ސްޓެލްކޯގެ ނެޓްވޯކު ސްމާޓު ގްރިޑަކުން ގުޅާލާ ނިމިއްޖެ ކަމަށާއި ދެން އޮތީ އެ ކުންފުނިން ކަރަންޓުގެ ހިދުމަތް ދޭ ރަށްރަށުގައި ސްމާޓު މީޓަރު ހަރުކުން ކަމަށާއި އަމާޒަކީ ތިން އަހަރު ތެރޭގައި އެކުންފުނީގެ ހުރިހާ ކަސްޓަމަރުން ސްމާޓް މީޓަރަށް ބަދަލުކުރުންް ކަމަށް ސްޓެލްކޯގެ މެނޭޖިން ޑިރެކްޓަރު ހުސެން ފަހުމީ މިއަދު ވިދާޅުވެއްޖެ އެވެ.
ސްޓެލްކޯ އިން ބޭއްވި ނޫސްވެރިންގެ ބައްދަލުވުމެއްގައި ދެއްކެވި ވާހަކަފުޅުގައި ފަހުމީ ވިދާޅުވީ މާލެ އަދި ރަށްރަށުގައި ވެސް އޮފީހުގައި ތިބެގެން ޓްރާންސްފޯމަރުތަކުގެ ލޯޑު ބަލައި ޓްރާންސްފޯމަރު ނިއްވާ އަދި ޖެއްސޭނެ ނިޒާމެއް މިހާރު ގާއިމްކޮށްފައިވާ ކަމަށެވެ.
ސްމާޓް ގްރިޑު މަޝްރޫއު ނިމުމާއެކު ދެން އެ ކުންފުނިން ފަށާނީ ސްމާޓު މީޓަރު ހަރުކުރުމުގެ މަސައްކަތް ކަމަށް ފަހުމީ ވިދާޅުވި އެވެ. އަދި އެކުންފުނީގެ ހުރިހާ ކަސްޓަމަރުން ސްމާާޓް މީޓަރަށް ބަދަލުކުރުމުގެ މަސައްކަތް 3 އަހަރު ތެރޭ މުޅިން ނިމިގެން ދިއުމަކީ ސްޓެލްކޯގެ އަމާޒު ކަމަށްވެސް ފަހުމީ ވަނީ ވިދާޅުވެފައެވެ.
ފަހުމީ ވިދާޅުވީ ސްމާޓު މީޓަރު ހަރުކުރުން ލަސް ވެގެންދިޔައީ ސްމާޓު ގްރިޑު އިންސްޓޯލު ކުރުން ނިމެންދެން މަޑުކުރުމުން ކަމަށާއި ޖުމްލަ ހައްލެއް ލިބިގެންދާނީ މި ސްމާޓް ގްރިޑާއެކު ސްމާޓު މީޓަރު އައުމުންކަމަށްވުމާއެކު، ސްމާޓު ގްރިޑުގެ މަސައްކަތް ނިމުމުން އެކުންފުނިން މިހާރު ދެން ފަށާނީ ސްމާޓު މީޓަރުގެ މަސައްކަތް ކަމުގައެވެ.
މިފެށޭ ހަފްތާ ތެރޭގައި ނޫނީ އަންނަ މަސްތެރޭ ސްމާޓް މީޓަރު ހަރުކުރުމުގެ މަސައްކަތް ފަށާނެ ކަމަށާއި ސްމާޓް މީޓަރުގެ މަސައްކަތް ކުރިއަށްދާއިރު އޭގެތެރެއަށް އީވޯކާޗާ ސިސްޓަމަކާއި ސައިކަލްތަކުގެ ބެޓަރި ޗާޖު ކުރާނެ ގޮތެއް ވެސް ޤާއިމުކުރެވިގެންދާނެ ކަމަށް ފަހުމީ ވިދާޅުވިއެވެ. ހަމަމިއާއެކު، ފަހުމީ ވިދާޅުވީ އަންނަ އަހަރު ނިމެންވާއިރަށް ހުރިހާ ރަށެއްގެ ކަރަންޓު ލޯޑު މާލޭގައި ހުންނަ ސްޓެލްކޯގެ މައި އޮފީހުން ފެންނާނެހެން އެ ނިޒާމު ގާއިމް ކުރެވޭނެ ކަމަށެވެ.
ރާއްޖޭގައި ގާއިމުކުރެވިފައިވާ އިންޖީނުގެތަކުގެ ތެރެއިން ތިން ރަށެއްގެ އިންޖީނުގެ ފިޔަވައި ހުރިހާ ރަށެއްގައި ސްމާޓް ގިލްޑާ ހަރުކުރެވިފައިވާ ކަމަށް ސްޓެލްކޯއިން ވަނީ ބުނެފައެވެ.
ސްމާޓް ގްރިޑް ބޭނުން ކުރުމުން ކަރަންޓު ކެނޑިގެން ދިޔުމުން ސްޓެލްކޯގެ މުވައްޒަފުންނަށް އޮފީހުގައި ތިބެގެން ވަގުތުން ކަރަންޓު ދެވޭނެއެވެ. ސްމާޓް ގްރިޑް މަސައްކަތް ކުރަނީ ކޮމްޕިއުޓާ ބޭނުންކޮށްގެން ކަމަށްވާތީ މި ސިސްޓަމް ބޭނުން ކުރަން ފަސޭހަވެފައި ކަރަންޓު ބޭނުންކުރާ މިންވަރު ބަލާލަން ވެސް ފަސޭހަވާނެއެވެ. ހަމައެހެންމެ ސްމާޓް ގްރިޑާއެކު ކަރަންޓު ކެނޑޭ ހާލަތްތަކުގައި ކަރަންޓު ދޭން ހޭދަވާ ވަގުތު ކުޑަކުރެވޭނެ ކަމަށްވެސް ހާމަކޮށްފައިވެއެވެ.
ސްޓެލްކޯގެ ޖެނެރަލް މެނޭޖަރު، ޓްރާންސްމިޝަން އެންޑް ޑިސްޓްރިބިއުޝަން އިބްރާހިމް ނާޝިދު ވިދާޅުވީ، މާލެ އާއި ހުޅުމާލޭގެ 57 ޓްރާންސްފޯމަރު މިހާރު ހުރީ ގްރިޑު ތެރެއަށް އިންޓަގްރޭޓު ވެފައި ކަމަށާއި ސްޓެލްކޯ ފީޑުގައި ހުރި ހުރިހާ ޑިސްޓްރިބިއުޝަން ނެޓްވޯކަކަށް ފައިބާ ނެޓްވޯކު ހުރީ އަޅާފައިކަމަށާއި ސްމާޓް ގްރިޑުގެ ބެކް ބޯން ސްޓްރަކްޗާ އެކީ ނިމިފައިވާ ކަމަށެވެ.