ދިވެހި ދައުލަތަށް ދިގު މުއްދަތެއް ވަންދެން ޚިދުމަތްކުރެއްވި ޢަބްދުލްޢަޒީޒް ޢަބްދުﷲ އަވަހާރަވުމުގެ ހިތާމައިގައި ރައީސް ޑރ. މުޙައްމަދު މުޢިއްޒު ތައުޒިޔާ ވިދާޅުވެއްޖެއެވެ.
އެކްސްގައި ކުރެއްވި ޕޯސްޓެއްގައި ރައީސް ޑރ. މުޢިއްޒު ވިދާޅުވީ ޢަބްދުލްޢަޒީޒަކީ ދިވެހި ދައުލަތަށް 45 އަހަރަށްވުރެ ދިގު މުއްދަތަކު ޚިދުމަތްކުރައްވައި، ދައުލަތަށް ޚިދުމަތްކުރުމުގެ އިނާމު ހާސިލު ކުރައްވާފައިވާ، އަދި ރައްޔިތުންގެ މަޖިލީހުގެ މެންބަރުކަމާއި، އަތޮޅުވެރިކަން ވެސް ކުރައްވާފައިވާ ބޭފުޅެއް ކަމަށެވެ.
މިކަންކަން ފާހަގަ ކުރެއްވުމަށްފަހު ރައީސްގެ ތައުޒިޔާގެ މެސެޖުގައިވަނީ ޢަބްދުލްޢަޒީޒް އަވަހާރަވުމުގެ ހިތާމައިގާ ބައިވެރިވެ، އެ މަރުހޫމްގެ އާއިލާއަށް ތައުޒިޔާ ވިދާޅުވެފައެވެ.
މާތް ﷲ ގެ ރުއްސެވުމާއި ފުއްސެވުމުގައި، ސުވަރުގޭގެ ދާއިމީ ނިޢުމަތުގައި މަރުހޫމް ޢަބްދުލްޢަޒީޒް ޢަބްދުﷲ ލަހައްޓަވާށިއެވެ. އާމީން. ރައީސްގެ ޕޯސްޓު ނިންމަވައިލައްވަމުން ލިޔުއްވާފައިވެއެވެ.
ޢަބްދުލްޢަޒީޒް ދިވެހި ދައުލަތަށް ޚިދުމަތް ކުރައްވަން ފެށްޓެވީ 25 ޖުލައި 1959 ގައެވެ. އޭނާ ވަޒީފާއިން ރިޓަޔަރ ކުރެއްވީ
1 މޭ 2008 ގައެވެ.
ޢަބްދުލްޢަޒީޒް އަދާކުރެއްވި މަގާމުތައް:
- މަޙްކަމަތުލް އަޝްޣާލްގެ ވަގުތީ ކާތިބުކަން
- ވުޒާރަތުލް މާލިއްޔާ (ހ) 2 ގެ ވަގުތީ ކާތިބުކަން
- ވުޒާރަތުއްދާޚިލިއްޔާގެ ހުވަދުއަތޮޅުގޭ ވަގުތީ ކާތިބުކަން
- ވުޒާރަތުއްދާޚިލިއްޔާ (ނ) ގެ ވަގުތީ 2 ނަންބަރު ކާތިބުކަން
- ޑިޕާޓްމަންޓް އޮފް ހޯމް އެފެއާޒްގެ 1 ނަންބަރު ކާތިބުކަން ރައީސް އޮފީހާއި، އޮފީސް އޮފް ދަ ޕްރައިމް މިނިސްޓަރުގެ 1 ނަންބަރު ކާތިބުކަން
- ރައީސް އޮފީހުގެ ސެކްރެޓެރީކަން
- ޏ.އަތޮޅު އަތޮޅުވެރިކަން
- ގަވަރންމަންޓް ހޮސްޕިޓަލްގެ ސެކްރެޓެރީކަން
- މިނިސްޓްރީ އޮފް ޕްރޮވިންޝަލް އެފެއާޒްގެ އަތޮޅުވެރިޔާގެ ބަދަލުގެ މަގާމު
- މިނިސްޓްރީ އޮފް ޕްރޮވިންޝަލް އެފެއާޒްގެ އެސިސްޓެންޓް އަންޑަރ ސެކްރެޓެރީކަން
- މިނިސްޓްރީ އޮފް އެޓޮލްސް އެޑްމިނިސްޓްރޭޝަންގެ އެސިސްޓެންޓް އަންޑަރ ސެކްރެޓެރީކަން އަދި އެ މިނިސްޓްރީގެ ވަކީލުކަމާއި ސީނިއަރ އަންޑަރ ސެކްރެޓެރީ ކަމާއި، ޑިރެކްޓަރުކަން
- އިލެކްޝަންސް ޑިވިޜަންގެ އެސިސްޓެންޓް ކޮމިޝަނަރުކަން.
- ސެލެކްޓެޑް އައިލެންޑްސް ޑިވެލޮޕްމަންޓް ޔުނިޓާއި، މާލޭ ހައުސިންގ އެންޑް އާރބަން ޑިވެލޮޕްމަންޓް ބޯޑުގެ ސީނިއަރ ޕްރޮޖެކްޓް ކޯޑިނޭޓަރުކަން
- އަމީނިއްޔާ ސްކޫލްގެ ސީނިއަރ އެޑްމިނިސްޓްރޭޓިވް ކޯޑިނޭޓަރުކަން
- މިނިސްޓްރީ އޮފް އެޓޮލްސް އެޑްމިނިސްޓްރޭޝަންގެ ޑިރެކްޓަރުކަން އަދި އެ މިނިސްޓްރީގެ އެސިސްޓެންޓް ޑިރެކްޓަރ ޖެނެރަލް ކަމުގެ މަގާމާއި، ޑެޕިއުޓީ ޑިރެކްޓަރ ޖެނެރަލްކަން
- ރައްޔިތުންގެ މަޖިލީހުގެ ޏ.އަތޮޅުގެ މެންބަރު ކަމާއި، ރައްޔިތުންގެ މަޖިލީހުގެ ޚާއްސަ މަޖިލީހުގެ ޏ.އަތޮޅު މެންބަރުކަން
ޢަބްދުލްޢަޒީޒް ރިޓަޔަރ ކުރެއްވިއިރު ހުންނެވީ، މިނިސްޓްރީ އޮފް އެޓޮލްސް ޑިވެލޮޕްމަންޓުގެ އެސިސްޓެންޓް އެގްޒެކެޓިވް ޑިރެކްޓަރ ކަމުގެ މަގާމުގައެވެ.