ސްޓެރޮއިޑްސް އަކީ ކާމިޔާބީއަށް އަވަހަށް ވާސިލުވެވޭނެ މަގެއްކަމުގައި ފެނިދާނެއެވެ. އެހެނަސް އޭގެ ސަބަބުން ދިގު މުއްދަތަކަށް ނުރައްކާތެރި އަސަރުތަކެއް ކުރެއެވެ. މީގެ ތެރޭގައި ކިޑްނީ ފަދަ މުހިންމު ގުނަވަންތަކަށް އަނބުރާ ރުޖޫޢަ ނުކުރެވޭ ފަދަ ގެއްލުންތައް ހިމެނެއެވެ. އަޅުގަނޑުމެންގެ ލަނޑުދަނޑިތަކަށް ވާސިލުވުމަށް މަސައްކަތް ކުރަމާ ހިނގާށެވެ. އެކަން ކުރާނީ ހިތްވަރާއި، ގުދުރަތީ ގޮތްތަކާއި، ރައްކާތެރި އުކުޅުތަކުގެ ޒަރީއާއިންނެވެ. ތިބާގެ ޙަޤީޤީ މުއްސަނދިކަމަކީ ތިބާގެ ޞިއްޙަތެވެ.
ސްޓެރޮއިޑް ނަހަމަ ގޮތުގައި ބޭނުންކުރުމުން އެކި ބާވަތުގެ ސިއްޙީ މައްސަލަތައް ކުރިމަތިވެއެވެ. އޭގެ ތެރޭގައި ކިޑްނީއަށް ގެއްލުން ލިބުން ހިމެނެއެވެ. ކިޑްނީ ފެއިލްވުމަށް މެދުވެރިވެދާނެ ބައެއް ސަބަބުތަކަކީ:
އެނަބޮލިކް ސްޓެރޮއިޑް ބޭނުންކުރުން:
ދިގު މުއްދަތަކަށް އެނަބޮލިކް ސްޓެރޮއިޑް ބޭނުންކުރުމުން ކިޑްނީއަށް ގެއްލުން ލިބިދާނެއެވެ. ސްޓެރޮއިޑްތަކުން މަސްތައް ބޮޑުކުރުވާ ނަމަވެސް، ލޭގެ ޕްރެޝަރު މަތިވެ، ކިޑްނީއަށް އިތުރު ބުރަ ބޮޑުވެއެވެ. މިކަމުގެ ސަބަބުން ދުވަސްވީ ވަރަކަށް ކްރޮނިކް ކިޑްނީ ބަލި ނުވަތަ އެކިއުޓް ކިޑްނީ އިންޖަރީ ޖެހިދާނެއެވެ.
ހަށިގަނޑުން ފެން މަދުވުން:
ބޮޑީބިލްޑަރުން އާންމުކޮށް ހަށިގަނޑުގެ މަސްތައް ފެންނަ ގޮތަށް ހެދުމަށްޓަކައި ހަށިގަނޑުން ފެން މަދުކުރެއެވެ. ޚާއްޞަކޮށް މުބާރާތްތަކުގެ ކުރިންނެވެ. މިގޮތަށް ހަށިގަނޑުން ފެން މަދުވުމުން ކިޑްނީއަށް ބުރަ ބޮޑުވެ، ކިޑްނީއަށް ގެއްލުން ލިބި ނުވަތަ ފެއިލްވެދާނެއެވެ.
ޕްރޮޓީން ގިނައިން ކެއުން:
ގިނަ ބޮޑީބިލްޑަރުން މަސްތައް ބޮޑުކުރުމަށްޓަކައި ގިނަ އަދަދަކަށް ޕްރޮޓީން ކައެވެ. ޕްރޮޓީން ގިނައިން ކެއުމުން ކިޑްނީގައި ހައިޕަރފިލްޓްރޭޝަން ކިޔާ ޙާލަތެއް މެދުވެރިވެދާނެއެވެ. މިކަމުގެ ސަބަބުން ދުވަސްވީ ވަރަކަށް ކިޑްނީއަށް ގެއްލުން ލިބިދާނެއެވެ.
އެހެނިހެން ޕަރފޯމަންސް އިތުރުކުރާ ބޭސްތަކުގެ ބޭނުން:
ސްޓެރޮއިޑްގެ އިތުރުން، ބޮޑީބިލްޑަރުން ގްރޯތް ހޯމޯން، ޑައިޔުރެޓިކްސް ނުވަތަ އެހެނިހެން ސަޕްލިމެންޓްތައް ފަދަ އެހެން ތަކެތި ބޭނުންކުރުމުގެ ސަބަބުން ވެސް ކިޑްނީގެ މަސައްކަތަށް ނޭދެވޭ އަސަރު ކުރެއެވެ.
މިއީ ޕްރޮފެޝަނަލް ޑޮކްޓަރޭޓް ރަފީއު ނަސީމް ފޭސްބުކްގައި ލިޔުއްވާފައިވާ ލިޔުމެކެވެ. މި ލިޔުމަށް އެއްވެސް އުނި އިތުރެއް ގެނެސްފައި ނުވާނެއެވެ.