ފެނަކަ ކޯޕަރޭޝަންގެ ކުރީގެ މެނޭޖުމަންޓުން ހިންގާފައިވާ ކޮރަޕްޝަންގެ އަމަލުތަކުގެ ތަހުގީގު އަވަސްކުރުމަށް ފެނަކައިގެ މިހާރުގެ މެނޭޖުމަންޓާ، އެންޓި ކޮރަޕްޝަން ކޮމިޝަން (އޭސީސީ)ގެ މެންބަރުން ބައްދަލުކޮށްފި އެވެ.
މިކަން ހާމަކޮށް އޭސީސީގެ އެކްސް ޕޯސްޓުގައި ބުނީ ފެނަކައިގެ މިހާރުގެ މެނޭޖްމަންޓާ ބައްދަލު ކުރެއްވީ، ތަހުގީގުތައް އަވަސް ކުރުމުގެ ގޮތުން ބޭނުންވާ ލިޔުންތައް ހޯދުމުގައި ހުރި ގޮންޖެހުންތައް ހައްލުކުރުމުގެ މަގުސަދުގައި ކަމަށެވެ.
“މީގެ އިތުރުން ކޯޕަރޭޓް ގަވަނަންސް ހަރުދަނާ ކުރުމަށާއި ފެނަކައިގައި ކޮރަޕްޝަންގެ ނުރައްކާ ކުޑަކުރުމުގެ ސްޓްރެޓެޖީތަކާ ބެހޭ ގޮތުން ވެސް މި ބައްދަލުވުމުގައި ވަނީ އެއްބަސްވެފައި،” އޭސީސީގެ ޕޯސްޓުގައި ލިޔެފައިވެ އެވެ.
ދަރަނި ބޮޑުވުމުގެ ސަބަބުންނާއި ކުރީގެ މެނޭޖުމަންޓުތަކުގައި އެތެރޭގެ ކޮރަޕްޝަން ބޮޑުވުމުގެ ސަބަބުން ހިންގުމަށް ދަތިވެފައިވާ ފެނަކަ އެސްޓީއޯގެ ދަށަށް ގެންދިއުމަށް މި ސަރުކާރުން ނިންމާފައިވެ އެވެ. އެ ބަދަލު ގެނައުމަށް ކުރަން ޖެހޭ މަސައްކަތްތައް ދަނީ ކުރަމުންނެވެ.
މީގެ ކުރިން ރައްޔިތުންގެ މަޖިލީހުގެ ކޮމިޓީއެއްގައި ވެސް އޭސީސީގެ މެންބަރުން ވަނީ ފެނަކައިން ބައެއް ލިޔެކިޔުންތަކާއި މައުލޫމާތު ލިބުމުގައި ދަތިކަމެއް އެބަ އުޅޭ ކަމަށެވެ. އެ ދުވަހު ފެނަކައިގެ މެނޭޖިން ޑިރެކްޓަރު މުއާޒު ރަޝީދު ވިދާޅުވީ ލިޔެކިޔުންތައް ނައްތާލާފައިވާ ކަމަށެވެ.