އާސަންދަ ނިޒާމު ރިފޯމުކުރުމަށް ކުރާ މަސައްކަތުގެ ތެރެއިން އަންނަ އޮކްޓޯބަރު މަހުން ފެށިގެން އާސަންދަ ހިދުމަތް ލިބިގެންދާނީ އިތުރު އިންޝުއަރެންސް ސްކީމެއް ނަގާފައިވާނަމަ، އެ ސްކީމަށް ކެނޑުމަށްފަހު ކަމަށް އެންސްޕާގެ ސީއީއޯ، ހީނާ ވަލީދު މިއަދު ވިދާޅުވެއްޖެއެވެ.
ހީނާ މިހެން ވިދާޅުވީ ރައްޔިތުންގެ މަޖިލީހުގެ އިޖުތިމާއީ ކޮމިޓީން މިއަދު ބޭއްވި ބައްދަލުވުމުގައި ޑަބަލް އިންޝުއަރެންސް" ނުވަތަ އެހެން ‘އިންޝުއަރެންސް ސްކީމްތަކުގައި ރަޖިސްޓްރީވެފައިވާ މީހުންނަށް އާސަންދަ ލިބޭތީ އާއި އެކަމާއި ގުޅޭ ގޮތުން އާސަންދައިން ގެންގުޅުއްވާ ސިޔާސަތަކީ ކޮބައިތޯ މަޖިލީހުގެ މެމްބަރަކު ކުރެއްވި ސުވާލަކަށް ޖަވާބު ދެެއްވަމުންނެވެ.
ހީނާ ވިދާޅުވީ އަންނަ އޮކްޓޫބަރުގައި އާސަންދަ ނިޒާމު ރިފޯމުކޮށް، ތަންފީޒު ކުރަން ފެށުމުން ޑަބަލް އިންޝުއަރެންސަސް ކެނޑުމަށްފަހު، އާސަންދައިގެ ބަދަލުގައި އެންމެ ފުރަތަމަ ކަނޑާނީ އެ މީހުންގެ އަތުގައި ހުންނަ އިތުރު އިންޝުއަރެންސް ތަކުން ކަމަށެވެ.
"އަޅުގަނޑުމެން މިހާރު ވެލްފެއާގެ ޕޮލިސީއާއި އާސަންދައިގެ ޕޮލިސީއަށް ބައެއް ކަހަލަ ބަދަލުތަކެއް ގެންނަން އެބަ މަސައްކަތް ކުރަން. ޑްރާފްޓަކެއް މިހާރު އެކުލަވާލެވި، ވަރަށް އަވަހަށް ކެބިނެޓަށް އަޅުގަނޑުމެން ޕޭޕަރު ހުށަހަޅާނަން، އެ ގެންނަ އިސްލާހުތަކާއި އެކީގަ،" ހީނާ ވިދާޅުވިއެވެ.
ހީނާ ވިދާޅުވީ އާސަންދައިގެ ޕޮލިސީއަށް ގެންނަ ބަދަލު ތަކުގެ ޑްރާފްޓްތަކެއް ވަރަށް އަވަހަށް ކެބިނެޓަށް ހުށަހަޅާނެ ކަމަށާއި، މިއީ އެންމެ ބޮޑަށް ބޭނުންވާ މީހުންނަށް އެންމެ ބޮޑު އެހީތެރިކަމެއް ދެވޭނެ ގޮތަކަށް ނިޒާމު ބަދަލުކުރުމަށް ކުރާ މަސައްކަތުގެ ދަށުން ގެންނަ ބަދަލުތަކެއް ކަމަށެވެ.