މަސްތުވާތަކެތި ޓްރެފިކް ކުރި ފަތުރުވެރިއަކު އެއް ލައްކަ ރުފިޔާއިން ޖޫރިމަނާކޮށް، އުމުރަށް ޖަލަށް ލުމަށް ކްރިމިނަލް ކޯޓުން ހުކުމް ކޮށްފިއެވެ.
ބ. މާޅޮހަށް ޗުއްޓީ ހޭދަކުރަން ދިޔަ ކެނެޑާ ފަތުރުވެރިއެއް ކަމަށްވާ ސްކޮޓް ވިލިއަމް އާމްސްޓޮރޯންގް ގެ ތުނޑި ވިލެޖް އެންޑް ސްޕާ މޯލްޑިވްސްގެ ރޫމް ނަމްބަރު 102ގައި މަސްތުވާތަކެތި ގެންގުޅެ އޭގެ ވިޔަފާރިކުރިކަމަށް ފުލުހުންނަށް ލިބުނު މައުލޫމާތަކާއި ގުޅިގެން ކޯޓު އަމުރެއްގެ ދަށުން އެ ކޮޓަރި ބަލައި ފާސްކުރަން ފެށުމުން، އެކަމުގައި ފުލުހުންނަށް އެއްބާރުލުން ދޭނެކަމަށް ބުނެ އޭނާ ވަނީ އެ ކޮޓަރީގައި ހުރި މިނީބާ ތެރެއިން މަތިޖެހި ކޮންޓެއިނަރެއް ފުލުހުންނާ ހަވާލުކޮށްފައެވެ.
މި ކޮންޓެއިނަރުތެރޭ އޮތް ރަބަރު ޕެކެޓަކުން ފެނުނު ދެ ގުޅައިގައި 26.8 ގްރާމު ކެނެބިސް ހުރިކަމަށާއި، މިނީ ބާ ކައިރީ ބަހައްޓާފައި ހުރި ކަޅު ލަގެޖެއްގެ ތެރޭ އޮތް ކޮންޓެއިނަރަކުން ފެނުން ރަބަރު ޕެކެޓުގައި އޮތް ދެ ގުޅައިގައި 0.1 ގްރާމު ކެނެބިސް ހުރިކަމަށް ތަހުލީލީ ރިޕޯޓުތަކުން ވަނީ ހާމަވެފައެވެ.
އެކޮޓަރިން ފެނުނު މަސްތުވާތަކެއްޗަކީ ސްކޮޓް ވިލިއަމް އާމްސްޓޮރޯންގް ގެ ތަކެތި ނޫންކަމަށް ބުނެ އޭނާ ވަނީ ތުހުމަތުތަކަށް އިންކާރުކޮށްފައެވެ. ސްކޮޓް ބުނީ، އޭނާއަކީ ފަތުރުވެރިއަކަށް ވުމުން ގެސްޓް ހައުސްގައި މަަސައްކަތް ކުރާ މީހުންނަށްވެސް އަދި އެހެންމީހުންނަށް ވެސް ބޭނުުން ކޮންމެ ވަގުތަކު ވެސް އެ ކޮޓަރިއަށް ވަދެވޭނެކަމަށެވެ.
އެހެންނަމަވެސް، މި މައްސަލައިގައި ކްރިމިނަލް ކޯޓުން ވަނީ، މަސްތުވާތަކެއްޗާ ބެހޭ ގާނުނުގެ 143ވަނަ މާއްދާއަށް ބަލައި އޭނާގެ މައްޗަށް ތަހުމަތުކުރި ކުށް ސާބިތުވާތީ، 1 ލައްކަ ރުފިޔާއިން ޖޫރިމަނާކޮށް، އޭނާ ޖަލުގައި ހޭދަކުރި މުއްދަތު އުނި ކުރުމަށްފަހު، 24 އަހަރާއި 6 މަހާއި 21 ދުވަހަށް ޖަލަށް ލުމަށް ވ ހުކުމްކޮށްފައެވެ.