ނުކުޅެދުންތެރިކަން ހުންނަ ފަރާތްތަކަށް ވަޒީފާދޭ ފަރާތްތަކުން އެ ވަޒީފާއެއް ދިނުމުގައި ހުންނަންޖެހޭ ވަކި މިންގަނޑުތަކެއް ބަޔާންކުރާ ޤަވާއިދެއް އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ގެޒެޓުކޮށްފައިވާއިރު، އެ ޤަވައިދުވެ ތެރެއިން ވަޒީފާ ދޭ ފަރާތާއި ވަޒީފާ އަދާކުރާ ފަރާތުގެ ހައްގުތައް ވެސް ކަށަވަރުކުރުމަށް ބާރު ލިބިގެންދާކަމަށް އިޖުތިމާއީ އަދި އާއިލީ ތަރައްޤީއާ ބެހޭ ވުޒާރާގެ ސްޓޭޓް މިނިސްޓަރ އަޙްމަދު އާތިފް ވިދާޅުވެއްޖެ އެވެ.
ސްޓޭޓް މިނިސްޓަރ އާތިފް މިފަދައިން ވިދާޅުވެފައި ވަނީ ނުކުޅެދުންތެރިކަން ހުންނަ ފަރާތްތަކަށް ވަޒީފާ ދިނުމާ ބެހޭ ޚާއްސަ ޔުނިޓެއް އެކުލަވާލުމާއި ގުޅޭގޮތުން ޕީ.އެސް.އެމް ނޫހަށް ދެއްވި އިންޓަވިއުއެއްގައެވެ.
މި އިންޓަވިއުގައި ސްޓޭޓް މިނިސްޓަރ ވިދާޅުވީ މި އައު ޤަވާއިދުގައި ވަޒީފާ އަދާކުރާ ނުކުޅެދުންތެރިކަން ހުންނަ ފަރާތްތަކާއި، ވަޒީފާ ދެއްވާފަރާތްތަކުގެ ޙައްޤުތަކާއި ޒިންމާތައް ބަޔާންކޮށްފައިވާ ކަމަށެވެ. އަދި މި ޤަވާއިދުގެ ސަބަބުން ކުރިއަށްއޮތްތާގައި ނުކުޅެދުންތެރިކަން ހުންނަ ފަރާތްތަކަށް ވަޒީފާގެ މާހައުލުގައި ދިމާވާ މައްސަލަތައް ހައްލުކުރުމުގައި ރިއާޔަތްކުރާނޭ ނިންމުންތަކެއް ކަނޑައެޅިގެންދާނެ ކަމަށެވެ.
ނުކުޅެދުންތެރިކަން ހުންނަ ފަރާތްތަކަށް ވަޒީފާ ދިނުމާއި، ވަޒީފާގެ މާހައުލުގައި ދެ ފަރާތުންވެސް ކަންކުރަންޖެހޭ ކަންކަން މި ޤަވައިދުގައި ބަޔާންކޮށްފައި ވާއިރު، މި ޤަވައިދުގެ މައްޗަށް ހެދޭ އުސޫލުތަކުގެ ދަށުން ވަޒީފާ ފުރުތަމަ ޢިއުލާނުކުރުމާއި، އިންޓަވިއު ކުރުމާއި، ޝޯޓްލިސްޓުކުރުން ފަދަ މުހިންމު މަރުހަލާތަކުގައި އެބޭފުޅުންނަށް ވެސް ފަސޭހައިން ބޭނުންކުރެވޭ ނިޒާމުތައް ދެމެހެއްޓުމުގައި ހުންނަންޖެހޭ ޝަރުތުތައް ހިމެނިގެންދާނެކަން އާތިފް ފާހަގަކުރެއްވި އެވެ.
މިގޮތުން ވަޒީފާގެ މާހައުލަށް ނުކުޅެދުންތެރިކަން ހުންނަ ފަރާތްތައް ނެގޭއިރުގައި ގިންތިތަކަށް ރިއާޔަތްކޮށް، އެ ފަރާތްތަކަށް މަސައްކަތްކުރެވޭގޮތް މިނެކިޔުމުގައި ބޭނުންކުރަންޖެހޭ ތަފާތު ނިޒާމުތައް ތަފްސީލުކުރެވިފައިވާނެ ކަމަށް އާތިފް ވިދާޅުވި އެވެ.
މިއާއިއެކު، މި ޤަވާއިދުގެ ދަށުން ހެދޭ އުސޫލުތަކުގައި ނުކުޅެދުންތެރިކަން ހުންނަފަރާތްތަކަށް ވަޒީފާ ދިނުމުގައި މި ވަޒީފާގެ މާހައުލުގައި އެންމެ މަދުވެގެން ހަމަވާންޖެހޭ ރައްކާތެރިކަމާއިބެހޭ އަދި އެކްސެސިބިލިޓީ ސްޓޭންޑާޑްތަކާއި، ވަޒީފާގެ ބަޔާނާއި، މުސާރައާއި، ވަޒީފާގައި ކުރިއެރުން ދިނުމަށް ބަލަންޖެހޭ މިންގަނޑުތަކާއި، ވަޒީފާ އަދާކުރެވޭ މާހައުލުގައި ފުރިހަމަވާންޖެހޭ ޝަރުތުތައް ބަޔާންކުރެވޭނެކަން ވެސް ސްޓޭޓް މިނިސްޓަރ އާތިފްގެ ވާހައިގައި ވަނީ ވިދާޅުވެފަ އެވެ.
އަދި މި ޤަވާއިދުގެ ދަށުން މަސައްކަތުގެ މާހައުލަށް ނުކުންނަ ނުކުޅެދުންތެރިކަން ހުންނަ ފަރާތްތަކާއި، އެފަރާތްތަކަށް ވަޒީފާދޭ ފަރާތްތަކުން ހަވާލުކުރާ ވަޒީފާގެ ޒިންމާ އެންމެ އެކަށީގެންވާގޮތަށް، ނަގައިގަތުމަށް ބާރުއަޅާނޭކަމާއި، މިއީ މި މަސައްކަތުގެ ދެފުއްފެންނަ އަދި ދެމެހެއްޓެނިވި ސިޔާސަތެއް ބައްޓަންކުރުމަށް ކުރެވޭ މަސައްކަތެއްކަމަށް ސްޓޭޓް މިނިސްޓަރ އަޙްމަދު އާތިފް ވަނީ ވިދާޅުވެފަ އެވެ.