ ފަރާތްތައްކަން ޔަގީނެވެ.
ނައުޝީންގެ މަންމައާއި ބައްޕަ އެދެމީހުންގެ ދަރިފުޅަށްޓަކައި އެހީތެރިވީ މިދެންނެވި ފަދައިންނެވެ. ދަރިފުޅަކު ބޮޑުވަމުން އަންނައިރު އަމިއްލައަށް އެދަރިފުޅުގެ ރުހުމާއި ނުރުހުން، ގަބޫލު ނުގަބޫލު، ހިތްވުމާއި ހިތްނުވުން، އުފަލާއި ދެރަވުން މި ހުރިހާ އިހުސާސްތަަކަކީ ވެސް މައިންބަފައިން ގާތުން ބެލުމުން ސާފުކޮށް ފެންނާނެ ކަންތައްތަކެވެ. އަދި ބަލައިގެން އެނގިިގެން ވަގުތު ދީގެން އެދަރިފުޅު އެދޭ މަގުން ހިނގުމަށް ފުރުސަތު ހޯދައިދިނުމަކީ މަންމައަކާއި ބައްޕައަކަށް އަދި ބެލެނިވެރިއަކަށް ވިޔަސް ކުރެވޭނެ އެންމެ ފުރިހަމަ އެއް މަސައްކަތެވެ.’
ނައުޝީންގެ މުސްތަގުބަލުގެ ޗާޓު މިހާ ތުއްތު އިރު ކުރަހައި އެއަށް ހަގީގީ ކުލަ ގެނައުމުގައި ދިމީގެ މަސައްކަތާއި ހިތްވަރު، ގަލަމަކުން ބަޔާންކޮށްދޭން ބޭނުން ވިޔަސް ބުނެދެވޭ ވަރަށްވުރެ މާބޮޑަށްވެސް ފުރިހަމައެވެ، އެކަން ޔަގީނުން ވެސް ފެނި ހާމަވެއެވެ. ދިމީ ނައުޝީނާމެދު ގެންގުޅެނީ ވިސްނުންތެރި، ދުރު ވިސްނޭ، ދުނިޔޭގެ އެކިދުވަހުގެ ކުލަތަޖުރިބާވެފައިވާ މަންމައެއްގެ ވިސްނުންކަން ޔަގީނެވެ. ދަރިފުޅަށް އަބަދު މޮޅުވާން، އަަބަދު އެއްވަނަ ގެންނަން މަޖްބޫރު ކުރުން ފަދަ ކަންކަމަކީ ދިމީގެ ނަޒަރުގައި ކުޑަކުދިންނަށް ދެވޭ ވަރަށް ނެގެޓިވް ޕްރެޝަރ އެއް ނުވަތަ ފޯރުވޭ ނުރަނގަޅު ނުފޫޒެކެވެ. ދިމީ އަބަދުވެސް ބުނާ ވާހަކައަކީ އެމީހުން އެންމެން އެކުވެގެން ފާހަގަ ކުރަނީ ހަމައެކަނި ނައުޝީންގެ ކާމިޔާބީ ނޫންކަމުގައެވެ. އެކަމަކު ނައުޝީން މުބާރާތަކުން ވަނައެެއް ނުލިބި އައި ކަމުގައިވިޔަސް އެމުބާރާތުގައި ބައިވެރިވުން ދިމީމެން ފާހަގަ ކުރެއެވެ. ނައުޝީންގެ މޮޅުވުމާއި ބަލިވުމަށްވުރެ ބޮޑަށް ދިމީގެ ނަޒަރުގައި މުހިންމީ ނައުޝީން ކުރާ ހިތްވަރާއި އެކުރާ ކަމަކުން ދަސްވާ ކަންތައް ނުވަތަ ލިވޭ ތަޖުރިބާތަކެވެ. އެއީ ހަގީގަތުގައިވެސް ވަރަށް މުހިންމު ކަމެކެވެ. ކުއްޖަކަށް ހުރިހާ ފަހަރެއްގައި ވަނައެއް ނުލިބިދާނެއެވެ. ކިތަންމެ މަސައްކަތެއް ކޮށް ހިތްވަރު ކުރުމާއެކުވެސް ވަރަށްވެސް ހަމަކުޑަކުޑަ ކަމަކުން ކުޑަކުޑަ ތަފާތަކުންވެސް ކުއްޖާ ފަހަތަށް ޖެހިދާނެއެެވެ. އޭގެ މާނައަކީ ދަރިފުޅަކީ ނާގާބިލު ދަރިއަކަށްވީއެއް ނޫނެވެ. އެކަމަކު އޭގެ މާނައަކީ އެދަރިފުުޅު އެއައީ އޭނާގެ މުސްތަގުބަލަށް އެއްޗެއް އުނގެނިގެންނެވެ. ތަފާތުތަކެއް ދައްކައިދޭނެ ކުއްޖަކަށް ތިމާގެ ދަރިފުޅު ހެދޭތޯ މަސައްކަތް ކުރުމަކީ މިފަދައިން ދަރިފުޅުގެ ހިތްވަރަށް ސާބަސް ދިނުމެވެ.
