ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަބަދުވެސް އިސްކަން ދެއްވަނީ ރާއްޖޭގެ މިނިވަންކަމަށް ބުރޫއަރާނެ އެއްވެސް ކަމަކަށް މި ފަސްގަނޑުގައި ޖާގަ ނުދެއްވުމަށް ކަމުގައި އެމަނިކުފާނުގެ ނައިބު ޙުސައިން މުޙައްމަދު ލަޠީފް މިއަދު ވިދާޅުވެއްޖެއެވެ.
ގައުމީ ދުވަހުގެ މުނާސަބާގައި ނައިބު ރައީސް ދެއްވި ޚިޠާބުގައި ވިދާޅުވީ މިއަދު ދިވެހި ސަރުކާރުގެ އެންމެ މުހިންމު އެއް ސިޔާސަތަކީ ދިވެހި ގައުމަށް އިސްކަންދިނުން ކަމަށެވެ. އަދި ރައީސުލްޖުމްހޫރިއްޔާ އަބަދުވެސް އިސްކަން ދެއްވަނީ ދިވެހިންގެ މިނިވަންކަމާއި އަމިއްލަވަންތަކަން ކަށަވަރުކޮށް ބޭއްވުމަށް ކަމަށާއި ރާއްޖޭގެ މިނިވަންކަމަށް ބުރޫއަރާނެ އެއްވެސް ކަމަކަށް މި ފަސްގަނޑުގައި ޖާގަ ނުދެއްވުމަށް ކަމަށެވެ.
މިއަދު އަޅުގަނޑުމެން ދިވެހީން އަޒުމު ކަނޑައަޅަންވީ މި އަމާޒަށް ވާސިލުވުމަށް.
މީގެއިތުރުން ނައިބު ރައީސް ވިދާޅުވީ ގައުމީ ދުވަހުގެ ބަތަލު ބޮޑު ތަކުރުފާނުގެ ޖިހާދަކީ ރާއްޖޭގެ މިނިވަންކަމުގެ ފަޚުރުވެރި ތާރީޚުގައި ލިޔެފައިވާ އެންމެ ކުލަގަދަ ޝަރަފުވެރި ވާހަކަ ކަމަށާއި ދިވެހި ގައުމުގެ ހައްގުގައި އެތަކުރުފާނު ކުރެއްވި ޖިހާދަކީ ހުރިހާ ޒަމާނަކަށް ވެސް ދިވެހި އުންމަތަށް ނަމޫނާއެއް ކަމަށެވެ.
މިއަދު ދިވެހިން އެއް ރޫހެއްގައި އަތާ އަތްގުޅައި އަޒުމު ކަނޑައަޅަންވީ މި ލޮބުވެތި ވަތަން މިނިވަންކަންމަތީ އަބަދުމެ ދަމަހައްޓައި ރާއްޖެއަކީ އަމިއްލަވަންތަ، މުސްތަގިއްލު، ސިޔާސީ ގޮތުންނާއި އިގުތިސާދީ ގޮތުން ވެސް މިނިވަން ގައުމެއްގެ ގޮތުގައި ބޭއްވުމަށް ހީވާގިކަމާއެކު މަސައްކަތް ކުރަން ކަމަށް ނައިބު ރައީސް ވިދާޅުވިއެވެ. އަދި ބޮޑުތަކުރުފާނުފަދަ ބަތަލުންގެ ހިއްމަތުން އިބްރަތް ހާސިލުކޮށް ގައުމުގެ ހައްގުގައި ޖިހާދުކުރާނެ ޚިދުމަތްތެރި ދަރިންތަކެއް ބިނާކުރުމަށް އަޒުމުކަނޑައަޅަންޖެހޭ ކަމަށް ވެސް ނައިބު ރައީސް ވިދާޅުވިއެވެ.
ނައިބު ރައީސް ވަނީ ބޮޑު ތަކުރުފާނާއި މި ގައުމުގެ ސިޔާދަތާއި ކަރާމާތުގެ ހައްގުގައި ޖިހާދުކުރެއްވި ކޮންމެ ދިވެހި ދަރިއަކަށް ސުވަރުގޭގެ ދާއިމީ ނިއުމަތް ލިބުމަށް ވެސް އެދިވަޑައިގެންފައެވެ.