މާލެސިޓީގެ މަގުތައް ހެދުމާ ގުޅޭގޮތުން ދިރާސާއެއް ކުރަން ރާއްޖެއިން ބޭރުން ޓީމެއް ވަރަށް އަވަހަށް އަންނާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
މާލެ އާއި ވިލިމާލޭގެ މަގުތައް ޒަމާނީ ފެންވަރަށް ހެދުމުގެ ފީސިބިލިޓީ ސްޓަޑީއެއް ހެދުމަށް ދިވެހި ސަރުކާރުން ވަނީ ޗައިނާ އިންޓަރނޭޝަނަލް ޑިވެލޮޕްމަންޓް ކޯޕަރޭޝަން އެޖެންސީ (ސިޑްކާ) އާ އެކުގައި އެއްބަސްވުމެއްގައި ސޮއިކޮށްފައެވެ.
މި އަހަރުގެ ކުރީކޮޅު ރައީސް މުއިއްޒު، ޗައިނާއަށް ކުރެއްވި ފުރަމާނަ ދަތުރުފުޅުގައި ހަމަޖެހިގެން ދިޔަ 130 މިލިއަން ޑޮލަރުގެ ހިލޭ އެހީގެ ތެރެއިން އެންމެ އިސްކަންދޭ މަޝްރޫއަކީ މާލޭގެ މަގު ހެދުމުގެ މަޝްރޫއެވެ. މާލޭގެ މަގުތައް ހެދުމަށް 100 މިލިޔަން ޑޮލަރު އަރާނެ ކަމަށް ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތަލިބް މީގެކުރިން ވަނީ ވިދާޅުވެފައެވެ.
މާލެ ސިޓީ ކައުންސިލްގެ މެމްބަރުންނާ ބައްދަލު ކުރެއްވުމަށް އެ އިދާރާ އަށް ވަޑައިގެން ރައީސް ޑރ. މުއިއްޒު ވިދާޅުވީ މާލެ އަށް ދިމާވެފައިވާ ބޯހިޔާވަހިކަމުގެ މައްސަލަ އަށް ފަހު، ދެން އެންމެ ބޮޑަށް ފާހަގަ ކުރެވެނީ މަގުތަކުގެ މައްސަލަ ކަމަށެވެ.
މާލޭގެ މަގުތައް ހެދުމަކީ މާލޭގައި ދިރިއުޅޭ ރައްޔިތުންނަށް އެންމެ ފަސޭހަ ވާނެ ދެވަނަ ކަންތައް ކަން ފާހަގަ ކުރައްވައި ރައީސް ވަނީ މާލެ އާއި ވިލިމާލޭގެ މަގުތައް ހެދުމަށް ޗައިނާ ސަރުކާރުގެ ހިލޭ ލިބިފައިވާ ކަން ފާހަގަ ކުރައްވައިފައެވެ. އަދި ޗައިނާގެ ހިލޭ އެހީގައި ވިލިމާލޭގައި ޓާޝިއަރީ ހޮސްޕިޓަލެއް އަޅަން ނިންމާފައިވާ ކަން ވެސް އެމަނިކުފާނު ވަނީ ފާހަގަ ކުރައްވައިފައެވެ.
މީގެއިތުރުން މާލޭގެ އުތުރު ފަރާތުން ބޭރު މަގު ފުޅާ ކުރުމުގެ ބައި ވަކި މަޝްރޫއުއެއްގެ ގޮތުގައި ކުރިއަށް ގެންދިއުމަށް ނިންމާފައިވާ ކަމަށް ރައީސް ވިދާޅުވިއެވެ. ރައީސް ވިދާޅުވީ އެ މަޝްރޫއު ކުރިއަށް ގެންދިއުމަށް ހަމަޖެހިފައި ވަނީ ކޮންސްޓްރަކްޝަން މިނިސްޓްރީގެ ބަޖެޓުންނެވެ.
މި އަހަރު ނިމޭ ތަނަށް ނޫނީ މި އަންނަ އަހަރު ކުރީކޮޅުގައި އަމަލީ، ފިޒިކަލް މަސައްކަތަށް ދެވޭނެ ކަމަށް އުއްމީދު ކުރައްވާ ކަމުގައި މާލެ ސިޓީ ކައުންސިލްގެ މެމްބަރުން ބައިވެރިވެވަޑައިގެންނެވި ބައްދަލުވުމުގައި ރައީސް ޑރ މުއިއްޒު ވަނީ ވިދާޅުވެފަ އެވެ.