އެޑިއުކޭޝަން މެލޭޝިއާ ގްލޯބަލް ސާވިސް އަދި ހަޔާ އެޑިއުކޭޝަން މިނިސްޓްރީ އާއި ދެމެދު އެއްބަސްވުމެއް ގައި ސޮއިކޮށްފިއެވެ.
މި އެއްބަސްވުމުގައި ހަޔަ އެޑިއުކޭޝަންގެ ފަރާތުން މިނިސްޓަރު ޑރ. މަރިޔަމް މާރިޔާ ސޮއި ކުރައްވާފައިވާއިރު އެޑިއުކޭޝަން މެލޭޝިއާ ގްލޯބަލް ސާވިސްގެ ފަރާތުން ސޮއިކުރެއްވީ ސީއީއޯ ނޯވީ ތާޖުއްދީނެވެ.
ރާއްޖެއާއި މެލޭޝިއާގެ މަތީ ތައުލީމާއި ތަމްރީނުގެ ފެންވަރު މަތިކޮށް، ދެ ގައުމުގެ އެކި ކަންކޮޅުތަކަށް ފުޅާ ދާއިރާއެއްގައި މަތީ ތައުލީމު ފޯރުކޮއްދިނުމަކީ މި އެއްބަސްވުމުގެ މަގުސަދެވެ. މި އެއްބަސްވުމުގެ ދަށުން އެއްބަސްވުމުގައި ބަޔާންކޮށްފައިވާ މަތީ ތައުލީމު ފޯރުކޮށްދޭ މަރުކަޒުތަކުގައި ކިޔެވުމަށް އެދި ހުށަހަޅާ ދަރިވަރުންނަށް މާލީ އެހީ ނުވަތަ ޑިސްކައުންޓް ފޯރުކޮއްދިނުމަށް ވެސް ހަމަޖެހިފައިވެއެވެ.
މި އެއްބަސްވުމުގެ ދަށުން ރާއްޖެއަށް 561 ސްކޮލަޝިޕް ފުރުސަތު ހުޅުވާލުމަށް ހަމަޖެހިފައިވެއެވެ. އޭގެތެރޭގައި ފަސް ދާއިރާއެއް ހިމެނެއެވެ.
ސްކޮލާސްޝިޕް ދިނުމަށް ހަމަޖެހިފައިވާ 5 ދާއިރާ:
– އާޓްސް އެންޑް ހިއުމެނިޓީސް: 75 ސްކޮލަޝިޕް
– އިންޖިނިއަރިން އެންޑް ޓެކްނޮލޮޖީ: 150 ސްކޮލަޝިޕް
– ލައިފް ސައިންސަސް އެންޑް މެޑިސިން: 63 ސްކޮލަޝިޕް
– ނެޗުރަލް ސައިންސަސް: 11 ސްކޮލަޝިޕް
– ސޯޝަލް ސައިންސެސް އެންޑް މެނޭޖްމަންޓް: 255 ސްކޮލަޝިޕް
– އެހެނިހެން: 7 ސްކޮލަޝިޕް
މި ސްކޮލަޝިޕްގެ ދަށުން މެލޭޝިއާގެ ޔުނިވަސިޓީތަކުން ދަރިވަރުންނަށް 70 އިންސައްތައާ ހަމައަށް ޓިއުޝަން ފީން ބޮޑެތި ޑިސްކައުންތަކުގެ އިތުރުން މެލޭޝިއާ އަށް މިހާރު އަމިއްލައަށް ލޯނު ނަގައިގެން ކިޔަވަން ދާން ހަމަޖައްސާފައިވާ ދަރިވަރުންނަށް ވެސް މި ފުރުސަތުގައި، ބައިވެރިވެ ޓިއުޝަން ފީން ބޮޑެތި ޑިސްކައުންޓްތައް ހޯދުމުގެ ފުރުސަތު ލިބޭނެއެވެ.
ރާއްޖޭގެ ތަރައްގީއަށް ބޭނުންވާ ޒުވާނުންގެ ޖީލެއް ބިނާކުރުމަކީ ސަރުކާރުގެ މުހިންމު މަގުސަދެއް ކަމަށާއި މި ފުރުސަތުގެ ސަބަބުން މުހިންމު ދިރާސާތަކާއި އިޖާދީ ވިސްނުންތަކަށް ކުދިން ވަދެ، ގައުމުގެ ތަރައްގީ ކުރުމުގައި ބައިވެރިވާނެ ޒުވާނުންތަކެއް އުފެދޭނެ ކަމަށް މިނިސްތަރު މާރިޔާ ވިދާޅުވެފައިވެއެވެ.