އެސޯސިއޭޝަންތަކުގެ ތެރޭގައި ހިނގާ ކޮރަޕްޝަންގެ މައްސަލަތައް ހުއްޓުވުމަށް ގިނަ މަސައްކަތްތަކެއް ކުރެވިއްޖެ ކަމަށާއި އިތުރު މަސައްކަތްތައް ވެސް ކުރެވެމުންދާ ކަމަށް ކޮމިޝަނަރ އޮފް ސްޕޯޓްސް މުޙައްމަދު ޠަލާލް މިއަދު ވިދާޅުވެއްޖެެއެވެ.
ޠަލާލް މިހެން ވިދާޅުވީ ރައީސް އޮފީހުން މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަށް ޖަވާބުދެއްވަމުންނެވެ.
އެގޮތުން ޠަލާލް ވިދާޅުވީ އެސޯސިއޭޝަންތަކުގައި ހިނގާ ކޮރަޕްޝަންތައް ހުއްޓުވުމަށްޓަކައި ވަރަށް ގިނަ މަސައްކަތްތަކެއް މިއަހަރުތެރޭގައި ކުރިއަށްގެންދެވިފައިވާ ކަމަށެވެ.
ހަގީގަތުގައި ކޮރަޕްޝަން އެކުލެވިގެންވަނީ ހަމައެކަނި ފައިސާއެއް ނޫންކަން ފުރަތަމަ ގަބޫލުކުރަންޖެހޭ ކަމަށާއި އޭގެތެރޭގައި އިދާރީ ގޮތުން ނޫނީ އެސޯސިއޭޝަންގެ އެކިއެކި ކަންކަމުގައި އޮފިޝަލުން ނެގުމާއި މިކަންކަމުގެތެރޭގަ ވެސް ކޮރަޕްޝަން ހިމެނިގެންދާނެކަން ޠަލާލް ފާހަގަކުރެއްވިއެވެ.
އެހެންވީމަ އެސޯސިއޭޝަންތަކުގެ އެތެރޭގަ ހުރި އެސޯސިއޭޝަން ހިންގާ ގަވާއިދާއި އަދި އެސޯސިއޭޝަންގެ ތެރޭގަ ހުންނަ ސެލެކްޝަން ކްރައިިޓީރިއާއާއި ސުލޫކީ މިންގަނޑާއި މިކަންކަމާ ގުޅުންހުރި ގަވާއިދުތައް ބަލައި އެ ގަވާއިދުތަކަށް ގެންނަންޖެހޭ ބަދަލުތައް އެސޯސިއޭޝަންތަކާ އެއްކޮށް ވަރަށް ގާތުން މަސައްކަތްކޮށްގެން އެ ގެނައުމުގެ މަސައްކަތްތައް އަޅުގަނޑުމެން އެބަ ގެންދަން ކުރިއަށް.
ކޮރަޕްޝަން މަދުކުރުމަށް ކުރަމުންދާ މަސައްކަތަށް އަލިއަޅުވައިލައްވައި ދެއްކެވި ވާހަކަފުޅުގައި ޠަލާލް ވަނީ އެންޓި ކޮރަޕްޝަން ކޮމިޝަން (އޭސީސީ)އާއި ސްޕޓްސް މިނިސްޓްރީއާ ގުޅިގެން ދާދިފަހުން "ޕަޗަސް" ގެ ނަމުގައި ޕްރޮގްރާމެއް އިފުތިތާހުކުރިކަން ވެސް ފާހަގަކުރައްވައިފައެވެ.
ކުޅިވަރުގައި ނަޒާހަތްތެރިކަން ކުރިއެރުވުމުގެ ކެމްޕެއިން "ޕްރޮމޯޓިންގ އެންޓި ކޮރަޕްޝަން، އޮނެސްޓްލީ އެންޑް އެކައުންޓެބިލިޓީ އިން ސްޕޯޓްސް (ޕަޗަސް)" ޕްރޮގްރާމަކީ އޭސީސީއާއި މިނިސްޓްރީ ގުޅިގެން ކުޅިވަރުގެ ދާއިރާގައި ކޮރަޕްޝަނުން ސަލާމަތްކުރުމާއި، ކުޅިވަރުގައި ނަޒާހަތްތެރިކަން ކުރިއެރުވުމުގެ މަގުސަދުގައި އިފުތިތާހުކޮށްފައިވާ ޕްރޮގްރާމެކެވެ.