ރީޖަނަލް އެއާޕޯޓްސް ކޮމްޕެނީ ލިމިޓެޑް (އާރްއޭސީއެލް) މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އެއްކޮށްލުމުގެ މަސައްކަތް އަންނަ ޖެނުއަރީ މަހުގެ ނިޔަލަށް ނިމޭނެ ކަމަށް ސަރުކާރުން ބުނެފިއެވެ.
އެމްއޭސީއެލްއާއި އާރްސީއެލް އެއްކޮށްލުމުގެ މަސައްކަތާ ގުޅޭ ގޮތުން ވަޒީރުންގެ މަޖިލީހުގެ މިއަދުގެ ބައްދަލުވުމުގައި ވަނީ މަޝްވަރާ ކުރައްވައިފައެވެ.
ވަޒީރުންގެ ބައްދަލުވުމުގައި ނިންމެވި ކަންކަމާ ގުޅޭ މައުލޫމާތު ދެއްވުމަށް ރައީސް އޮފީހުން ބޭއްވި ނޫސްވެރިންގެ ބައްދަލުވުމުގައި އިކޮނޮމިކް މިނިސްޓަރު މުޙައްމަދު ސަޢީދު ވިދާޅުވީ ޚަރަދު ކުޑަކުރުމުގެ ގޮތުން އެމްއޭސީއެލްއާއި އާރްއޭސީއެލް އެއްކޮށްލަން ނިންމައި އެކަން ކުރާނެ ތާރީޚު ވެސް މިއަދުގެ ބައްދަލުވުމުގައި ނިންމަވާފައިވާ ކަމަށެވެ.
މިނިސްޓަރު ވިދާޅުވީ ކޯޕަރޭޓް ގަވަރނަންސްގެ އުސޫލުން ދެ ކުންފުނިން ނިންމަންޖެހޭ ނިންމުންތަކާއި އެޑްމިނިސްޓްރޭޓިވް މަސައްކަތްތައް ނިމި އަންނަ ޖެނުއަރީ 31 ގެ ނިޔަލަށް ދެ ކުންފުނި އެއްކޮށްލުމުގެ މަސައްކަތް ނިމޭނެ ކަމަށެވެ.
ރައީސްގެ މި ނިންމެވުމުގެ ސަބަބުން ވަރަށް ގިނަ ފައިސާ ސަލާމަތްކުރެވޭނެ ކަމަށާއި ދެ ކުންފުންޏަށް ވެސް ބޮޑެތި ކުރިއެރުންތައް އަންނާނެ ކަމަށް މިނިސްޓަރު ވިދާޅުވިއެވެ. އެގޮތުން އެ މަސައްކަތުގެ ތެރެއިން ހދ.ހަނިމާދޫ އިންޓަރނޭޝަނަލް އެއާޕޯޓް ހިމެނޭހެން މުޅިއެކު އަށް އެއާޕޯޓު އެއްކޮޮށްލެވިގެންދާނެ ކަމަށް ވެސް މިނިސްޓަރު ވިދާޅުވިއެވެ.