ރާއްޖޭގެ ބޭރު ފައިސާގެ ރިޒާވް އިތުރުކުރުމުގެ މަސައްކަތުގެ ތެރެއިން، ޑޮލަރުން އާމްދަނީ ލިބޭ ކުންފުނިތަކުން އިންކަމް ޓެކްސް، ޕެންޝަން ފައިސާ އަދި ކަސްޓަމްސް ޑިއުޓީ ޑޮލަރުން ދެއްކުން ލާޒިމްކުރުމަށް ކެބިނެޓުން ނިންމައިފިއެވެ.
މިއަދު ރައީސް އޮފީހުގައި ބޭއްވުނު ނޫސްވެރިންގެ ބައްދަލުވުމެއްގައި ވާހަކަދައްކަވަމުން، އެޓަރނީ ޖެނެރަލް އަޙްމަދު އުޝާމް ވިދާޅުވީ ޑޮލަރުން އާމްދަނީ ލިބޭ ކުންފުނިތަކުގެ އާމްދަނީ ޓެކްސް އަދި އިމްޕޯޓް ޑިއުޓީ ޑޮލަރުން ދެއްކުމަށް ކެބިނެޓުން ނިންމާފައިވާ ކަމަށެވެ. އަދި މުސާރަ ޑޮލަރުން ދޭ ކުންފުނިތަކުން ޕެންޝަން ފައިސާވެސް ޑޮލަރުން ދެއްކުން ލާޒިމްކުރުމަށް ޕެންޝަން ޤާނޫނަށް އިޞްލާޙު ގެނެވޭނެ ކަމަށްވެސް އޭނާ ވިދާޅުވިއެވެ.
“މައިގަނޑު ގޮތެއްގައި އަޅުގަނޑުމެންނަށް، މިއަދު ކެބިނެޓުން ނިންމެވީ އަޅުގަނޑުމެންނަށް ޑޮލަރުން އާމްދަނީ ލިބޭ، ޑޮލަރުން އާމްދަނީ ލިބޭ ކުންފުނިތަކުން ދައުލަތަށް ދައްކަނީ، އެކަމަކު މިހާރު ބައެއް ހާލަތްތަކުގައި ރުފިޔާއިން ދައްކަނީ. އެއީ ޑޮލަރުން އާމްދަނީ ލިބޭ ކުންފުނިތަކުން ދިވެހިރާއްޖެއަށް، މީރާއަށް އަދި ދައުލަތަށް ދައްކަންޖެހޭ ފައިސާ އޭގެ ފަހުން ޑޮލަރުން ދައްކަންޖެހޭނެ ކަމަށް އަޅުގަނޑުމެން ނިންމާނަން،” އުޝާމް ވިދާޅުވިއެވެ.
ކެބިނެޓުގެ މި ނިންމުން އައިސްފައިވަނީ މިއަދުން ފެށިގެން ބޭންކުން ދޫކޮށްފައިވާ ޑެބިޓް ކާޑުތަކުން ބޭރަށް ކުރެވޭ މުޢާމަލާތްތަކުގެ ޑޮލަރު ލިމިޓް ކުޑަކުރުމަށް ނިންމި ނިންމުމާ ގުޅިގެން ބޭންކާއި ސަރުކާރަށް ފާޑުކިޔުންތައް އަމާޒުވަމުންދާ ދަނޑިވަޅެއްގައެވެ.
މިއަދު ބޭއްވުނު ނޫސްވެރިންގެ ބައްދަލުވުމުގައި މާލީ ވަޒީރު މުޙައްމަދު ޝަފީޤު ވިދާޅުވީ، ރާއްޖެއަށް ލިބޭ ޑޮލަރު އިތުރުކުރުމުގެ މަސައްކަތުގެ ތެރެއިން، ރާއްޖޭގައި ޑޮލަރު އުފެއްދުން އިތުރުކުރުމަށް މަސައްކަތްތަކެއް ކުރަމުންދާ ކަމަށެވެ.