މުހިންްމި ހުރިހާ ފަހަރަކު އެއްވަނައެއް ނޫން، ހަގީގީ ކާމިޔާބީއަކީ އެކަމެއްގައި ތިމާއަށް އެއްޗެއްދަސްވެ އެނގި ކަމަކަށް އަހުލުވެރިވުން
ނެޝަނަލް ޗެސް ޗެމްޕިއަންސް ގައިވެސް 2 ގަޑިއިރުވަންދެން 1 މެޗު ކުޅެ ނައުޝީން ނުކުތީ މޮޅުވެގެންނުވެ. މިހާކުޑައިރު އެހާ ގިނަ އިރުވަންދެން އެއް މެޗު ކުޅެން ހޭދަކުރި ވަގުތު އަދި ހިތްވަރަށް ހަމަ ސާބަހެވެ.
"6 ވަނައިގައި ނައުޝީން މިހާރު އޮތީ 4 ވަނައިގައި އޮވެފައި، އެކަމަކު އެކަމުގެ އެއްވެސް މައްސަލައެއް ނެތް، އަބަދުވެސް ބަލިވިޔަސް އެކަންވެސް ފާހަގަކުރަން، މިއަދު އެބައޮތް ނައުޝީންގެ ކުޑަ ސެލެބްރޭޝަނެއްވެސް،" ދިމީ ބުނި ގޮތުގައި ނައުޝީންގެ ގައިގައި ކޮންމެ ކަމެއް ކުރުމުގެ ހިތްވަރުވެސް އެބަހުރިކަން އޭނާއަށް ޔަގީންވެއެވެ.
"ކޮންމެ ކަމެއް ކުރުމުގެ ހިތްވަރުވެސް ނައުޝީންގެ ގައިގައި އެބަހުރި، ވިހި އަހަރުގެ ކުޅުންތެރިއަކާ އެކުވެސް ނައުޝީން ކުޅުނު، އެހާރަ އަހަރުގެ ސާދަ އަަހަރުގެ ކުދިންނާއެކުވެސް ކުޅުނު، ހުރިހާ ފަހަރެއްގައި އެއްވަނަ ނުލިބިދާނެ، ނައުޝީން ދެރަވެދާނެތީ. ހިތްވަރު އެލުވާލަން ބޭނުން ނުވާތީ އެވާހަކަ އަބަދުވެސް ހަނދާންކޮށްދެން،" ދިމީ ބުނި ގޮތުގައި މެޗަކުން ބަލިވެގެން ނައުޝީން ނުކުތަސް އަދި މޮޅުވެގެންް ނުކުތަސް ފުރަތަމަ ސްކޯ އެހުމަކީ އޭނާ ކުރާ ކަމެއް ނޫނެވެ. ފުރަތަމަ އަބަދުވެސް ދަރިފުޅު ގައިގާ ބައްދާލުމަށްފަހު ދަރިފުޅާ ލޯބިކޮށްލަނީ ކަމަށް ބުނިއިރު ދިމީގެ އަޑުންވެސް އޭނާގެ އެއިހުސާސް ހާމަވެގެން ދިޔައެވެ. "އަބަދުވެސް ބުނަނީ މޯޓިވޭޓް ކުރެވޭތޯ ބަލަނީ،"
