މި ޕްރޮގްރާމްގެ ދަށުން، ޖޫން 5 ގައި ތުލުސްދޫގައި ގަސް އިންދުމުގެ ހަރަކާތް ފެށި، 33 ރަށެއްގައި އެއްފަހަރާ ގަސް އިންދަން ފެށިއެވެ. އެ ދުވަހު 21,007 ގަސް އިންދުނެވެ. އޭގެ ތެރޭގައި ދިވެހި ރުކާއި، ކިނބިގަހާއި، ދިއްގާގަހާއި، ހިރުނދުގަހާއި އޮފި އެލޭ ގަސްތައް ހިމެނެއެވެ. އަދި ޖޫން 12 ގައި ކ. ދިއްފުށީގައި 1,000 ގަސް އިންދި، ޖޫން 24 ގައި ސްޓެލްކޯ ހިދުމަތްދޭ ހުރިހާ ރަށެއްގައި 8,364 ގަސް އިންދުނެވެ.
މިހާތަނަށް ޖުމްލަ 30,371 ގަސް އިންދާފައިވާ ކަމަށް ސްޓެލްކޯއިން ބުނެއެވެ. އަދި ކުރިއަށް އޮތްތަނުގައި، ސްޓެލްކޯއިން ހިދުމަތްދޭ ރަށްރަށުގައި މަހަކު އެއްފަހަރު ގަސް އިންދުމުގެ ހަރަކާތް ބޭއްވުމަށް ރޭވިފައިވާ ކަމަށްވެސް އެ ކުންފުނިން މައުލޫމާތު ދީފައިވެއެވެ.
ފަސް މިލިއަން ގަސް އިންދުމަކީ ރައީސް ޑރ މުހައްމަދު މުއިއްޒުގެ ސަރުކާރުގެ މުހިންމު ރިޔާސީ ވައުދެއްކަން ފާހަގަ ކޮށްލެވެއެވެ. މި ވަޢުދު ފުއްދުމަށް ސްޓެލްކޯއިން ކުރަމުންދާ މަސައްކަތަކީ ތިމާވެށި ހިމާޔަތްކޮށް، ދެމެހެއްޓެނިވި ގޮތެއްގައި ތަރައްގީ ހޯދުމަށް ކުރެވޭ މުހިންމު މަސައްކަތެކެވެ.