ތަރުތީލުކޮށް ކީރިތި ޤުރްއާން ކިޔެވުމުގެ ޕްރޮގްރާމެއް މި މަހުގެ 6 ވަނަ ދުވަހު ފެށުމަށް ކީރިތި ޤުރްއާާނާބެހޭ މަރުކަޒުން ނިންމައިފިއެވެ.
މި ޕްރޮގްރާމަކީ ރައީސް ޑރ. މުޙައްމަދު މުޢިއްޒުގެ ޚާއްސަ އިރުޝާދުގެ ދަށުން އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދުގެ އިސްނެންގެވުމުގެ މަތިން ކުރިއަށްގެންދާ ޕްރޮގްރާމެކެވެ.
ކީރިތި ޤުރްއާނާބެހޭ މަރުކަޒުން ހާމަކުރި ގޮތުގައި މި ޕްރޮގްރާމުގައި ކިޔަވައިދެއްވާނީ ތަރުތީލުކޮށް ޤުރްއާން ކިޔަވަން ދަންނަ މޮޅެތި ޤާރީންނެވެ.
ކީރިތި ޤުރްއާނާބެހޭ މަރުކަޒާއި އިސްލާމީ ކަންތައްތަކާބެހޭ ވުޒާރާ ގުޅިގެން ކުރިއަށްގެންދަން ނިންމާފައިވާ މި ޕްރޮގްރާމް ކުރިއަށް ގެންދަން ހަމަޖެހިފައިވަނީ ކޮންމެ ހުކުރު ދުވަހެއްގެ ޢިޝާ ނަމާދަށްފަހު 20:00 އިން 21:00 އަށެވެ.
މި ޕްރޮގްރާމް ކުރިއަށްގެންދަން ނިންމާފައިވަނީ 10 އަހަރުން މަތީގެ ކޮންމެ ކުއްޖަކާއި ކޮންމެ މީހަކަށް ވެސް ބައިވެރިވެވޭ ގޮތަށެވެ.
ކީރިތި ޤުރްއާނާބެހޭ މަރުކަޒުން ހާމަކުރި ގޮތުގައި މި ޕްރޮގްރާމުގައި ބައިވެރިވެވޭނީ ގޫގްލް ފޯމެއް ފުރިހަމަކޮށްގެންނެވެ. އެ ފޯމް އެ މަރުކަޒުގެ ސޯޝަލް މީޑިއާ ޕްލެޓްފޯމުތަކުން ލިބޭނެ ކަމަށް އެ މަރުކަޒުން ވަނީ ބުނެފައެވެ.