ދިވެހިރާއްޖޭގައި "ހެދިކާ" ގެ ނަމުން މަޝްހޫރު ހަވީރު ސައިގެ އާދަކާދައަކީ ދިވެހިންގެ މެދުގައި ވަރަށް މަގުބޫލު ސަގާފީ އާދައެކެވެ. މި ލޯބި ލޮބުވެތި އާދައަކީ ދިވެހިންގެ ދިރިއުޅުމާއި ސަގާފަތުގައި ވަރަށް ފުންކޮށް އަށަގެންފައިވާ، އާއިލާތަކާއި އަވަށްޓެރިންނާއި ރައްޓެހިން އެއްތަނަކަށް ޖަމާކޮށް، އުފާވެރިކަމާއެކު ލުއި ކާނާއާއި ބުއިންތަކާއެކު ނޭނގި ނަމަވެސް ފަހަށް ރައްކާކުރެވޭ ހަނދާންތަކެއް ލިބޭ ވަގުތަކަށް ވާއިރު މިގަޑީގައި ހިއްސާ ކުރެވޭ ވާހަކަތަކާއި ބަދަލުކުރެވޭ ހިޔާލުތަކާއެކު މުހިންމުކަންކަމުގެ ނިންމުންތައްވެސް ނިންމާ ވަގުތަކަށް ވެފައިވާ ހަވީރުގެ ސައިގަޑި އަކީ އަދިވެސް މިއަދުވެސް ގިނަގޭގޭގައި ބަދަލުނުވެ ކުރިއަށްދާ އާދައެކެވެ. ބައެއް ބިޒީ ޝެޑިއުލްގައި ދިރިއުޅޭ އާއިލާތަކަށް ލިބޭ ހަމައެންމެ ހުސް ވަގުތަކީ މިއީ ކަމަށްވެފައިވާއިރު ބައެއް އާއިލާތަކަށް މި ލިޔުމުގައި މި ލޯބިވެވޭ އާދައާ ބެހޭ ތަފްސީލީ މަޢުލޫމާތު ހިމަނާފައިވާނެއެވެ.
ދިވެހިރާއްޖޭގައި ހަވީރު ސައި ބުއިމުގެ އާދަކާދައަކީ ގަރުނުތަކެއް ކުރިން ފެށިގެން އައިސްފައިވާ ސަގާފަތެކެވެ. މި ސަގާފަތް ވުޖޫދަށް އައިސްފައިވަނީ ރާއްޖޭގެ މުއްސަނދި ވިޔަފާރީގެ ތާރީހާއި، އަރަބި، އިންޑިއާ އަދި ދެކުނު އޭޝިއާގެ ވިޔަފާރިވެރިންނާއެކު ކުރެވުނު ސަގާފީ ބަދަލުތަކުގެ ނަތީޖާއެއްގެ ގޮތުންނެވެ. މި މުއާމަލާތްތަކުގެ ސަބަބުން ރާއްޖޭގެ އަމިއްލަ ކާނާތަކާއި އެހެނިހެން ގައުމުތަކުގެ ކެއުމުގެ އާދަތައް އެއްކުރެވި، ވަކި ހާއްސަ ބާވަތްތަކެއް ވަނީ އުފެދިގެން އައިސްފައެވެ.
ރުކުމާ، ހެންވޭރު ދެކުނު އަންހެން ކަނބަލުންނާއެކު ހަވީރުގެ ސައި، ހަވީރުސައި؛މިފަދަ ގުޅުންތައްވެސް ބަދަހިކޮށްދޭ…….ފޮޓޯ:އެކްސް،ރުކުމާ
އާންމު ގޮތެއްގައި ހަވީރު ސައި ބޯ ވަގުތަކީ ހަވީރު 4:00 އާއި 6:00 އާ ދެމެދުގެ ވަގުތެވެ. މިއީ ދުވަހުގެ މަސައްކަތްތައް ނިންމާލުމަށްފަހު، އަރާމުކޮށް، އިޖުތިމާއީ ގުޅުންތައް ބަދަހިކުރުމަށް ހޭދަކުރާ ވަގުތެކެވެ. ގިނަ ފަހަރު އާއިލާތައް ގޭގައި އެއްވެ ހަވީރު ސައި ބޯއިރު، ރައްޓެހިން "ސައި ހޮޓާ" ގެ ނަމުން މަޝްހޫރު ރަށްރަށުގެ ކުދި ސައި ފިހާރަތަކުގައި ބައްދަލުކޮށް ހަވީރު ސައި ބޯ މަންޒަރު ފެނެއެވެ.
ހަވީރު ސައި: ދިވެހިންގެ އާދަކާދައިގެ މުހިންމު ބައެއް ހަވީރު ސަޔަކީ ދިވެހިންގެ ދިރިއުޅުމުގައި ފާހަގަކޮށްލެވޭ އިޖުތިމާއީ އަދި ސަގާފީ ކަމެކެވެ.
ހަވީރު ސައިގެ ސުފުރާމަތީގައި އާންމުކޮށް ހިމެނެނީ ތަފާތު ފޮނި އަދި ލޮނު މީރު ލުއި ކާނާއެވެ. އޭގެ ތެރޭގައި ހިމެނޭ މަޝްހޫރު ބާވަތްތަކަކީ:
- ބަޖިޔާ: މިއީ މަސް ހަނާކޮށްފައި ތައްޔާރުކުރާ ބާވަތެކެވެ. ބަޖިޔާ މަސްގަނޑުގައި ކުޑަކުޑަ ފޮނިރަހައެއްވެސް އެކުލެވެއެވެ.
