މަސްކިރާ ދޯނިތަކަށް ކްރެޑިޓަށް އައިސް ދިނުމަށް މޯލްޑިވްސް އިންޑަސްޓްރިއަލް ފިޝަރީޒް (މިފްކޯ) އިން ނިންމައިފި އެވެ.
މަސްވެރިން މަހަށް ފުރުވުމަށް ހިތްވަރު ދިނުމުގެ ގޮތުން ކޮންމެ މަސް ދޯންޏަކަށް ތިން ޓަނުގެ އައިސް ހިލޭ މިދިޔަ ބުދަ ދުވަހުގައި ވަނީ ދޫކުރަން ނިންމާފަ އެވެ.
މިފްކޯއިން މިއަދު މީޑިއާތަކަށް ފޮނުވި މެސެޖެއްގައި ބުނީ މިފްކޯއިން މަސްކިރާ ކޮންމެ ދޯންޏަކަށްވެސް އެކި ފަހަރު މަތިން 10 ޓަނާ ހަމައަށް ކްރެޑިޓަށް އައިސް މިއަންނަ ހޮނިހިރު ދުވަހުން ފެށިގެން ނެގޭނެ ކަމަށެވެ.
“ކްރެޑިޓަށް އައިސް ވިއްކާ ދޯނި ފަހަރު މަސްކިރުމުން މިފްކޯއިން ބިލު ހަދާނީ، ކްރެޑިޓަށް އައިސް ގަތް ފައިސާ ބިލު އުނި ކުރުމަށްފަހު،” މިފްކޯއިން ބުންޏެވެ.
މީގެ ދުވަސްކޮޅެއް ކުރިން ދިޔަ ދުވަސްތަކުގައި މަސްވެރިކަން ވަރަށް ބޮޑަށް ދަށްވި އެވެ. އެކަމާ ގުޅިގެން މަސް ލިބުން ތަދުވެ، މަހުން އުފައްދާ އުފެއްދުންތަކުގެ އަގުތައް ވެސް އުފުލުނެވެ. އެއަށްފަހު މި އޮގަސްޓުގެ ކުރީކޮޅުން ފެށިގެން މަސްވެރިކަން ދަނީ މަޑުމަޑުން ރަނގަޅުވަމުންނެވެ.
މިފްކޯއިން އަދާހަމަކުރި ތަފާސްހިސާބުތަކުން ދައްކާގޮތުގައި 21 އޮގަސްޓު 2024 ވަނަ ދުވަހު 24 މަސް ދޯންޏަކަށް ޖުމްލަ 68 ޓަނު އައިސް ވަނީ ދޫކޮށްފައެވެ.
އެގޮތުން ގދ. ތިނަދޫ އައިސް ޕްލާންޓުން 5 ދޯންޏަކަށް 15 ޓަނު އައިސް އެކުންފުނިން ދޫކޮށްފައިވެއެވެ. ކޫއްޑޫ ފިޝަރީޒް ކޮމްޕްލެކްސް (ކޭއެފްސީ) އިން 4 ދޯންޏަކަށް 8 ޓަނު އައިސް ދޫކޮށްފައިވާއިރު، ފެލިވަރު ފިޝަރީޒް ކޮމްޕްލެކްސް (އެފްއެފްސީ) އިން 15 ދޯންޏަކަށް 45 ޓަނު އައިސް ދޫކުރިއެވެ. އައްޑޫ ފިޝަރީޒް ކޮމްޕްލެކްސް (އޭއެފްސީ) އިން އެއްވެސް ދޯންޏަކަށް އައިސް އަޅާފައެއް ނުވެއެވެ.
މިފްކޯއިން އުފައްދާ އައިސް ޓަނެއްގެ ހަރަދަށް އެވްރެޖުކޮށް 1300 އާއި 1400 ރުފިޔާ ހޭދަވާއިރު އައިސް ޓަނެއް މިވަގުތު ވިއްކަމުންދަނީ 750 ރުފިޔާއަށެވެ.