ސަފީރުންނަށް އުނދަގޫ ކުރަމުންދިޔަ ކަމުގެ ތުހުމަތުގައި ޑރ ޝަޒުރާ އާއި އިތުރު އަންހެނަކު ހައްޔަރުކޮށްފި

ފުލުހުން މިރޭ ނެރުނު ބަޔާނެއްގައި ބުނީ އެ ދެ މީހުން ހައްޔަރުކޮށްފައިވަނީ މިއަދު މެންދުރު ފަހު އެކެއް ޖެހިއިރު ކަމަށެވެ.

ފުލުހުން ބުނީ އެ މީހުން ހައްޔަރުކުރީ ސުލްހަވެރިކަމާ އެކު އެއްވެ އުޅުމުގެ ގާނޫނާ ހިލާފަށް ޑިޕްލޮމެޓިކް މިޝަންތަކުގެ ކައިރިއަށް ތަކުރާރުކޮށް އެއްވެ، އަޑުގަދަކުރާ ބޭނުންކޮށްގެން ހަޅޭއްލެވުމާއި ބޭއަދަބީ ބަހުރުވައިން މުއާމަލާކޮށްފައިވާތީ ކަމަށެވެ.

މިމީހުން ހައްޔަރުކޮށްފައިވާ އަނެއްސަބަބަކީ ޑިޕްލޮމެޓިކް މިޝަންތަކަށް ހުރަސްއެޅޭ ގޮތަށް އަމަލުތައް ބަހައްޓާފައިވާތީ އަދި ވަކި ސަފީރަކަށް އުނދަގޫކުރުމުގެ އަމަލުތަކެއް ހިންގަމުން ދިއުމުން ސުލްހަވެރިކަމާ އެކު އެ ސަރަހައްދުން ދިއުމަށް އެ މީހުންނަށް އެންގުމުން އެކަމަށް އިންކާރުކޮށް ފުލުހުންގެ ވާޖިބަށް ހުރަސްއެޅި ކަމުގެ ތުހުމަތުގައި އެ މީހުން ހައްޔަރުކޮށްފައިވަނީ ކޯޓު އަމުރެއްގެ ދަށުންނެވެ.

އެ މައްސަލައިގައި ހައްޔަރުކުރި ދެ އަންހެނުންނަކީ:

ފުލުހުން ބުނީ އެ މީހުން ހައްޔަރުކުރީ އެގޮތަށް އަމަލުތައް ނުބެހެއްޓުމަށް ތަކުރާރުކޮށް ނަސޭހަތްތެރި ވުމަށް ފަހު ކަމަށެވެ.

ޑރ ޝަޒުރާއަކީ އާންމުގޮތެއްގައިވެސް އަޑުގަދަކުރާ ހިފައިގެން އިޒްރޭލާ ދެކޮޅަށް އަޑުއުފުލަމުންދާ އަންހެނަކަށް ވާއިރު ބައެއް ހާލަތްތަކާއި ވަގުތުތަކުގައި ކަންތައް ކުރެވޭ ގޮތުން އާންމު ރައްޔިތުންނަށް އުނދަގޫވެގެން ބަސްބުނެފައިވެއެވެ. އެގޮތުން ބައެއް ފަހަރު ކޭއެފްސީ ސަރަހައްދުގައި އަޑުގަދަ ކުރާއިން ބާރަށް ގޮވައި އަޑުއުފުލައި ހަދާއިރު ކުރިމަތީގައި ހުންނަ މިސްކިތުގައި ނަމާދުގަޑި ޖަމާއަތް ނިމުމަށްފަހުވެސް އަޅުކަމުގައި ތިބޭ މަދުފަރާތްތަކަކަށް ވިޔަސް މިކަމުން ދަތިތަކެއް ވާ ކަމުގެ ޝަކުވާ އުފުލާފައިވެއެވެ.