- ގުޅަ: ފުށްގުޅަތަަކަކަށް މަސްހުނި އަޅާފައި ތެލުލާފައި ހުންނައިރު މީގެ ހަނޑުލުފުށުން ހަނާކުރިމަހުގައި ތައްޔާރުކުރާ ހަނޑުލުގުޅައަކީވެސް ނުހަނު މީރު ބާވަތެކެވެ.
- ކީމިއާ: މިއީވެސް މަހާއި ފުށުން ތައްޔާރުުރާ ބާވަތެއް، އިތުރަށް އަލުވި އަޅައެވެ.
- މަސްރޮށި: މަސްހުނި ބޭނުން ކޮށްގެން ތައްޔާރުކޮށް ފިހެފައި އޮންނަ ރޮށްޓެކެވެ.
- ކުޅި ބޯކިބާ: ހަނޑޫ ހިމުންކޮށް ފުނޑާފައި ފިޔާ، މަސް، މިރުސް، ހިކަދިފަތް ބޭނުންކޮށްގެން އަޅާ ކުޅިކޭކެކެވެ،
- ފޮނި ބޯކިބާ: ހަނޑޫ ފުށާއި ކާށިކިރު ބޭނުންކޮށްގެން ތައްޔާރުކުރާ ފޮނި ކޭކެކެވެ.
- ހުނި ހަކުރު ފޮޅި: ގަނބުޅި އަދި ހަކުރު ބޭނުންކޮށްގެން ތައްޔާރުކުރާ ފޮނި ފޮޅިއެެކެެވެ.
ފޮޓޯ: މާޝާސް
ބަދަލު ވަމުން އަންނަ ޒަމާނާއެކު މިބާވަތްތަކަށް ބާގަރ، ޕިއްޒާ، ޕިއްޒާރޯލްސް، ޕުޑިންފޮޅި، މިހެން ގޮސް އެތައް ތަފާތު ބާވަތްތައް އިތުރުވެފައިވެއެވެ،
ބުއިންތަކުގެ ތެރޭގައި އާންމުކޮށް ހުންނަ، އަދި ބަދަލެއް ނާންނަ ބުއިމަކީ ކަޅު ސަޔާއި ކިރު ސަޔެވެ. މިއީ ހަވީރުގެ ހެދިކާއާއެކު އެންމެ ކަމުދާ ބުއިމެވެ. މިހާރު ބަދަލުވަމުންދާ އާދަކާދައާއި އިތުރުުވަމުން އަންނަ ބުއިންތަކުގެ ތެރޭގައި އިނގުރު، ކަރަންފޫ އަދި ކާފޫރުތޮޅި ފަދަ ރަހަލާ ތަކެތި ހިމެނައިގެން ތައްޔާރު ކުރާ "ސްޕައިސްޑް ޓީ" އާއި އެކިކަހަަލަ ޖޫސްވެސް ހުރެއެވެ.
ހަވީރު ސައިއަކީ ހަމައެކަނި ކެއުމެއް ނޫނެވެ. މިއީ މުޖުތަމައުގެ ގުޅުންތައް ބަދަހިކޮށްދޭ އިޖުތިމާއީ އާދަކާދައެކެވެ. މުޖުތަމައުގެ ގުޅުންތައް ވަރުގަދަކޮށްދޭ އިޖުތިމާއީ "ރިޗުއަލް"އެކެވެ. އެއީ ދުވަހުގެ ހަރަކާތްތަކާ ގުޅިގެން ވާހަކަތައް ހިއްސާކުރުމާއި، އެކަކު އަނެކެއްގެ އެކުވެރިކަމުގެ އުފާ ހޯދުމުގެ ފުރުސަތު ލިބިގެންދާ ކަމެކެވެ. މީގެ ސަބަބުން ދިވެހި ސަގާފަތުގެ މެހެމާންދާރީގެ ފުރިހަމަކަން ހާމަކޮށްދެއެވެ..
ހަވީރުސައި، ހެދިކާގެ ބާވަތްތަކާއެކު
ދިވެހިރާއްޖޭގައި ހަވީރު ސައި އަކީ ސަގާފަތާއި ސަގާފަތާއި މުޖުތަމައުގެ ރީތި ގުޅުންތަކެއް އެކުލެވިގެންވާ ކަމެކެވެ. ދިވެހިންގެ ދިރިއުޅުމުގައި އިޖުތިމާޢީ ގުޅުންތަކުގެ މުހިންމުކަން ދައްކުވައިދޭ ވަގުތެކެވެ. ގޭގައި އުފާކުރިޔަސް ނުވަތަ ލޯކަލް ކެފޭއެއްގައި އުފާކުރިޔަސް މި ޢަމަލަކީ ދިވެހީންގެ ދުވަހުގެ، ދިރިއުޅުމުގެ އެންމެ ލޯބިވާ، ލޮބުވެތި އެއް ބައެވެ. ހަނދާންތަކާއި ގުޅުންތަކުގެ ހާއްސަކަން ފޮރުވިފައިވާ އަގުހުރި ވަގުތެކެވެ.