އިންސާނުންނަކީ، ކުށަށް ހުށަހެޅިފައިވާ ބަޔެއް ކަމަށާއި، އިޙްލާޞްތެރިކަމާއެކު ފާފަފުއްސެވުމަށް ﷲ ގެ ހަޒުރަތުގައި ދެންނެވުމުން ފާފަފުއްސަވާނެ ކަމަށް މިއަދުގެ ހުކުރު ޚުތުބާގައި ބުނެފިއެވެ.
މިއަދުގެ ހުކުރު ޚުތުބާ އަލިއަޅުވާލާފައިވަނީ ދީނައްޓަކާ ހިދުމަތް ކުރުމުގެ މައްޗަށެވެ. ހުތުބާގައި ފާހަގަކޮށްފައިވަނީ ކުށުގެ ވެއްޓަށް ވަދެވި، އެއިން އިންސާނާ ސަލާމަތްނުވެވިފަ ހުންނަޖެހޭ ޖެހުން އަމިއްލަ އަށް ކޮންޓްރޯލް ކުރަން ޖެހޭ ކަމަށެވެ. ހަވާނަފުސު ކޮންޓުރޯލުކޮށް، އޭގެ މައްޗަށް ބާރު ފޯރުވައިފި މީހަކީ ހިތްވަރުގަދަ ފަހުލަވާނެއް ކަމަށެވެ. އަދި ތިބާ ދެކޭ ހުރިހައި ޞާލިޙު އަޅުންނަކީ، ފާފަ ކުރެވޭ މީހުން ކަމަށާއި، ކުށްކުރުމަކީ އަހަރެމެން އެކަނި ކުރާ ކަމެއްކަމަށް ހީކުރުމަށެވެ.
ތިޔަބައިމީހުން ދުނިޔޭގައި އުޅެނީ، މާ މުހިންމު މަޤްޞަދަކަށް ޓަކައި ކަމަށާއި، މި ދީނަށް ތަބަޢަވެގެން މެނުވީ ނަޖާވާނެ މަގެއް، މުކައްލަފަކަށް ނުވާ ކަމަށެވެ. މި ދީނަކީ އުންމަތުގެ ފަޚުރެއް ކަމަށާއި، މި ދީނުގެ ޝަރީޢަތުން ޢިއްޒަތްލިބި، މުސްލިމުންގެ ސަފުތައް ބަދަހިވެ، ހިތްތައް އެކުވެރިވާ ކަމަށެވެ. ފާފައެއް ކުރެވުމަކީ، ދީނަށް ލޯބިކުރުމާއި، ދީނަށް ޚިދުމަތްކުރުމާއި، ދީނަށް ނަޞްރުދިނުމާއި، ދީނަށް ޣީރަތްތެރިވުމަށް ހުރަސްއެޅޭ ސަބަބެއް ނޫން ކަމަށެވެ. އެހެންކަމުން ފާފައެއް ކުރެވުނަސް އެ ފާފައަކާ ދުރުވެ ދުއާ ކުރުން މަތީ ދެމިހުރުމަށެެވެ.
އެހެންކަމުން ޤައުމުތަކުގެ މުސްތަޤްބަލު ބިނާކުރަމުން އަންނަ ހިނދު، ތިބާއަކީ މި އުންމަތުގެ އެންމެ އިސް ސަފުގައި ހުންނާން ޖެހޭނެ ފަރުދެއްކަމުގައި ދެކެންޖެހޭ ކަމުގައިވެސް ޚުތުބާގައިވަނީ އެދިލައްވާފައެވެ.
” އަހުރެމެން މި ތިބީ ގުޅިގެން މަސައްކަތްކުރާން ޖެހިފައިވާ ޒަމާނަކަށް އާދެވިފަ. ފަހަރެއްގައި ވެސް ތިބާގެ ދީނަށް ނަޞްރުދިނުމުގައި ޢަމަލީ ޙިއްޞާއެއް އަދާކުރާން ތިބާ ވިސްނަން ޖެހޭ. ތިބާ އީމާންވާ ﷲގެ ދީނަކީ، ޢަދާވާތްތެރީންގެ ކެހިވެރި ރޭވުންތަކުގެ އަމާޒުފަތްގަނޑަކަށް ވެފައިވާ ދީނެއްކަމުގައި ޤަބޫލުކުރަމުހެއްޔެވެ؟ މުސްލިމުން ކަތިލާ ތަން ފެނުމުން ތިބާގެ ހިތަށް ތަދެއް ނުވޭހެއްޔެވެ؟ މިއަދު މުސްލިމުންގެ ލެއަކީ މާސިންގާ ކަނޑުގައި ހުރި ލޮނަށް ވުރެ އަގުހެޔޮ އެއްޗަކަށް ވަނީ ވެފަ.” ޚުތުބާ
މުސްލިމުންގެ ޤައުމުތައް ސުންނާފަތިކުރަމުން ދާއިރު، އަދި ދައުލަތްތަކުގެ މައްޗަށް ވެރިވެގަންނަމުން ދާއިރު، ޢަދުއްވުންގެ އެންމެ ރަހީނަކަށް ޓަކައި، މުޅި ދުނިޔެ އޮތީ ނިދިނައިސްގެން ކަމަށެވެ. ނަމަވެސް މުސްލިމުންގެ މެދުގައި އޮންނަ އެއްހަށިގަނޑެއްގެ ރޫޙު މިއަދު ފެންނަން ނެތްކަމަށެވެ. ކޮންމެ މުސްލިމަކީ އެކަލާގެ އެންގެވި ގޮތަށާއި، އަމުރުތަކަށް ކިޔަމަންގަންނަ މީހެއް ކަމުގައި ވުމަށްވެސް ޚުތުބާގައި ވަނީ އެދިލައްވާފއެވެ.