ރައްޔިތުން އެދޭފަދަ އަމާން މާހައުލެއް ގާއިމުކުރަން ފުލުހުންގެ ޚިދުމަތުން ބުރަ މަސައްކަތްތަކެއް ކުރަމުންދާ ކަމަށް ހޯމް މިނިސްޓަރު ޢަލީ އިޙްސާން ވިދާޅުވެއްޖެއެވެ.
މިނިސްޓަރު އިޙްސާން މިހެން ވިދާޅުވީ ފުލުހުންގެ ޚިދުމަތުގެ ދުވަހުގެ މުނާސަބަތުގައި ހުރިހާ ފުލުހުންނަށާއި ފުލުހުންގެ އާއިލާތަކަށް ތަހުނިޔާ ފޮނުއްވައި އެކްސްގައި ކުރެއްވި ޕޯސްޓެއްގައެވެ.
މިނިސްޓަރުގެ ޕޯސްޓުގައި ވަނީ ރައްޔިތުން އެދޭފަދަ އަމާން މާހައުލެއް ގާއިމުކުރަން ފުލުހުން ބުރަ މަސައްކަތްތަކެއް ކުރަމުންދާކަން ފާހަގަކޮށް އެކަމަށްޓަކައި ޝުކުރު އަދާކުރައްވައިފައެވެ.
މިއަދަކީ ދިވެހި ފުލުހުންގެ މުއައްސަސާ ވަކި މުއައްސަސާއެއްގެ ގޮތުގައި އުފެދި ޚިދުމަތް ދޭން ފެށިތާ 20 އަހަރު ފުރުން ފާހަގަކުރުމުގެ ދުވަހެވެ.
ެެމިކަން ފާހަގަކުރުމަށް އިސްކަންދަރު ބިލްޑިންގގައި މިއަދު ބޭއްވި ޖަލްސާގައި ކޮމިޝަނަރ އޮފް ޕޮލިސް ޢަލީ ޝުޖާއު ވަނީ ފާއިތުވި ވިއްސަކަށް އަހަރުގެ ތެރޭގައި ރާއްޖެއަކީ އަމާން ރައްކާތެރި ތަނަކަށް ހެދުމަށްޓަކައި ދިވެހި ފުލުހުން ރެޔާއި ދުވާލު ބުރަ މަސައްކަތްތަކެއް ކޮށްފައިވާކަން ދިވެހި ރައްޔިތުން ގަބޫލުކުރައްވާނެކަން ޔަގީންކުރައްވާ ކަމަށް ވިދާޅުވެފައެވެ. އަދި ކުށްކުރާ ފަރާތްތަކުގެ މިލްކަކަށް މި ފަސްގަނޑު ވިޔަނުދިނުމަށްޓަކައި ދިވެހި ފުލުހުންގެ ލެޔާއި ފުރާނައިން އަގު ދައްކާފައިވާ ކަމަށް ދިވެހި ރައްޔިތުން ހެކިވާނެ ކަމުގައި ވިދާޅުވިއެވެ.
އެގޮތުން ސީޕީ ވަނީ ޝަހީދު އާދަމް ހަލީމް، ޝަހީދު އަލީ ނާޒިމް، ޝަހީދު މިސްބާހު ޢަބްދުﷲ އަދި ޑިއުޓީ އަދާކުރުމުގައި ބޮޑެތި އަނިޔާތައް ލިބިފައިވާ އެތައް ފުލުހުންނެއް ރައްޔިތުންގެ ފުރާނައާއި މުދާ ހިމާޔަތްކުރުމަށްޓަކައި ގުރުބާންވެފައިވާކަން މި ކުރު މާޒީގައި ފެންނަންހުރިކަން ފާހަގަކުރައްވައިފައެވެ.
ފުލުހުންގެ ޚިދުމަތުގެ މި ވިހި އަހަރުގެ މާޒީގެ ހަގީގީ ބަތަލުންނަކީ އެއީ ކަމުގައި ވެސް ސީޕީ ވަނީ ވިދާޅުވެފައެވެ.