ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ބޮޑުކަންނެލި މަސްވެރިންގެ ޔޫނިއަން (ބީކޭއެމްޔޫ) އާއި ގެދޮރުވެރިކަމާބެހޭ އެކި ޔޫނިއަންތަކުގެ ބޭފުޅުންނާ ބައްދަލުކުރައްވަން ނިންމަވައިފިއެވެ.
ރައީސް އޮފީހުން މިއަދު އާންމުކުރި ވީޑިއޯއެއްގައި މި ބައްދަލުވުންތައް މިއަދު ބާއްވަން ހަމަޖެހިފައިވާކަން އިއުލާނުކުރެއްވީ ރައީސް ޑރ. މުޢިއްޒެވެ.
އެމަނިކުފާނު ވިދާޅުވީ މިއަދު ވަރަށް މުހިންމު ދެ ބައްދަލުވުމެއް ބާއްވަން ހަމަޖެހިފައިވާ ކަމަށާއި އޭގެތެރެއިން އެއް ބައްދަލުވުމަކީ ބީކޭއެމްޔޫގެ ބޭފުޅުންނާ އެއްކޮށް ބާއްވާ ބައްދަލުވުން ކަމަށެވެ.
އަޅުގަނޑު ވަރަށް ލުކް ފޯވާޑް ކުރަން އެ ބައްދަލުވުމަށް. ހަގީގަތުގަ ބޮޑުކަންނެލީގެ މަސްވެރިކަން މި ރާއްޖޭގަ ކުރިއަށް ގެންދިއުމުގަ ސަރުުކާރުގަ ސިޔާސަތަކީ އެކަމުގަ ހަރަކާތްތެރިވާ މަސްވެރިންގެ އަޑުއަހައިގެން ކުރިއަށްދިއުން.
ރައީސް ވިދާޅުވީ ސަރުކާރުގެ ސިޔާސަތަކީ ކޮންމެ އިންޑަސްޓްރީއެއްގައި ވެސް މަސައްކަތްކުރާ ފަރާތްތަކުގެ އަޑުއަހައިގެން ކަންތައްތައް ބައްޓަން ކުރުން ކަމަށެވެ.
މީގެއިތުރުން ރައީސް ވިދާޅުވީ މިއަދުގެ ދެވަނަ ބައްދަލުވުން ބޭއްވުމަށް ހަމަޖެހިފައިވަނީ ފަހި ޔޫނިއަންއާއި ގިރާވަރު މާލެ ސިޓިޒެންސް އެސޯސިއޭޝަނާއި ގުޅިފަޅު ރައްޔިތުންގެ އެސޯސިއޭޝަން ހުޅުމާލޭ ރައްޔިތުންގެ ކޮމިޓީ އަދި މާލޭ ރަށްވެހިންގެ ޖަމްއިއްޔާއާ ކަމަށެވެ.
ރައީސް ވިދާޅުވީ އެބޭފުޅުންގެ އިހްސާސްތަކާއި ކަންބޮޑުވުންތައް ހިއްސާކުރެއްވުމަށް މި ބައްދަލުވުމުގައި އެބޭފުޅުން ބޭނުންވާ ވަރަށް ފުރުސަތު ދެއްވާނެ ކަމަށެވެ.
މި ހުރިހާ ޖަމްއިއްޔާތަކަކީ ވަރަށް ގިނަ ރައްޔިތުން ތަމްސީލުކުރާ ބައެއްކަން ފާހަގަކުރައްވައި ރައީސް ވިދާޅުވީ އެމަނިކުފާނު ބޭނުންފުޅުވަނީ އެބޭފުޅުންގެ އަޑު ވެސް އައްސަވައިގެން ކުރިއަށް ދިއުމަށް ކަމަށެވެ.