ރާއްޖެއަށް ވޭޕް އެތެރެ ކުރުން މަނާކޮށްދިނުމަށް އެދި އެންސީޑީ އެލަޔަންސް އިން ރައީސް، ޑރ. މުހައްމަދު މުއިއްޒުގެ އަރިހުގައި އެދިއްޖެއެވެ. މި އެދުމަކީ ރާއްޖޭގައި ގައިންގަޔަށް ނާރާ ބަލިތަކުގެ ނުރައްކާތެރިކަން އިތުރުވަމުން ދިއުމާ ގުޅިގެން އެޅޭ ފިޔަވަޅެކެވެ.
ގައިންގަޔަށް ނާރާ ބަލިތަކާ ދެކޮޅަށް މަސައްކަތްކުރާ މޯލްޑިވްސް އެންސީޑީ އެލަޔަންސްއަކީ ހަތް ޖަމިއްޔާއެއް ގުޅިގެން އުފައްދާފައިވާ ޖަމިއްޔާއެކެވެ. މި ޖަމިއްޔާގެ ފަރާތުން ބުނެފައިވަނީ ރާއްޖޭގައި މަރުވާ މީހުންގެ 84 އިންސައްތަ މީހުން ދުނިޔެ ދޫކުރަން ޖެހިފައިވަނީ ގައިންގަޔަށް ނާރާ ބައްޔެއްގައިކަމަށެވެ. އަދި ދުންފަތާއި ދުންފަތުގެ ބާވަތްތަކަކކީ މިފަދަ ބަލިތައް މެދުވެރިކުރާ އެންމެ ބޮޑު ހިރާސް ކަމުގައި ވެސް އެ ޖަމިއްޔާއިން ވަނީ ފާހަގަކޮށްފައެވެ.
ވޭޕް އަދި އީ-ސިނގިރޭޓަކީ ވެސް ދުންފަތުގެ ބާވަތެއް ކަމުގައި ސިއްހަތު ޖަމިއްޔާއިން ކަނޑައަޅާފައިވާއިރު، ރާއްޖޭގައި މިފަދަ ތަކެތި އިސްތިއުމާލު ކުރުން ވޭތުވެދިޔަ އަހަރުތަކުގައި އިންތިހާއަށް އިތުރުވެފައިވާކަން އެންސީޑީ އެލަޔަންސްއިން ވަނީ ފާހަގަކޮށްފައެވެ. މި ތަކެތީގެ ސަބަބުން ގައިންގަޔަށް ނާރާ ބަލިތަކަށް ހުށަހެޅޭ މިންވަރު އިތުރުވެ، ސިއްހީ ގޮތުން ނޭދެވޭ އެތަކެއް އަސަރުތަކެއް ހަށިގަނޑަށް ކުރަމުންދާކަމަށް އެ ޖަމިއްޔާއިން ބުނެފައިވެއެވެ.
އިތުރުން، ވޭޕްގައި ތަފާތު ފްލޭވާތައް ބޭނުންކުރުމުގެ ސަބަބުން ދުންފަތުގައި ހިތި ރަހަ ގެއްލި، ޒުވާނުން އެކަމަށް ދެވިހިފުމުގެ ފުރުސަތު އިތުރުވާކަމަށް އެންސީޑީ އެލަޔަންސްއިން ވަނީ ފާހަގަކޮށްފައެވެ. މިކަމުގެ ސަބަބުން ޅަފަތުގައި ކުދިން ދުންފަތަށް ހުށަހެޅި، ދުންފަތުގެ އިސްތިއުމާލު ފުރަތަމަ ކުރެވޭ އުމުރު ދަނީ ދަށްވަމުންކަމަށް ވެސް އެ ޖަމިއްޔާއިން ބުނެފައިވެއެވެ.
މިހާރު ދުނިޔޭގެ 34 ގައުމެއްގައި ވޭޕް މަނާކޮށްފައިވާކަން ފާހަގަކޮށް، ރާއްޖޭގައި ވެސް އެތަކެތި މަނާ ކުރުމަށް އަވަސް ފިޔަވަޅުތަކެއް އަޅުއްވައިދެއްވުމަށް އެދި އެންސީޑީ އެލަޔަންސްއިން ވަނީ ކަމާ ބެހޭ އިދާރާތަކަށް އިލްތިމާސްކޮށްފައެވެ. މިކަމުގެ ސަބަބުން ރާއްޖޭގެ ސިއްހީ ހާލަތު ރަނގަޅުވެ، ގައިން ގަޔަށް ނާރާ ބަލިތަކަށް ހުށަހެޅޭ މިންވަރު މަދުވެ، ޒުވާނުން މަސްތުވާތަކެއްޗަށް ދެވިހިފުމުގެ ފުރުސަތު ކުޑަވެގެންދާނެ ކަމަށް އެ ޖަމިއްޔާއިން ވަނީ ފާހަގަކޮށްފައެވެ.
އެންސީޑީ އެލަޔަންސްގައި ހިމެނޭ ޖަމިއްޔާތަކުގެ ތެރޭގައި ކެންސަރ ސޮސައިޓީ އޮފް މޯލްޑިވްސް، ދައިބިޓިސް ސޮސައިޓީ އޮފް މޯލްޑިވްސް، ޓައިނީ ހާރޓްސް އޮފް މޯލްޑިވްސް، ސޮސައިޓި ފޯ ހެލްތް އެޑިއުކޭޝަން، މޯލްޑިވިއަން ތެލެސީމިއާ ސޮސައިޓީ، މެންޓަލް ހެލްތް އެވެއަރނަސް ފައުންޑޭޝަން، މޯލްޑިވްސް އެސޯސިއޭޝަން އޮފް ޕަރސަންސް ވިތް ޑިސޑިސްއެބިލިޓީސްގެ އިތުރުން މޯލްޑިވިއަން ރެޑްކްރެސެންޓް ހިމެނެއެވެ.
މި މައްސަލައާ ގުޅިގެން ރައީސް އޮފީހުން އަދި ވަކި ބަޔާނެއް ނެރެފައި ނުވިނަމަވެސް، މި މައްސަލައަކީ ރާއްޖޭގެ ސިއްހީ ދާއިރާއަށް ވަރަށް މުހިންމު މައްސަލައެއްކަން ފާހަގަކުރެވެއެވެ. ރާއްޖޭގައި ވޭޕް އެތެރެކުރުން މަނާކުރުމުގެ ނިންމުމަކީ ގައުމުގެ ސިއްހަތާއި ދުޅަހެޔޮކަމަށް ވަރަށް ބޮޑު އަސަރެއް ކުރާނެ ނިންމުމެއް ކަމަށްވާތީ، މި މައްސަލައާ ގުޅޭގޮތުން ސަރުކާރުން އަޅާނެ ފިޔަވަޅުތަކަށް ގިނަ ބަޔަކު ވަނީ ޝައުގުވެރިކަމާއެކު ބަލަމުންނެވެ.