ނައުޝީނަކީ ޗެސް ކުޅުމުގެ އިތުރުން އެތްލެޓިކްސް އަދި ސްކޭޓިންގގައިވެސް ހަރަކާތްތެރިވާ ކުއްޖެކެވެ. މިގޮތުން ނަސީރު ސްޕޯޓްސް އެކަޑަމީއަކީ ނައުޝީން ވަރަށް ދާހިތުން ދާ ތަނެކެވެ. ހެލިފެލިވެ އުޅޭނެ ކުޅިވަރެއް ކުދިންނަށް ހިޔާރު ކޮށްދިނުމުގެ މުހިންމުކަންވެސް ދިމީ ކިޔައިދިނެވެ. އަދި ސުކޫލުތަކުގައި ބޭއްވި ބައެއް މުބާރާތްތަކުގެ ތެރޭގައި ބަނދިކިޔުން، ޤުރުއާން މުބާރާތުންވެސް ނައުޝިން ވަނީ ރަންވަނަ ހޯދާފައެވެ.
އުމުރުން އެންމެ 4 އަހަރުގައި މިކުޑަ ހުނަރުވެރިޔާއަށް ވަނީ ދުނިޔޭގެ 100 ކުދިންނަށް ދެވޭ "ޗައިލްޑް ޕްރޮޑިޖީ އިންސްޕިރޭޝަނަލް ރީޑަރ" ގެ ފަހުރުވެސް ލިބިފައިކަން ފާހަގަކޮށްލަމެވެ.
ނައުޝީން، ބައްޕަ ދާރީ އަލިމަނިކު އަދި މަންމަ ދިމްނާފާކިރު،ދިމީއާއެކު
"ނައުޝީން ވަރަށް ވޮލަންޓިއަރ މަސައްކަތް ކުރާހިތްވާނެ، އަދި މަންމީ އަށް ލިބިފައިވާ އެވޯޑުތައް ވަރަށް ބަލާނެ، ނައުޝީންގެ ފޮތް ނެރުމަށްފަހު އެފޮތް ވިއްކައިގެން ލިބޭ ފުރަތަމަ ނުވަހާސް ރުފިޔާ ހަދިޔާކުރަން ނިންމީ ފަލަސްތީނު ކުދިންނަށް، އެކުދިންނަށް އާ ހެދުމާއި ކުޅޭ އެއްޗެހި ގަނެވޭނެ ގޮތް ވާނެނަމައޭ މީ ވަރަށް ގިނައިން ނައުޝީން ދައްކާއުޅޭ ވާހަކައެއް، އަދި ނަމާދުކޮށްފައި އެކުދިންނަށް އެދި ދުއާވެސް ކުރާނެ،" ނައުޝީންގެ އާދަތައް ހުންނަ ގޮތުގެ ވާހަކަ ހިއްސާކުރަމުން ދިމީ ބުންޏެވެ.
ނައުޝީންގެ ފޮތް ވަރަށް ގިނަ ފަރާތްތަކަށް ހަދިޔާކުރިއެވެ. މިގޮތުން ސްކޫލުތަކުގެ ލައިބްރަރީތަކަށާއި ފޮތް ލިޔާ ފަރާތްތައް ހިމެނެއެވެ.
