ލައިސަންސް ނެތި ހިޖާމާއާއި ދިވެހި ބޭހުގެ ޚިދުމަތް ދޭ ފަރާތްތަކާމެދު ޤާނޫނީ ފިޔަވަޅު އަޅާނެކަމުގެ އިންޒާރު ދީފިއެވެ.
މިއަދު ނެރުނު އިޢުލާނެއްގައި، ސިއްހީ ވުޒާރާ ބުނި ގޮތުގައި، ރާއްޖޭގައި އެއްވެސް ބާވަތެއްގެ ޞިއްޙީ ޚިދުމަތެއް ދޭންވާނީ ޞިއްޙީ ޚިދުމަތް ދިނުމުގެ ޤާނޫނުގެ ދަށުން ހަދާފައިވާ ގަވާއިދުގައި ބަޔާންކޮށްފައިވާ ގޮތުގެ މަތިން، ޞިއްޙީ ޚިދުމަތްދޭ ތަންތަން ރަޖިސްޓަރީކޮށް، އޮޕަރޭޓިންގ ލައިސަންސް ހޯދުމަށްފަހުގައެވެ.
އެހެންނަމަވެސް، މި ޤާނޫނާ ޚިލާފަށް، މިހާރަކަށް އައިސް އޯލްޓަނޭޓިވް ބޭސްފަރުވާގެ ޚިދުމަތް، ޚާއްޞަކޮށް ދިވެހި ބޭހާއި ހިޖާމާގެ ޚިދުމަތް ދެމުންދާކަން ފާހަގަކުރެވިފައިވާ ކަމަށް މިނިސްޓްރީން ބުންޏެވެ.
ރަޖިސްޓަރީ ނުކޮށް އަދި ލައިސަންސް ނެތި އެއްވެސް ބާވަތެއްގެ ޞިއްޙީ ޚިދުމަތެއް ރާއްޖޭގައި ދިނުމަކީ ކުށެއްކަމުގައިވާތީ، އެފަދަ ފަރާތްތަކާމެދު ޞިއްޙީ ޚިދުމަތް ދިނުމުގެ ޤާނޫނުގެ ދަށުން ފިޔަވަޅު އަޅާނެކަމަށް ހެލްތު މިނިސްޓްރީން ވަނީ އިންޒާރު ދީފައެވެ.
މި އިޢުލާނަކީ ރާއްޖޭގައި ދެމުންދާ ޞިއްޙީ ޚިދުމަތްތައް ޤާނޫނީ އިމުގެ ތެރެއިން ބެލެހެއްޓުމަށާއި، ރައްޔިތުންނަށް ރައްކާތެރި އަދި ފެންވަރު ރަނގަޅު ޚިދުމަތްތަކެއް ކަށަވަރުކުރުމަށް އަޅާ ފިޔަވަޅެއްގެ ގޮތުގައި ބެލެވެއެވެ.
މިއިއުލާނާއެކު މިފަދައިން ލައިސަންސް ނެތި ގާނޫނާ ހިލާފަށް ފުޅާދާއިރާއެއްގައި ހިޖާމާގެ ހިދުމަތްދެމުން ގެންދިޔަ ފަޒީސް ހިޖާމާ ތެރަޕީ ބަންދު ކުރުމަށް ސަރުކާރުން ވަނީ މިއަދު އަންގާފައެވެ.