ފުވައްމުލަކު ސިޓީގެ ރަށް ގިރާ ސަރަހައްދު މިނިސްޓަރ ޠާރިޤު ބައްލަވާލައްވައިފިއެވެ.
މޫސުމީ ބަދަލުތަކާއި ތިމާވެށްޓާއި ހަކަތައާ ބެހޭ ވުޒާރާ މިނިސްޓަރ މުޙައްމަދު ޠާރިޤު، ފުވައްމުލަކު ސިޓީއަށް ކުރައްވަމުންދާ ރަސްމީ ދަތުރުފުޅުގައި އެ ސިޓީގެ ރަށް ގިރާ ސަރަހައްދަށް ޒިޔާރަތްކުރައްވައި ބައްލަވާލައްވައިފިއެވެ.
މިއަދު ހެނދުނު މިނިސްޓަރ ޠާރިޤު އެންމެ ފުރަތަމަ ކަމަކަށް ވެސް ކުރެއްވީ ރަށް ގިރާ ސަރަހައްދުތަކަށް ޒިޔާރަތްކުރެއްވުމެވެ. މި ދަތުރުފުޅުގައި މިނިސްޓަރާއެކު ފުވައްމުލަކު ސިޓީ ކައުންސިލްގެ މޭޔަރ އިސްމާޢީލް ރަފީޤު އަދި ކައުންސިލްގެ އެހެނިހެން މެންބަރުން ވެސް ބައިވެރިވެވަޑައިގެންނެވިއެވެ.
ރަށް ގިރާ ސަރަހައްދުތަކަށް ޒިޔާރަތްކުރެއްވުމަށްފަހު މިނިސްޓަރ ވިދާޅުވީ، ފުވައްމުލަކުގެ ރަށް ގިރުމުގެ މައްސަލައަށް އަވަސް ހައްލެއް ހޯދުމަށް ސަރުކާރުން މަސައްކަތް ކުރައްވާނެ ކަމަށެވެ. އަދި މި ކަމަށް ބޭނުންވާ ފަންޑު ހޯދުމަށް މަސައްކަތް ކުރައްވަމުންދާ ކަމަށް ވެސް އެ މަނިކުފާނު ވިދާޅުވިއެވެ.
މިނިސްޓަރގެ މި ދަތުރުފުޅުގައި ފުވައްމުލަކު ސިޓީގައި ކުރިއަށްދާ އެހެނިހެން ތަރައްޤީގެ މަޝްރޫޢުތައް ވެސް ބައްލަވާލައްވާނެ ކަމަށް މަޢުލޫމާތު ދެއްވާފައިވެއެވެ.