ސަރުކާރުގެ ހާރިޖީ ސިޔާސަތަށް އެއްވެސް ބަދަލެއް ނާންނަކަމަށާއި މި ސަރުކާރުން އަވަށްޓެރި އިންޑިއާއާ އެއްކައިރިއަށް ޖެހި، އެ ގައުމު ބާކީކޮށްލާފައި ނޯންނާނެ ކަމުގެ ޔަގީންކަން ދެއްވުމާއެކު، އިންޑިޔާ އައުޓާ ގުޅިގެން މާފަށް އެދެން ޖެހޭ ސަބަބެއް ނެތް ކަމަށް ރައީސް ޑރ. މުހައްމަދު މުއިއްޒު ވިދާޅުވެެއްޖެއެވެ.
ރައީސް ޑރ. މުއިއްޒު މިހެން ވިދާޅުވީ މާލެ ސިޓީ ކައުންސިލްގެ މެމްބަރުންނާ ބައްދަލު ކުރެއްވުމަށްފަހު، ކައުންސިލް އިދާރާގެ ބޭރުގައި ނޫސްވެރިންނާ ބައްދަލު ކުރައްވައި ދެއްކެވި ވާހަކަފުޅުގައެވެ.
މިހާރު ވެސް ތަންފީޒު ކުރައްވަނީ ވެރިކަމަށް ވަޑައިގަތުމުގެ ކުރިން އިއުލާން ކުރެއްވި ރިޔާސީ މެނިފެސްޓޯގައި ހިމެނޭ ހާރިޖީ ސިޔާސަތުކަން ފާހަގަކުރައްވައި ރައީސް ޑރ މުއިއްޒު ވިދާޅުވީ ރާއްޖޭގެ މިނިވަންކަމާއި ސިޔާދަތަށް އިހްތިރާމް ކުރާ ދިވެހިންނަށް އެއްބާރުލުންދޭ ހުރިހާ ގައުމަކާ އެކީގައި ތަފާތު ކުރުމެއް ނެތި ގާތް ގުޅުމެއް ބޭއްވުމަކީ މެނިފެސްޓޯގައި ހިމެނޭ އެންމެ މުހިންމު ހާރިޖީ ސިޔާސަތު ކަމަށެވެ.
“އެ ސިޔާސަތުން ކަސިޔާރުވެގެން، އެއްކައިރިވެގެން ދިޔަ އެއްވެސް ދުވަހެއް ނާންނާނެ. އެހެންވީމަ އަޅުގަނޑުމެން މާފަށް އެދެން ޖެހޭ ކަމެއް ނެތެއް ނޫންތޯ؟ އަޅުގަނޑުމެން އިއުލާން ކުރި މެނިފެސްޓޯ ރައްޔިތުން ބަލައިގަތީ. އެއާ އެއްގޮތަށް އަޅުގަނޑުމެން ގާތް ގުޅުން ބާއްވަނީ ހުރިހާ ގައުމަކާއެކު،” ސަރުކާރުގެ ހާރިޖީ ސިޔާސަތު “އިންޑިއާ އައުޓް” އިން “ވެލްކަމް އިންޑިއާ”އަށް ބަދަލުވި ކަމަށް ބުނެ އިންޑިއާގެ ކިބައިން މާފަށް އެދުމަށް އެމްޑީޕީން ގޮވާލުމުން އެކަމަށް އިޝާރާތް ކުރައްވައި ރައީސް ވިދާޅުވީ ސިޔާސަތުން ކަސިޔާރުވެގެން އެއްކައިރިވެގެން ދިިޔަ އެއްވެސް ދުވަހެއް ނާންނާނެކަމަށާއި ކަންމިހެން އޮތުމާއެކު އެމަނިކުފާނު އިންޑިޔާއައުޓާ ގުޅިވަޑައިގެން މާފަށް އެދެން ޖެހޭނެ ކަމެއް ނެތް ކަމަށެވެ. މިސަރުކާރުން އިއުލާން ކުރި މެނިފެސްޓޯ ރައްޔިތުން ބަލައިގަން ކަމަށާއި އެއޒ އެއްގޮތަށް ހުރިހާ ގައުމަކާއެކު މިސަރުކާރުން ގުޅުން ބާއްވާނެ ކަމަށްވެސް ރައީސް ވަނީ ވިދާޅުވެފައެވެ.
ރައީސް ވިދާޅުވީ ރައްޔިތުންގެ ކަންބޮޑުވުން އޮތީ އިންޑިއާ ސިފައިން ރާއްޖޭގައި ތިބޭތީ ކަމަށާއި އެކަން ދެ ގައުމުގެ މަޝްވަރާގެ މަތިން ހައްލުކޮށް، އިންޑިއާ ސިފައިން ރާއްޖެ އިން ފޮނުވާލާފައިވާ ކަމަށެވެ. އެކަމުން ވެސް ދެ ގައުމުގެ ދެމެދު އޮތް ގުޅުން ހާމަވާ ކަމަށް އެމަނިކުފާނު ވިދާޅުވިއެވެ.
ރައީސް ވިދާޅުވި ގޮތުގައި އިންޑިއާއަކީ ރާއްޖެއާ އެންމެ ގާތް އެކުވެރި، އަދި އެންމެ ކައިރީ އޮތް ގައުމެވެ. މިވީ އެތައް އަހަރެއްގެ ތެރޭގައި އިންޑިއާ އިން ރާއްޖެ އަށް އެކި ގޮތް ގޮތުން އެހީތެރިކަން ފޯރުކޮށްދީފައިވާ ކަން ރައީސްގެ ވާހަކަފުޅުގައި ވަނީ ފާހަގަ ކުރައްވައިފައެވެ