އިއްޔެއިން ފެށިގެން ރާއްޖޭގެ އެކިހިސާބުތަކަށް ކުރަމުންދާ ވިއްސާރާގައި، ހިއްކުމަށް ފަސޭހަނުވާ ވަރަށް ފެންބޮޑުވަމުންދާތީވެ، ގެތަކުން މަގުމައްޗަށް ކުނި ނުނެރުމަށް ވެމްކޯއިން އިލްތިމާސްކޮށްފިއެވެ.
މިކަން ހާމަކޮށްފައިވަނީ ވެމްކޯއިން ނެރުނު ބަޔާނެއްގައެވެ. އެބަޔާނުގައި، ރާއްޖެއަށް ކުރަމުންދާ ވިއްސާރައާއި ގުޅިގެން ދިމާވަމުންދާ ދަތިތަކާއިއެކު އެކުންފުނިން ފޯރުކޮށްދެމުންދާ ހިދުމަތްތަކަށް ބުރޫ ނާރާނެހެން ހިދުމަތް ދިނުމަށް މަަސައްކަތް ކުރަމުން އަންނަކަން ފާހަގަކުރުމާއެކު ވެމްކޯއިން އެދުނީ މި ހާލަތުގައި ގޭބިސީތަކާއި ވިޔަފާރިތަކުން ކުނި ނެރުމުގައި ހާއްސަ ސަމާލުކަމެއް ދެއްވުމަށެވެ.
އެހެންކަމުން ކުނި ނެރުމަށް ކަނޑައެޅިފައިވާ ގަޑިތަކުގައި ފަސޭހައިން ކުނި ނެގޭނެ ގޮތަށް ބެހެއްޓުމަށާއި މަގުމައްޗަށް ކުނި ނުނެރުމަށް ވެމްކޯއިން ވަނީ އެދިފައެވެ. ހަމައެހެންމެ ކުނި ނުނެގި ހުރިނަމަ، އެކޯޕަރޭޝަންގެ ހޮޓްލައި 1666 އަށް ގުޅައި އެކަން ރިޕޯޓް ކުރުމަށް ވެސް ވަނީ އަންގާފައެވެ.
އަދިވެސް އިތުރަށް ވެމްކޯގެ ބަޔާނުގައި ޓްރާސްފަރ ސްޓޭޝަންތަކުން ހިދުމަތް ހޯއްދަވާއިރު، އެންމެހައި ފަރާތްތަކުގެ ސަލާމަތާއި ރައްކާތެރިކަން ކށަވަރުކުރުމަށްޓަކައި، އެކޯޕަރޭޝަންގެ މުވައްޒަފުންގެ އިރުޝާދުތަކަށް ސަމާލުވުމަށް ވެސް ވަނީ އަންގާފައެވެ.
ވެމްކޯއިން ވަނީ މިހާލަތުގައި ރައްޔިތުންނަށް ކުރިމަތިވެދާނެ ދަތިތަކަށް މާފަށް އެދުމާއެކު ރައްޔިތުންގެ ފަރާތުން ލިބެމުންދާ އެއްބާރުލުން ފާހަގަކޮށް ވަނީ ޝުކުރު އަދާކޮށްފައެވެ.
ރާއްޖެއަށް ކުރަމުން އަންނަ ވިއްސާރާގައި މާލެ ސަރަހައްދު ހިމެނޭހެން ބައެއް ރަށްތަކުގައި ފެންބޮޑުވެފައިވާތީ، ކަމާބެހޭ އިދާރާތަކުން ވަނީ ފެން ހިންދުމުގެ މަސައްކަތް ދަނީ ކުރަމުންނެވެ. އެހެންނަމަވެސް އަދިވެސް މަގުތަކުގައި ފެންގަނޑު ގަނޑު ހެދިފައިވާ އިރު ބައެއް ގޭގެއަށް ފެން ވަނުމުގެ މައްސަލަވެސް ދަނީ ކުރިމަތިވަމުންނެވެ.