ބަހާއި އަމަލުން އެމަނިކުގާނުގެ ހިތްނިޔަތް ސާފުކަަމަށާއި އެހެންމީހުން ގަބޫލު ކުރާނެ ގޮތް ނިންމާނީ އެމީހުން އަމިއްލައަށް ކަމަށް ރައީސް ޑރ މުއިއްޒު ވިދާޅުވެއްޖެއެވެ.
ރައީސް ޑރ. މުޙައްމަދު މުއިއްޒު ވިދާޅުވެފައި ވަނީ ރައީސް ޢަބްދުﷲ ޔާމީން މިނިވަން ކޮށްދިނުމަށް އެތައް މަސައްކަތެއް ކުރެއްވި ކަމަށެވެ.
ރައީސް މުއިއްޒު މިހެން ވިދާޅުވީ ސަންގު ޓީވީއަށް ދެއްވި ޚާއްޞަ އިންޓަވިއުއެއްގައެވެ.
ރައީސް މުއިއްޒު ވިދާޅުވީ ރައީސް އިބްރާހީމް މުޙައްމަދު ޞާލިޙްގެ ވެރިކަމުގައި ރައީސް ޔާމީނަށް ދަތިކޮށް، އުނދަގޫކޮށް، އެކި ކަންކަމުގައި ކޯޓަށާއި ފުލުސް އޮފީހަށް ގެންދިޔައިރު، ޔާމީންގެ ދިފާއުގައި ހުންނެވި އެއް ބޭފުޅަކަށް އެމަނިކުފާނު ވެވަޑައިގަންނަވާ ކަމަށެވެ. އަދި އޭރުގައި ވެސް ޔާމީން މިނިވަން ކުރުން ފިޔަވައި އިތުރު އެއްވެސް ކަމެއް ހިތްޕުޅުގައި ނޯންނާނެ ކަމަށް ވެސް ރައީސް މުއިއްޒު ވިދާޅުވިއެވެ.
"އެންމެ ފަހުދުވަހުވެސް ސެނެޓު ތެރޭގައި ހިނގަމުން ދިޔަ އަޑުއަހާނެހެން ހީވާ އެންމެން ގާތުގައިވެސް އަމަލީ ގޮތުންވެސް އަޅުގަނޑުގެ މަގުސަދަކީ ރައީސް ޔާމީން މިނިވަންކުރުން ނޫން އެހެން އެއްވެސް މަގުސަދެއް ނެތް،" ރައީސް މުއިއްޒު ވިދާޅުވިއެވެ.
އަދި ޕީޕީއެމްގައި ރައީސް ޔާމީން ދެވަނަ ދައުރަށް ހޮވުމަށްޓަކައި އިސްދައުރެއް އަދާކޮށްދޭން ކަމަށްވެސް އިސްވެ ދެންނެވީ ވެސް އެމަނިކުފާނު ކަމަށާއި، ފުރުސަތު ދެއްވީވެސް ހުދު ޔާމީން ކަމަށް ރައީސް މުއިއްޒު ވިދާޅުވިއެވެ.
ރައީސް މުއިއްޒު އިތުރަށް ވިދާޅުވީ ރައީސް ޔާމީން މިނިވަންކޮށްދިނުމަށް އެދި ރައީސް އިބްރާހީމް މުޙައްމަދު ޞާލިޙަށް އެތައް މެސެޖެއް ކުރެއްވި ކަމަށެވެ. މީގެ ތެރޭގައި ރޯދަމަހަށް ރައީސް ޔާމީން ގޭބަންދަށް ގެނެސްދެއްވުން އެދި އާދޭސް ދެންނެވި ކަމަށާއި، ރައީސް ޔާމީންގެ ދަރިފުޅުގެ އޯލެވެލްއަށް ގެނެސްދެއްވުން އެދި، އާދޭސްކޮށް ތަކުރާރުކޮށް މެސެޖްކުރެއްވި ކަމަށް ރައީސް މުއިއްޒު ވިދާޅުވިއެވެ.
"އިބްރާހިމް މުހައްމަދު ސާލިހުގެ ފޯނުގައި ހުންނާނެ ޑިލީޓްނުކުރަންޏާ އަޅުގަނޑު ފޮނުވި ހުރިހާ މެސެޖެއް. އެތައް މެސެޖެއް ހުންނާނެ. ރޯދައަށް ގެއަށް ގެނެސްދިނުމަށާއި ދަރިފުޅުގެ އޯލެވެލް ކައިރިވާތީ، އޯލެވެލްއަށް ގެއަށް ގެނެސްދިނުމަށްވެސް ދެންނެވިން. ބާރު ހުރި ވަޒީރުންނަށްވެސް މެސެޖުކުރިން މުޒާހަރާކުރިއިރުވެސް ކުރެވެން ހުރި ހުރިހާ މަސައްކަތެއް ކުރިން،" ރައީސުލްޖުމްހޫރިއްޔާ ވިދާޅުވިއެވެ.
"މިއީ ކަންހިނގާ ދިޔަގޮތް، އަޅުގަނޑުގެ ހިތްނިޔަތް ސާފު. އަމަލީ ގޮތުން ބަހާ އަމަލާ ހަމަ އަޅުގަނޑުގެ ނިޔަތާ އޮތީ އެމަނިކުފާނު މިނިވަން ކުރުމުގަ،" ރައީސް މުއިއްޒު ވިދާޅުވިއެވެ.
ރައީސް މުއިއްޒު ނިންމަވާލައްވަމުން ވިދާޅުވީ އެމަނިކުފާނުގެ ބަހާއި އަމަލާއި ހިތްނިޔަތް ސާފުކަމަށާއި، އެހެން މީހުން ނިންމާނީ އެމީހުން ޤަބޫލުކުރާނެ ގޮތެއް ކަމަށެވެ.