ބޭރު ފައިސާއިން އާމްދަނީ ލިބޭ ފަރާތްތަކުން އިންކަމް ޓެކްސް ޑޮލަރުން ދައްކަންޖެހޭ ގޮތަށް ގަވާއިދު އިސްލާހުކޮށްފި އެވެ.
މީރާއިން މިއަދު ނެރުނު ބަޔާނެއްގައި ބުނީ ބޭރު ފައިސާއިން އާމްދަނީ ލިބޭ ފަރާތްތަކުން އިންކަމް ޓެކްސް ގާނޫނު ދަށުން ހުށަހަޅާ ޓެކްސް ބަޔާންތައް ޑޮލަރުން ތައްޔާރު ކުރުމަށާއި، އެ ގާނޫނުގެ ދަށުން ދައްކަންޖެހޭ ޓެކްސްތައް ޑޮލަރުން ދައްކާ ގޮތަށް އާމްދަނީ ޓެކްސް ނެގުމުގެ ގަވާއިދު އިސްލާހު ކޮށްފައިވާ ކަމަށެވެ.
މި އިސްލާހުގައި ވާ ގޮތުގައި، އެ ފަރާތެއްގެ ފަންކްޝަނަލް ކަރަންސީއަކީ ބޭރުގެ ފައިސާއެއް ނަމަ އެ ފަރާތެއްގެ އިންކަމް ޓެކްސް ބަޔާނާއި އިންޓެރިމް ބަޔާންތައް ތައްޔާރުކޮށް، އިންޓެރިމް ޕޭމަންޓާއި އިންކަމް ޓެކްސް ވެސް ދައްކަން ވާނީ އެމެރިކާ ޑޮލަރުންނެވެ.
މީގެއިތުރުން ދިވެހިރާއްޖޭގައި ވަޒަންވެރިވެފައިނުވާ އެފަދަ ފަރާތްތަކުގެ ވިތުހޯލްޑިން ޓެކްސާއި މުވައްޒަފުންގެ ވިތުހޯލްޑިން ޓެކްސް އަދި ކެޕިޓަލް ގެއިންސް ވިތުހޯލްޑިން ޓެކްސް ވެސް ދައްކަން ވާނީ ޑޮލަރުން ކަމަށް މީރާގެ ބަޔާނުގައި ވަނީ ބުނެފަ އެވެ.
ވިތުހޯލްޑިން ޓެކްސްތައް ޑޮލަރުން ދައްކަން ޖެހޭ ގޮތަށް ލާޒިމްވާނީ އަންނަ ނޮވެމްބަރު މަހުން ފެށިގެންނެވެ.
މިއީ ޑޮލަރުގެ ތާށިކަމާހެދި ކެބިނެޓުން އެގޮތަށް ނިންމުމާ ގުޅިގެން ގެނެސްފައިވާ އިސްލާހެކެވެ. ކެބިނެޓުން އެގޮތަށް ނިންމީ މިދިޔަ މަހު އެވެ.
މީގެއިތުރުން ޑޮލަރުން އާމްދަނީ ލިބޭ ކުންފުނިތަކުން ޕެންޝަން ފައިސާ އާއި ކަސްޓަމްސް ޑިއުޓީ ވެސް ޑޮލަރުން ދޭން ޖެހޭ ގޮތަށް ކެބިނެޓުން ނިންމާފައިވެ އެވެ.