ދިވެހިރާއްޖެއިން ބަންގްލަދޭޝްއަށް ކަނޑައެޅުއްވި އާ ސަފީރު ޝިއުނީން ރަޝީދު، އެކަމަނާގެ ސަފީރުކަމުގެ ފަތްކޮޅު، ބަންގްލަދޭޝްގެ ރައީސް މުޙައްމަދު ޝަހާބުއްދީނަށް އަރުވައިފިއެވެ.
ސަފީރު ޝިއުނީންގެ ސަފީރުކަމުގެ ފަތްކޮޅު އެރުވީ ބަންގްލަދޭޝްގެ ޑާކާގައި ހުންނަ ބަންގާބަބާންގެ ރިޔާސީ ގަނޑުވަރުގައި މިއަދު ބޭއްވި ޚާއްސަ ރަސްމިއްޔާތެއްގައެވެ.
މި ރަސްމިއްޔާތަށްފަހު ދެބޭފުޅުން ބޭއްވި ބައްދަލުކުރެއްވުމުގައި ރައީސް ޝަހާބުއްދީން ވަނީ ސަފީރު ޝިއުނީންގެ ސަފީރުކަމުގެ މަސްއޫލިއްޔަތުތަކާ ހަވާލުވެވަޑައިގަތުމުން އެކަމަނާއަށް ހޫނު މަރުހަބާއެއް ވިދާޅުވެފައެވެ.
މި ބައްދަލުކުރެއްވުމުގައި ސަފީރު ޝިއުނީން ވަނީ ބަންގްލަދޭޝްގެ ރައީސާއި ރައްޔިތުންނަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ތަހުނިޔާ އަރިސްކުރައްވައިފައެވެ.
މީގެއިތުރުން ސަފީރު ޝިއުނީން ވަނީ ރާއްޖެއާއި ބަންގްލަދޭޝްއާ ދެ ގައުމުގެ ދެމެދުގައި އޮތް ޒަމާންވީ ގާތް ގުޅުން އިތުރަށް ބަދަހިކުރެއްވުމަށް ދިވެހި ސަރުކާރުން މަސައްކަތް ކުރާނެކަމުގެ ޔަގީންކަން ވެސް ދެއްވައިފައެވެ.