ދިވެހިންގެ ފަޚުރުވެރި ތާރީޚުގެ އެންމެ ބޮޑު ހެކިވެރިޔަކީ ކާބަފައިން ދޫކޮށްފައިވާ އާސާރީ ތަރިކަތައް ކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ މިއަދު ފާހަގަކުރާ ގައުމީ ތަރިކައިގެ ދުވަހުގައި އެކްސްގައި ކުރެއްވި ޕޯސްޓެއްގައެވެ.
އެމަނިކުފާނުގެ ޕޯސްޓުގައި ވިދާޅުވެފައިވަނީ ދިވެހި ގައުމުގެ މިނިވަންކަމާއި، އަމިއްލަވަންތަކަމާއި، ފަޚުރުވެރި ތާރީޚުގެ އެންމެ ބޮޑު ހެކިވެރިޔަކީ ކާބަފައިން ދޫކޮށްފައިވާ އާސާރީރ ތަރިކަތައް ކަމަށެވެ.
ކޮންމެ އަހަރެއްގެ ސެޕްޓެންބަރު 12 ވަނަ ދުވަހަކީ ދިވެހިރާއްޖޭގެ ގައުމީ ތަރިކަ ދުވަހުގެ ގޮތުގައި ފާހަގަކުރުމަށް ސަރުކާރުން ނިންމެވީ މިދިޔަ އަހަރުއެވެ.
ގައުމީ ފެންވަރެއްގައި ތަރިކައިގެ ދުވަހެއް ކަނޑައެޅީ ދިވެހި ކާބަފައިންގެ ފަރާތުން ވާރުތަވަމުން އައިސްފައިވާ ތަރިކަތައް އަމާނާތްތެރިކަމާ އެކު އަދުގެ ޖީލަށާއި ކުރިއަށް އޮތް ޖީލުތަކަށް ވާސިލުކޮށްދިނުމަށާއި މި ކަމަށް ހޭލުންތެރިކަން އިތުރުކުރުމަށް ކުރަންޖެހޭ މަސައްކަތްކޮށް، ތަރިކައާމެދު ޝައުގުވެރިކަން އުފެއްދުމުގެ މަގުސަދުގައެވެ.
މި ސަރުކާރުން މިހާރު ވަނީ ދިވެހި ބަހާއި ތާރީޚާއި ސަގާފަތް ދިރުވަން ވަނީ މުހިންމު މަސައްކަތްތަކެއް ފަށާފައެވެ.