ބެލެނިވެރިންްނާއި މައިންބަފައިންނަށް ދިމީދޭ މެސެޖަކީ ވެސް މިއީއެވެ. ދަރިފުޅަށް ވަނަ ގެނައުމަށް ބާރު އެޅުމާއި ހިތްވަރު ދިނުމާއި މަޖުބޫރު ކުރުމާއި އެއީ ކޮންމެހެންވެސް ލިބެންޖެހޭ އެއްޗެއް ގޮތަށް ބަސް ބުނުމަކީ އެއްވެސް ހާލެއްގައި ރަނގަޅު ކަމެއް ނޫނެވެ. ކުއްޖަކު ވަނައެއް ނުލިބި އަންނަ ވަގުތު ހުދު އެކުއްޖަކުވެސް ހުންނާނީ ދެރަވެ ހިތްދަތިވެފައެވެ، އެފަދަ ދަނޑިވަޅެއްގައި "ކޮބާ ކިހިނެއްވީ؟ ކީއްވެ އެހާ މޮޅަށް އެނގޭއިރު އެހާ މޮޅަށް ކުޅުނުއިރު، އެހާ ރަނގަޅަށް ދަސްކޮށްގެން ގޮސްފައި ވަނައެއް ނުލިބެންވީ ކީއްވެ؟" މިފަދަ ސުވާލުތަަކަށް ޖަވާބުދޭ ވަރަށްވުރެ އެތުއްތު ސިކުނޑިތައް އެފަދަ ވަގުތުތަކުގައި ނުތަނަވަސްވެފައި ތިބޭ މިންވަރު އިހްސާސް ވާ ނަމަ އެފަދަ ސުވާލުތައް ނުކުރާނެއެވެ. އެހެނީ މިމޭރުމުން ރުޅިއައިސްފއި ދަރިފުޅާ ވާހަކަދެއްކުމުން އެމަރާލެވެނީ ކުއްޖާގެ ހިތްވަރު ކަމަށްޗާތީއެވެ.
ނައުޝީންގެ މަންމައާއި ބައްޕަ ނައުޝީނަށް ބުނެދެމުން އެއަންނަނީ ނަމޫނާއަކަށް ބަލަން އެންމެ ރަނގަޅު ގޮތެއްކަން ޔަގީނެވެ. ދަރިފުޅުގެ އުފަލާއި އެއްވަރަށް ދަރިފުޅުގެ މާޔޫސްކކަމާއި ހިތާމައިގައިވެސް ސައްތައިން ސައްތަ ހިއްސާވާނަމަ އެދަރިފުޅަކު ކާމިޔާބީގެ މަގުން ކައްސާލާނެ އެއްވެސް ގޮތެއް ނޯންނާނެކަން ޔަގީނެވެ.
ނައުޝީން، އެތުލެޓިކްސް ގައިވެސް ހަރަކާތްތެތިވޭ
ދިމީގެ މިހިތްވަރާއި މަންމައެއްގެ ޒިންމާ އަދާކުރުމުގައި ދަރިފުޅަށް އެންމެ ރަނގަޅު ގޮތް ހޯދައިދިނުމުގައި ކުރާ ހިތްވަރަށް ހުވަދޫމީޑިޔާ ސެލިއުޓް ކުރަމެވެ، ހަމައެހެންމެ ފޮތްތަކުގެ ދުނިޔެއިން ކުޑަކުޑަ ނައުޝީން ވަދެފައިވާ ޗެސްގެ ކުޅިބައިގެ ދުނިޔޭގައިވެސް ކުޑަކުޑަ ސިކުނޑިއަކާއި ހިތަކުން ކުރާ ފުރިހަމަ ހިތްވަރަށް އައްސަރިބަހާއި ސާބަސް ދެނީ ކަންކަމުގައި ކުރިއަރައި ދިއުމުގެ ހިތްވަރު އަބަދުވެސް ނައުޝީނަށް ދެއްވުމަށް ކަލާނގެ ހަޟްރަތުން އެދެމުންނެވެ. މާޝާﷲ، ހުވަދޫ މީޑިއާގެ އެދުމަކީ މިކުޑަހުނަރުވެރިޔާ، ނައުޝީނަށް އަދަށްވުރެ ފަހި ފާގަތި މާދަމާއެއް ލިބުމެވެ. މިލިޔުން ނިންމާމިލަނީ ނައުޝީންގެ ޕޮއެމް ފޮތް މިހާރު އެމޭޒަން އިން ލިބެން ހުރި ކަމުގެ އުފާވެރި ހަބަރާއެކުގައެވެ.