އަގްސާ މިސްކިތުގައި ފައްޅި އެޅުމަށް ގޮވާލުން ރާއްޖެއިން ކުށްވެރިކޮށްފިއެވެ.
އަގްސާ މިސްކިތުގައި ފައްޅި އެޅުމަށް ގޮވާލުން ކުށްވެރިކޮށް ރާއްޖޭގެ ފޮރިން މިނިސްޓްރީ އިން ބަޔާނެއް ނެރެފައިވެއެވެ. މި ބަޔާނުގައި މުގައްދަސް މިސްކިތެއްގެ އިތުރުން އިސްލާމީ ތާރީހުގެ މުހިއްމު ރަމްޒެއް ކަމަށާއި ވުމާއެކު ބައިނަލްއަގުވާމީ ގާނޫނުތަކާއި އދ.ގެ މުއާހަދާތަކާ އެއްގޮތަށް، އަގްސާ މިސްކިތުގެ ތާރީހީ އަދި ގާނޫނީ ހައިސިއްޔަތަށް އިހުތިރާމު ކުރުމަށް ގޮވާލާފައިވެއެވެ.
މިފަދަ ކަންކަމަށް ގޮވާލުމުން ގާޒާގައި ހިނގަމުން ގަތުލުއާންމު ހުއްޓާލަން ކުރެވޭ މަސައްކަތަށް ހުރަސްއެޅޭނެ ކަމަށާއި އަދި އިތުރު ހަމަނުޖެހުންތައް އުފެދުމުގެ ފުރުސަތު ބޮޑުވާނެ ކަމަށާއި ގުދުސް އާއި އެތަނުގައިވާ މުގައްދަސް ބިނާތަކުގެ ގާނޫނީ ހައިސިއްޔަތު ބަދަލުވެދާނެ ފަދަ އެއްވެސް އަމަލެއް ވީހާ އަވަހަކަށް ހުއްޓުވައި ފަލަސްތީނުގެ ރައްޔިތުންގެ ހައްގުތައް ހިމާޔަތްކުރަން އަޅަން ޖެހުނު ފިޔަވަޅުތައް އެޅުމަށް ވެސް އެ ބަޔާނުގައި ރާއްޖެއިން ގޮވާލާފައިވެއެވެ.
މީގެ އިތުރުން ރާއްޖެއިން އަބަދު ވެސް ވަނީ ފަލަސްތީނުގެ ރައްޔިތުންނާ އެކުގައި ކަމަށާއި، އިރުމަތީ ގުދުސް އަކީ ފަލަސްތީނުގެ ވެރިކަން ކުރާ ރަށުގެ ގޮތުގައި ހިމެނޭހެން 1967ގެ ބޯޑަރުތަކާ އެއްގޮތަށް ފަލަސްތީނުގައި ވަކި ދައުލަތެއް ގާއިމްކުރަން ވަކާލާތުކުރުމުގައި ރާއްޖެ ދެމިއޮންނާނެ ކަމަށް ވެސް އެ ބަޔާނުގައި ބުނެދައިވެއެވެ.
އަގްސާ މިސްކިތުގައި ފައްޅިއެއް އަޅަން ގޮވާލީ އިޒްރޭލުގެ ނެޝަނަލް ސެކިއުރިޓީ މިނިސްޓަރު އިޓްމާރު ބިން-ގްވިރް އިޒްރޭލުގެ އާމީ ރޭޑިއޯއަށް ދިން އިންޓަވިއުއެއްގަ އެވެ.
އެ މިސްކިތުގައި ނަމާދު ކުރަން ހުރަސް އަޅާ ހަމަނުޖެހުން އަބަދުވެސް އިޒްރޭލުން ހިންގައެވެ.
މަސްޖިދުލް އަގްސާ އަކީ މުސްލިމުންގެ ފުރަތަމަ ގިބްލައެވެ. މި ތަނަކީ އަގްސާ މިސްކިތަކީ ދީނީ ގޮތުންނާއި ތާރީހީ ގޮތުން ވެސް މުސްލިމުންނަށް ވަރަށް މުހިއްމު ބިނާއެކެވެ،