ލޭނު މަސްވެރިކަމުގެ ޑްރާފްޓް ގަވާއިދުގައި މަސްވެރިކަން މޮނިޓަރކޮށް ކޮންޓްރޯލްކުރުމަށް އަޅާނެ ފިޔަވަޅުތައް ކަނޑައަޅައިފިއެވެ. މިކަން ހާމަކޮށްފައިވަނީ މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިންނެވެ.
މި ގަވާއިދުގެ ދަށުން، ލައިސަންސް ލިބިގެން މަސްވެރިކަންކުރާ އުޅަނދުފަހަރުން މަސް ރިޕޯޓު ނުވަތަ ލޮގް ފޮތުގެ މަޢުލޫމާތު ރިކޯޑުކޮށް މިނިސްޓްރީއަށް ފޮނުވަންޖެހޭނެއެވެ. އަދި މަސްދަތުރަކަށް ފުރުމުގެ 48 ގަޑިއިރު ކުރިން "ޑިޕާރޗަރ ކްލިއަރެންސް ފޯމް" ފުރުމަށްފަހު މިނިސްޓްރީއަށް ހުށަހަޅަންވާނެއެވެ.
މީގެ އިތުރުން، ލޭނު އަޅާ ކޮންމެ އުޅަނދެއްގައި ވެސަލް މޮނިޓަރިންގ ސިސްޓަމް (ވީ.އެމް.އެސް) އެއް ޤާއިމުކޮށްފައި ހުންނަންޖެހޭނެއެވެ. މި ސިސްޓަމް އަބަދުވެސް ހުޅުވިފައި ހުންނަންވާނެ ކަމަށާއި، މިނިސްޓްރީގެ ހުއްދަ ނެތި ނިއްވާލައިގެން ނުވާނެ ކަމަށް ގަވާއިދުގައި ބަޔާންކޮށްފައިވެއެވެ.
މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން މި ފިޔަވަޅުތައް އަޅަނީ ލޭނު މަސްވެރިކަން ހަރުދަނާކޮށް، ދެމެހެއްޓެނިވި ގޮތެއްގައި މި މަސްވެރިކަން ކުރިއަށް ގެންދިއުމަށްޓަކައި ކަމަށް ބެލެވެއެވެ. މި ގަވާއިދަށް ޢަމަލުކުރަން ފަށާނެ ތާރީޚެއް އަދި އިޢުލާނުކޮށްފައެއް ނުވެއެވެ.
ލޭނު އަޅާ އުޅަނގައި ހަރުކުރާ ވެސަލް މޮނިޓަރިންގ ސިސްޓަމް (ވީ.އެމް.އެސް) އާ ގުޅޭ ކަންކަން
- (ހ) މިގަވާއިދުގެ ދަށުން އެހެން ގޮތަކަށް ކަނޑަނާޅާހާ ހިނދަކު، ލޭނު މަސްވެރިކަން ކުރުމަށް ލައިސަންސްއަށް އެދޭ ކޮންމެ އުޅަނދެއްގައި މިނިސްޓްރީން ކަނޑައަޅާ މިންގަނޑަށް ފެތޭ [ވެސަލް މޮނިޓަރިންގ ސިސްޓަމް] އެއް ޤާއިމުކޮށްފައި ހުންނަންވާނެއެވެ.
- (ށ) މިމާއްދާގެ (ހ) ގެ ދަށުން އުޅަނދުގައި ހަރުކޮށްފައިވާ [ވެސަލް މޮނިޓަރިންގ ސިސްޓަމް] ހުންނަންވާނީ، އަބަދުވެސް ހުޅުވާފަ ("އޮން" ކޮށްފަ) އެވެ.
- (ނ) މިނިސްޓްރީއަށް ލިޔުމުން އަންގައި ހުއްދަ ލިބިގެންމެނުވީ ވެސަލް މޮނިޓަރިންގ ސިސްޓަމް ނިއްވާލައިގެން ނުވާނެއެވެ.
- (ރ) އުޅަނދު މަސްވެރި ދަތުރަށް ފުރުމުގެ ކުރިން، އެ އުޅަނދުގެ ވީ.އެމް.އެސް ފުރިހަމައަށް މަސައްކަތްކުރާކަން އުޅަނދުގެ މާސްޓަރ އަދި އޮޕަރޭޓަރު ޔަޤީންކުރަންވާނެއެވެ.
- (ބ) މަސްވެރިކަން ކުރުމަށް ލައިސަންސް ދޫކޮށްފައިވާ އުޅަނދެއްގައި ހަރުކޮށްފައި ހުންނަ ވީ.އެމް.އެސް، އެއްވެސް ސަބަބަކާހުރެ ނިވިއްޖެނަމަ، ނުވަތަ މިނިސްޓްރީއަށް އެ އުޅަނދުގެ ޕޮޒިޝަން ނުފެންނަކަމަށް މިނިސްޓްރީން އުޅަނދަށް އަންގައިފިނަމަ، އުޅަނދު އޮތް ސަރަޙައްދު (ޠޫލު، ޢަރުޟު ވަކިން އެނގޭނެހެން)، އުޅަނދުގެ ދުވެއްޔާއި އުޅަނދުގެ ޙަރަކާތުގެ މަޢުލޫމާތު ކޮންމެ 4 (ހަތަރެއް) ގަޑިއިރަކުން މިނިސްޓްރީން ކަނޑައަޅާ ސެންޓަރަކަށް ލިޔުމުން ފޮނުވަންވާނެއެވެ.
- (ޅ) ލޭނު މަސްވެރިކަން ކުރުމަށް ލައިސަންސް ދޫކޮށްފައިވާ އުޅަނދެއްގައި ހަރުކޮށްފައި ހުންނަ "ވެސަލް ލޮކޭޓިންގް ޑިވައިސް"، އެއްވެސް ސަބަބަކާހުރެ ނިވިއްޖެނަމަ، ނުވަތަ މިނިސްޓްރީގައި ހުންނަ ވީ.އެމް.އެސް އިން އެ އުޅަނދުގެ ޕޮޒިޝަން ނުފެންނަކަމަށް ލައިސަންސްދޭ މުއްދަތުގެ ތެރޭގައި 2 (ދޭއް) ފަހަރު ރިޕޯޓުކޮށްފައިވާނަމަ، އެ އުޅަނދުގެ ވެސަލް ލޮކޭޓިންގް ޑިވައިސްއަށް ދިމާވެފައިވާ މައްސަލަ ބަލައި ތަޙުޤީޤު ކުރަންވާނެ