އިންޑިއާ ގެ ނެޝަނަލް ޑިފެންސް ކޮލެޖް ގެ 23 މެމްބަރުންގެ ވަފްދެއް މިއަދު ހެނދުނު ޚާރިޖީ ވުޒާރާއަށް ޒިޔާރަތް ކުރައްވައިފިއެވެ.
އިންޑިއަން ފޮރިން ސަރވިސްގެ ޝްރީ ބިރެންދްރަ ސިންގ ޔާދަވް އިސްކޮށް ހުންނެވި އެން.ޑީ.ސީ. ގެ މި ވަފްދަށް ފޮރިން ސަރވިސް އިންސްޓިޓިއުޓް އޮފް މޯލްޑިވްސް (ފޮސިމް) އިން އިންތިޒާމް ކޮށްގެން ދިވެހިރާއްޖޭގެ ޚާރިޖީ ސިޔާސަތާ ގުޅޭގޮތުން މަޢުލޫމާތު ޙިއްޞާ ކުރުމަށް ބޭއްވުނު ސެޝަންގައި، އެ ވަފްދަށް މަރްޙަބާ ދަންނަވައި ފޮރިން ސެކްރެޓަރީ އަލްފާޟިލާ ފާތިމަތު އިނާޔާ ވާހަކަފުޅު ދެއްކެވިއެވެ.
އެން.ޑީ.ސީ. ގެ ވަފްދެއް އެންމެ ފަހުން ޚާރިޖީ ވުޒާރާއަށް ޒިޔާރަތް ކޮށްފައިވަނީ 2022 ވަނަ އަހަރެވެ. މިއަދު ޚާރިޖީ ވުޒާރާއަށް ޒިޔާރަތްކުރި އެން.ޑީ.ސީ. ގެ ވަފްދަކީ އެ ކޮލެޖްގެ 64 ވަނަ ބެޗަށް ނިސްބަތްވާ މެމްބަރުންގެ ވަފްދެކެވެ.
އަދި މިއަދުގެ ސެޝަންގައި ބައިވެރިންނަށް ފޮސިމް އާބެހޭގޮތުން ކުރު ތަޢާރަފް އެއް ފޮސިމް ގެ ހެޑް، އެޑިޝަނަލް ސެކްރެޓަރީ އަލްފާޟިލާ އާމިނަތު ޝަބީނާ ދެއްވިއެވެ.
މީގެއިތުރުން، ދިވެހިރާއްޖޭގެ ޚާރިޖީ ސިޔާސަތާގުޅޭ ޕްރެޒެންޓޭޝަން އެއް، ސީނިއަރ އަންޑަރ ސެކްރެޓަރީ އަލްފާޟިލް ޙަސަން ހުސެއިން ޝިހާބް ހުށަހަޅައިދެއްވިއެވެ. މި ބްރީފިންގ ސެޝަންގައި އެޑިޝަނަލް ސެކްރެޓަރީ އަލްފާޟިލާ ޢާއިޝަތު އަޒީމާ އާއި ޑިރެކްޓަރ އަލްފާޟިލް އަޙްމަދު ސަލްމާން ޒަކީ ވެސް ބައިވެރިވެވަޑައިގަތެވެ.