މާލޭގައި އަންހެނަކު ރަހީނުކޮށް، ވަޅިން ބިރުދައްކައި، ފުލުހުންނަށް އިންޒާރުދިން ފިރިހެން މީހާއަކީ، މިދިޔަ ސަރުކާރުގައި ޖަލު ހުކުމެއްގެ އަދަބު ލުއިކޮށްދީ، މިނިވަންކޮށްފައިވާ މީހެއްކަން އެނގިއްޖެއެވެ.
މާލޭގައި އަންހެނަކު ރަހީނުކޮށް ވަޅިން ބިރުދެއްކީ މީގެ ދެ އަހަރެއްހާ ދުވަސް ކުރިން ޖަލު އަދަބުދީ ލުއިދީފައިވާ ށ. މިލަންދޫ، ހެޕީލޭންޑް އަހުމަދު އަޚްތަރުއެވެ. އަޙްމަދު އަޚްތަރަކީ މީގެކުރިން ޖިނާއީ ކުށެއް ސާބިތުވެ ޖަލު ޙުކުމެއް ތަންފީޛުކޮށްފައިވާ މީހެކެވެ.
ރޭ އަންހެނަކު ރަހީނުކޮށް ވަޅިން ބިރުދައްކައި، ފުލުހުންނަށް އިންޒާރު ދީފައިވާ އަޚްތަރަކީ، ކުރީ ސަރުކާރުން އަދަބު ލުއިކޮށްދިން މީހުންގެތެރޭގައި ހިމެނޭ މީހެކެވެ.
މައުލޫމާތު ލިބިފައިވާ ގޮތުގައި އަޚްތަރަށްވަނީ، މާފުދިނުމާއި އަދަބު ލުއިކޮށްދިނުމުގެ ޤާނޫނުން ރައީސުލްޖުމްހޫރިއްޔާއަށް ލިބިދޭ އިޚްތިޔާރުގެ ދަށުން، 2022 ވަނަ އަހަރުގެ ސެޕްޓެމްބަރު މަހުގެ 2 ވަނަ ދުވަހު ހުކުމް ލުއިކޮށްދީފައއެވެ. މި ލުޔާއެކު، ވަކި ޝަރުޠުތަކަކާ އެއްގޮތްވާ ގޮތުގެ މަތިން އޭނާ ހުރީ ދޫކޮށްލާފައެވެ.
ރޭ ޢާންމުކުރެވުނު ފުރަތަމަ ވީޑިއޯގައި ފެންނަނީ ގެއެއްގެ ތެރޭގައި ފިރިހެނަކު އަންހެނަކު ހިފަހައްޓައިގެން ހުރި ތަނެވެ. އެ ފިރިހެނާ އަތުގައި އޮތް ވަޅި އަންހެނާގެ ކަރުގައި ޖައްސާފައިވާ ތަން ފެނެއެވެ. މި މަންޒަރުގައި ގޭގެ ދޮރު ކައިރީގައި ފުލުހަކު ވެސް މަޑުކޮށްލައިގެން ހުރި ކަން ފާހަގަކުރެވެއެވެ.
ދެން ފެންނަނީ އެ ފިރިހެންމީހާ ސައިކަލެއްގެ ފަހަތު ސީޓުގައި އިން ތަނެވެ. ސައިކަލުގެ ކުރީ ސީޓުގައި އިނީ އަންހެނާއެވެ. ފިރިހެންމީހާ ހުރީ ވަޅި އަންހެންމީހާގެ ކަރުގައި ޖައްސައިގެން ހުރި ތަން ފެނެއެވެ. މި ސަރަހައްދުގައި ފުލުހުން ހަރަކާތްތެރިވަމުން ދިޔަ ނަމަވެސް، އަންހެންމީހާއަށް ގެއްލުމެއް ލިބިދާނެކަމުގެ ބިރުން ފުލުހުންނަށް ފިރިހެންމީހާއާ ކައިރި ނުވެއެވެ.
ވީޑިއޯގެ ވަކި ހިސާބަކުން، ފިރިހެނާ ސައިކަލުން ފައިބައިގެން ދާ ތަން ފެނެއެވެ. ފުލުހުން ވެސް އޭނާގެ ފަހަތުން ދުވެފައިދާ މަންޒަރު ފެނެއެވެ. މީގެ ފަހުން ޢާންމުކުރެވުނު ވީޑިއޯއެއްގައި ފެންނަނީ މަގުމަތީ މީހުން ގިނަވެ، ސައިކަލަށް ކުރިއަށް ދެވެން ނެތްތަނާއި އޭރުވެސް އެ އަންހެންމީހާގެ ކަރުގައި ވަޅި ޖައްސައިގެން ހުރި ތަނެވެ.
ސައިކަލު މަޑުކޮށްގެން އިން ވަގުތު، ސައިކަލުތަކެއްގައި އޭނާގެ ފަހަތުން އައި ފުލުހަކު ވަނީ އެ ފިރިހެންމީގާގެ ގައިގައި މުގުރަކުން ޖަހައި ސައިކަލާ އެކު އެމީހާ ބިންމައްޗަށް ވައްޓާލައިފައެވެ. އެ މީހާ ވެއްޓުނު ވަގުތު ގިނަ އަދަދެއްގެ ފުލުހުން ވަނީ އެ މީހާ ހައްޔަރުކޮށް، އަންހެން މީހާ ސަލާމަތްކޮށްފައެވެ.
ފުލުހުން ބުނީ އަންހެން މީހާގެ ކަރުގައި ވަޅި ޖައްސައިގެން ސައިކަލެއްގައި އަރުވައިގެން ފިލަން އުޅުމުން ބާރުގެ ބޭނުންކޮށްގެން އަންހެން މީހާ ސަލާމަތްކޮށްފައިވާކަމަށެވެ.
ފުލުހުން ބުނީ އަންހެން މީހާއަށް އައިޖީއެމްއެޗްގައި ފަރުވާ ދީފައިވާކަމަށާއި، އޭނާގެ ހާލު ރަނގަޅުކަމަށެވެ. އަދި ވަޅިން ބިރުދެއްކި ފިރިހެން މީހާއަށް އޭޑީކޭ ހޮސްޕިޓަލުގައި ފަރުވާދެމުން އަންނަކަމަށާއި، އޭނާގެ ހާލުވެސް ރަނގަޅުކަމަށް ފުލުހުން ވިދާޅުވިއެވެ.
އަންހެން މީހާގެ ކަރުގައި ވަޅި އެޅިފައިނުވި ނަމަވެސް އަންހެން މީހާ އަށް ނަފްސާނީ ގޮތުން އެއްވެސް ގެއްލުމެއް ލިބިފައިވޭތޯ ބަލަމުންދާކަމަށް ފުލުހުން ވަނީ ވިދާޅުވެފައެވެ.