ރައީސް ޑރ މުޙައްމަދު މުޢިއްޒަށް ލަފާދެއްވާނެ "ދިވެހި ޒުވާނުންގެ ޤައުމީ ލަފާދޭ ކޮމިޓީ" މިއަދު އެކުލަވާލައި އިފްތިތާޙުކޮށްދެއްވައިފިއެވެ.
އެކޮމިޓީ އިފްތިތާހު ކޮށްދެއްވުމަށް ރައީސް އޮފީހުގައި ބޭއްވި ހާއްސަ ރަސްމިއްޔާތެއްގައި އެއޮފީހުން ބުނީ މިއީ ސަރުކާރުގެ މެނިފެސްޓޯއާއި މުހިންމު ސިޔާސަތުތައް ތަންފީޒުކުރުމުގައި ޒުވާނުންގެ ޚިޔާލާއި މަޝްވަރާ ހޯދައި، އެފަދަ ކަންކަމުގައި ކުރިއަށްދާންވީ ގޮތްތަކާ ގުޅޭގޮތުން ރައީސަށް ލަފާ އެރުވުމުގެ މަގުސަދުގައި އުފެއްދި ކޮމިޓީއެއްކަމުގައެވެ.
މީގެއިތުރުން، ތަފާތު އެކި ދާއިރާތަކުގައި ޒުވާނުންގެ ކުރިއެރުމަށް ހުރި ހުރަސްތަކާއި ގޮންޖެހުންތައް ދެނެގަނެ، އެކަންކަމާމެދު ފުޅާ ދާއިރާއެއްގައި މަޝްވަރާކޮށް، ޤައުމީ ފެންވަރުގައާއި ސަރަޙައްދީ ފެންވަރުގައި ޙައްލު ހޯދުމަށް މަސައްކަތް ކުރެވޭނެ ގޮތްތަކާ ގުޅޭ ގޮތުން ރައީސަށް ލަފާ އެރުވުން ވެސް މި ކޮމިޓީގެ މަސްއޫލިއްޔަތުތަކުގެ ތެރޭގައި ހިމެނެއެވެ.
ރައީސް އޮފީހުން ބުނީ ޒުވާނުންނާ ގުޅޭ ކަންކަމުގައި ޒުވާނުން ގޮތް ނިންމައި، ޒުވާނުންނަށް މިއަދާއި މާދަމާވެސް ޤައުމުގެ އިސް ސަފުގައި މަސައްކަތް ކުރުމުގެ ފުރުޞަތު ސަރުކާރުން ފަހިކޮށްދޭނެ ކަމަށެވެ. އަދި ޒުވާނުންގެ ކަންބޮޑުވުންތަކަށް ޙައްލު ހޯދައި ހަރުދަނާ ޒުވާނުންގެ ޖީލެއް ބިނާކުރުމަކީ މި ސަރުކާރުގެ މެނިފެސްޓޯގައި ހިމެނި، ޚާއްޞަ އަހައްމިއްޔަތުކަމެއް ދީގެން ކުރަމުން އަންނަ މަސައްކަތެއް ކަމަށްވެސް ރައީސް އޮފީހުން ބުންޏެވެ.
"ޕްރެޒިޑެންޝަލް ޔޫތު އެޑްވައިޒަރސް" ބޯޑު އެކުލަވާލާފައިވަނީ މި އަހަރުގެ ޖެނުއަރީ 18 ގައެވެ. މި ބޯޑުގައި 15 މެންބަރުން ހިމެނޭއިރު، ގިނަ ޒުވާނުންނަށް މި ބޯޑުގައި ބައިވެރިވުމަށް މަގުފަހިކޮށްދިނުމުގެ ގޮތުން ރިޔާސީ ދައުރެއްގައި 2 ފަހަރު ބޯޑު އެކުލަވާލުމަށް ނިންމާފައިވެ އެވެ.
އެ ބޯޑަކީ ރައީސްއަށް ލަފާދިނުމަށް އެކުލަވާލާ ބޯޑަކަށްވުމުން އެ ބޯޑުގެ ސެކްރެޓޭރިއޭޓް ބަލަހައްޓާނީ ޔޫތު މިނިސްޓްރީންނެވެ.