ޑޮމެސްޓިކް އެއަރޕޯޓުތަކުގެ އެމަރޖެންސީ ހާލަތްތަކުގައި އެހީތެރިކަން ފޯރުކޮށްދިނުމަށް ރީޖަނަލް އެއަރޕޯޓްސް ކޮމްޕެނީ (އާރް.އޭ.ސީ.އެލް) އާއި މޯލްޑިވްސް ޕޯޓްސް ލިމިޓެޑް (އެމް.ޕީ.އެލް) އާ ދެމެދު އެއްބަސްވުމެއްގައި ސޮއިކޮށްފި.
މި އެއްބަސްވުމުގައި ސޮއިކޮށްފައިވަނީ މިއަދުއެވެ. މި އެއްބަސްވުމުގައި އާރް.އޭ.ސީ.އެލްގެ ފަރާތުން އެ ކުންފުނީގެ ޑިރެކްޓަރ އަޙްމަދު މުބީން ސޮއިކޮށްފައިވާއިރު އެމް.ޕީ.އެލްގެ ފަރާތުން ސޮއިކުރެއްވީ އެ ކުންފުނީގެ ޗީފް އެގްޒެކެޓިވް އޮފިސަރ މުޙައްމަދު ވަޖީހު އަބްރާހީމެވެ.
މި އެއްބަސްވުމުގެ ދަށުން އެއާޕޯޓްތަކަށް ދިމާވެދާނެ ކުއްލި ހާލަތްތަކުގައި އެމް.ޕީ.އެލްގެ އެހީތެރިކަން އާރް.އޭ.ސީ.އެލް އަށް ލިބިގެންދާނެއެވެ. އަދި މި އެއްބަސް ވުން ވެގެންދާނީ އެއާޕޯޓްތަކުގެ ޚިދުމަތްތައް މުޅި ރާއްޖެއަށް އަވަހަށް އަދި ހަރުދަނާކޮށް ފޯރުކޮށްދިނުމަށް މަގުފަހިކުރާނެ އެއްބަސްވުމަކަށެވެ. މި އެއްބަސްވުމުގެ ސަބަބުން، ރާއްޖޭގެ އެކި ކަންކޮޅުތަކުގައި ހުރި އެއަރޕޯޓްތަކަށް ދިމާވެދާނެ އެމަރޖެންސީ ހާލަތްތަކުގައި އަވަސް އަދި ހަރުދަނާ ގޮތެއްގައި އެހީތެރިކަން ފޯރުކޮށްދެވޭނެއެވެ. އަދި މިއީ ރާއްޖޭގެ ވައިގެ ދަތުރުފަތުރުގެ ނިޒާމު އިތުރަށް ހަރުދަނާކުރުމަށް އެޅޭ މުހިންމު ފިޔަވަޅެއްކެވެ.
އާރް.އޭ.ސީ.އެލް އަކީ ރާއްޖޭގައި އެންމެ ގިނަ ޑޮމެސްޓިކް އެއަރޕޯޓް އޮޕަރޭޓް ކުރާ ކުންފުންޏެވެ.
ޑޮމެސްޓިކް އެއާޕޯޓުތަކުގެ އެމަޖެންސީ ހާލަތްތަކުގައި އެހީތެރިކަން ފޯރުކޮށްދިނުމާ ގުޅޭ އެއްބަސްވުމެއްގައި ސޮއި ކޮށްފި
