އަނިޔާއިން އެއްކިބާވެފައިވާ މާޙައުލެއްގައި ކުއްޖާ ހެދިބޮޑުވުމުގެ ފުރުސަތު ސަރުކާރުން ކަށަވަރުކޮށްދޭނެ ކަމަށް މެޑަމް ސާޖިދާ މުހައްމަދު ވިދާޅުވެއްޖެއެވެ.
މެޑަމް ސާޖިދާ މިފަދައިން ވިދާޅުވީ ކުޑަކުދިންގެ ހައްޤުތަކާއި ރައްކާތެރިކަމާއި ގުޅޭ ޤައުމީ ޕްލޭން އިފްތިތާހުކުރުމުގެ ރަސްމިއްޔާތުގައެވެ. މި ރަސްމިއްޔާތުގައި ސާޖިދާ ވިދާޅުވީ ކުޑަކުދިންނަށް ރައްކާތެރި މާހައުލެއް ޤާއިމުކުރުމަކީ ސަރުކާރުގެ ޒިންމާއެއް ކަމަށާއި އެ ޒިންމާގެ ދަށުން ކުޑަކުދިންގެ ހައްޤުތަކާއި ރައްކާތެރިކަމާއި ގުޅޭ ޤައުމީ ޕްލޭން އިފްތިތާހުކޮށްފައިވާއިރު ކަމާގުޅޭ މުއައްސަސާތަކަށް އެ މަގަށް މަސައްކަތްތައް ބައްޓަން ކުރައްވަން ފަސޭހަވެގެންދާނެ ކަމަށެވެ.
ކުޑަކުދިންނަށް ކުރާ އަނިޔާހުއްޓުވުމާއި، އެކަމަށް އިޖާބަދިނުމާ ބެހޭ ޤައުމީ އެކްޝަން ޕްލޭން އިފްތިތާޙްކުރުމާއެކު، ގިނަ މައްސަލަތަކެއް ހައްލުވެގެންދާނެކަމަށާއި އެޕްލޭނަކީ ހަމައެކަނި ޕޮލިސީއެއް ނޫން ކަމަށް ވެސް ސާޖިދާ ވިދާޅުވިއެވެ. އަދި ސާޖިދާ ވިދާޅުވީ މި ޕޮލިސީ އަކީ ކުޑަކުދިންނަށް ކުރާ އަނިޔާހުއްޓުވައި، ހިމާޔަތްކޮށް، އެކަމަށް އިޖާބަ ދޭނެ ގޮތްތައް ބަޔާންކުރާ، ވަރަށް ފުރިހަމަ ސާފު މަގުޗާޓެއް ކަމަށެވެ.
ސާޖިދާ ވިދާޅުވީ ކުޑަކުއްޖަކު އަނިޔާއިން އެއްކިބާވެފައިވާ މާޙައުލެއްގައި ހެދިބޮޑުވުމުގެ ފުރުސަތު ފަހިކޮށް، ޒިންމާދާރު ހަރުދަނާ ފަރުދަކަށް ހަދަންޖެހޭނެ. ކަމަށާއި މި ތަޞައްވުރު ގެނައުމަށްޓަކައި ބޭނުންވަނީ އެއްބައިވަންތަ މަސައްކަތެއް ކަމަށެވެ. އަދި މިކަމަށް ހޭލުންތެރިކަން އިތުރުކުރަން ޖެހޭ ކަމަށް ވެސް ވިދާޅުވިއެވެ.
މި ޕޮލިސީ އަކީ މި ޤައުމުގެ ކޮންމެ ކުއްޖަކީވެސް، ލިބޭ ގެއްލުމުން ސަލާމަތްވުމުގެ އިތުރުން، ރައްކާތެރި މާޙައުލެއްގައި ކުރިއެރުމުގެ ބާރު ލިބިގެންވާ ކުއްޖަކަށް ހެދުމަށް ޓަކައި ކޮންމެހެން ކުރަންޖެހޭ ދަތުރެއްގެ ފެށުން ކަމަށް ސާޖިދާ ވިދާޅުވިއެވެ.
"އެމީހުން ހިމާޔަތް ކުރުމަކީ އަޅުގަނޑުމެންގެ ވާޖިބެއް. "ކޮންމެ ކުއްޖަކަށް އާއިލާއެއް" މި ޝިއާރުގެ ދަށުން ދައްކުވައިދެނީ ކޮންމެ ކުއްޖަކަށްވެސް ލޯބިވާ އަޅާލާ ޢާއިލީ މާހައުލެއް ހޯދައިދިނުމަށް އަޅުގަނޑުމެން ސާބިތުކަމާއެކު ދެމިތިބޭނެކަން. ނަމަވެސް ހަމައެކަނި ލަފުޒުތަކުން ނުފުދޭ. ކުޑަކުދިންނަށް ކުރާ އަނިޔާއާއި ގޯނާގެ މައްސަލަތަކުގައި ވަގުތުން ފިޔަވަޅު އަޅަންޖެހޭނެ" ސާޖިދާ ވިދާޅުވިއެވެ.
މީގެ އިތުރުން ކުޑަކުދިންނަށް ލިބޭ އަނިޔާއިން ސަލަމާތް ކުރުމަކީ ހަމައެކަނި އެކަކުގެ ޒިންމާއެއް ނޫން ކަމަށާއި އެންމެން އެކުގައި މަސައްކަތްކޮށްގެން އެ މަޤްސަދު ހާސިލްކުރެއްވޭނެ ކަމަށް ވެސް ސާޖިދާ ވިދާޅުވިއެވެ.
މިއަދު މި އެކްޝަން ޕްލޭން އިފްތިތާހު ކުރައްވާފައިވާއިރު މި އެކްޝަން ޕްލޭންގެ ދަށުން މި މަސައްކަތް އިތުރަށް ހަރުދަނާ ކުރެވި ކުރިއަރައިގެންދާނެ ކަމަށް ސަރުކާރުން ބުނެފައިވެއެވެ. އަދި ކުޑަކުއްޖަކު ނުރައްކަލަށް ހުށަހެޅުމުގެ ކުރިން ދުރާލާ ކަންތައްތަކެއް ކުރެވި އެހީތެރިކަން ފޯރުކޮށްދެވޭނެ ނިޒާމެއް އެ ޕްލޭންގެ ދަށުން ޤާއިމުކުރެވިގެންދާނެއެވެ. އެގޮތުން ސަރުކާރުގެ އެންމެ މަތީ އިދާރާއިން ފެށިގެން މި މުޖުތަމައު ތެރޭ ކުޑަކުދިން ވަށައިގެންވާ އެންމެން ގުޅިގެން އެކުދިންގެ ރައްކާތެރިކަމަށް މަސައްކަތް ކުރެވޭނެ ޕްލެޓްފޯމެއް އެ އެކްޝަން ޕްލޭންގެ ދަށުން ލިބިގެންދާނެއެވެ.