މަނީ ލޯންޑަރިންގގެ ތުހުމަތުގައި ގިނަޢަދަދެއްގެ ޑޮލަރާއެކު އާންމުގޮތެއްގައި ރާއްޖެ އަންނަ އިންޑިއާ ރައްޔިތެއް ދިވެހިރާއްޖޭގައި ހައްޔަރުކޮށްފިއެވެ.
މި މައްސަލައިގައި ހައްޔަރުކޮށްފައިވަނީ އިންޑިއާއަށް ނިސްބަތްވާ 27 އަހަރުގެ ރަގޫބް ނިސްތާރު ހަލީމް ރަހުމާނު ކަމަށް ކްރިމިނަލް ކޯޓުން މިއަދު ނެރުނު މިމީހާގެ ބަންދު އަމުރުގައި ވަނީ ބުނެފައެވެ.
ކޯޓުއަމުރުގައި ފާހަގަކޮށްފައިވާ ކަންކަމަށް ބަލާލާއިރު އެންމެ ބޮޑަށް ފާހަގަކުރެވުނީ، ރަހުމާނަކީ ގިނަ ފަހަރު ރާއްޖެއަށް އައުމަށްފަހު ޖެހިގެން އަންނަ ދުވަހު ފުރާ މީހެއް ކަމަށް ބުނެފައި އޮތް ވާހަކައެވެ. މި ފަހަރު އޭނާ ހައްޔަރުކުރެވުނީ ގިނަ އަދަދެއްގެ ޑޮލަރާ އެކުގައި ކަމަށާއި އެ ފައިސާއަކީ އެހެން މީހަކު އޭނާއާ ހަވާލުކުރި އެއްޗެއްކަން އެނގޭ ލިޔެކިޔުންތަކެއް ފެނިފައިވާ ކަމަށް އަމުރުގައި ބުނެފައިވާއިރު އެ ފައިސާ ހޯދާފައިވާ ގޮތެއް ރަހުމާނަށް ބުނެދެވިފައެއް ނުވާކަންވެސް ފާހަގަކޮށްފައިވެއެވެ.
ރަޙްމާނުގެ އަތުން ފެނުނީ ކިހާ ޑޮލަރެއް ކަމަށް ކޯޓު އަމުރުގައި ހާމަކޮށްފައެެއް ނުވެއެވެ.
ރަހުމާނުގެ ޕާސްޕޯޓުން ނަން ބަދަލުކޮށްފައިވާކަން ވެސް ކްރިމިނަލް ކޯޓުގެ ބަންދު އަމުރުގައި ފާހަގަކޮށްފައިވެއެވެ. އޭނާގެ ދަތުރުތައް ކޮށްފައިވާ ގޮތުން ޝައްކު އުފެދޭ ކަންތައްތަކެއް ހުރުމާއި، މަނީ ލޯންޑަރިންގ ފަދަ ޖިނާއީ ބޮޑެތި ކުށްތަކުގެ ތުހުމަތު ކުރެވޭތީ، ކްރިމިނަލް ކޯޓުގެ މުއްދަތުކޮމިޓީއިން އަމުރު ކޮށްފައި ވަނީ ރަހުމާން 5 ދުވަހުގެ މުއްދަތަށް ކަސްޓޯޑިއަލް ޖަލެއްގައި ބަންދުކުރުމަށެވެ.
މަނީ ލޯންޑަރިންގެ ތުހުމަތުގައި ގިނަ އަދަދެއްގެ ޑޮލަރާއެކު އިންޑިއާގެ ރައްޔިތަކު ދިވެހިރާއްޖޭގައި ހައްޔަރު ކުރުމަކީ މާލީ ޖަރީމާތަކާ ދެކޮޅަށް މަސައްކަތްކުރުމުގައި ހުރި ގޮންޖެހުންތަކަށްވެސް ފަރުވާލެއް ނެތި، މިވަގުތު ރާއްޖޭގެ ވެރިކަމުގެ އޮނިގަނޑު ބަލަހައްޓައި ހިންގަވަން ހުންނެވި ވެރިފަރާތަކީ ގައުމުގައި މިފަދަ ބޮޑެތި ނޭއްގާނީ ޖަރީމާތަކަށް ފުރުސަތު ދެއްވާނެ ފަރާތެއް ނޫންކަމުގެ ވަރަށްވެސް ވަރުގަދަ ފޮނި ހެއްކެކެވެ.