ކައިވެނި ހަރާމް (މަހުރަމު) އަންހެނަކާއެކު ޖިންސީ އަމަލެއް ހިންގަން އުޅުނު މީހަކަށް 7 އަހަރުގެ ޖަލު ހުކުމެއް ކޮށްފިއެވެ.
މިދިޔަ ބުރާސްފަތި ދުވަހު ކްރިމިނަލް ކޯޓުން ކުރި ހުކުމުގައި ބުނެފައި ވަނީ ޖިންސީ ކުށުގެ ގާނޫނުގެ 22 ވަނަ މާއްދާގެ (ހ) ގައި ބަޔާންކޮށްފައިވާ މަހުރަމަކާއެކު ޖިންސީ އަމަލު ހިންގަން އުޅުނު ކަމުގެ ކުށް ގ. ޢަރޫޝާމަންޒިލް، ޙަސަން ރަޝީދުގެ މައްޗަށް ސާބިތުވާ ކަމަށެވެ.
މި ކުށުގެ އުގޫބާތެއްގެ ގޮތުން، ޖިންސީ ކުށުގެ ޤާނޫނުގެ 22 ވަނަ މާއްދާގެ (ށ) ގެ ދަށުން، ޙަސަން ރަޝީދު 7 އަހަރު ދުވަހުގެ މުއްދަތަކަށް ޖަލަށްލުމަށް ކުރިމިނަލް ކޯޓުން ވަނީ ހުކުމްކޮށްފައެވެ.
ޖިނާއީ އިޖުރާއަތުގެ ގާނޫނުގެ 186 ވަނަ މާއްދާއާ ހަވާލާދީ މި މައްސަލައާ ގުޅިގެން ހުކުމެއް ކުރުމުގެ ކުރިން ޙަސަން ރަޝީދު ބަންދުގައި ހޭދަކުރި މުއްދަތު، ޙަސަން ރަޝީދު މައްޗަށް ކަނޑައެޅުނު ޖަލު އަދަބުން ވަނީ އުނިކޮށްފައެވެ.