ރާއްޖޭގައި މަސައްކަތް ކުުރުމަށް ގެންނަ ބިދޭސީން ބައިތިއްބަނީ އާއްމު ސަލާމަތަށް ނުރައްކާ ނުވާނެ ތަންތަނުގައި ކަން އެމްޕްލޮޔަރުން ކަށަވަރުކުރަންޖެހޭ ކަމަށް ކޮންޓްރޯލަރ އޮފް އިމިގުރޭޝަން މުޙައްމަދު ޝަމްޢާން ވަޙީދު މިރޭ ވިދާޅުވެއްޖެއެވެ.
އެކްސްގައި ކުރެއްވި ޕޯސްޓެއްގައި ޝަމްޢާން ވިދާޅުވީ ރާއްޖެއަށް އެކިއެކި މަސައްކަތް ކުުރުމަށް ގެންނަ ބިދޭސީންގެ ކެއުމާއި ބޯހިޔާވަހިކަން ކަށަވަރު ކުރުމަކީ އެ ފަރާތްތައް ރާއްޖެއަށް ގެންނަ އެމްޕްލޮޔަރުގެ ޒިންމާއެއް ކަމަށެވެ.
ޝަމްޢާން ވަނީ މަސައްކަތްތެރިން ބައިތިއްބަނީ އާއްމު ސަލާމަތަށް ނުރައްކާ ނުވާނެ ފަދަ ތަންތަނަުގައި ކަން ކަށަވަރު ކުރުމަށް އިލްތިމާސް ކުރައްވައިފައެވެ.
މީގެއިތުރުން މިފަދަ ތަންތަނުގައި ކެއްކުން ފަދަ ކަންކަން ކުރާއިރު، ރައްކާތެރިކަމުގެ އެންމެހާ ފިޔަވަޅުތައް އަޅާފައިވާކަން ކަށަވަރުކުރުމަށް ވެސް ޝަމްޢާން އިލްތިމާސް ކުރެއްވިއެވެ.
މާލޭގައި ބިދޭސީންގެ ބަޔަކު ކެއްކުމަށް ބޭނުންކުރި ތަނެއް، މި ތަނުގައި ރައްކާތެރިކަމުގެ ފިޔަވަޅުތައް އަޅާފައެއްނުވޭ. ފޮޓޯ: އިމިގުރޭޝަން
އާންމު ސަލާމަތާއި ރައްކާތެރިކަމަށް ބެލުމެއް ނެތި، ގަވާއިދާ ޚިލާފަށް އުޅޭ ބިދޭސީންނަށް އަމާޒުކޮށް އިމިގުރޭޝަނުން މިހާރު އަންނަނީ ޚާއްސަ އޮޕަރޭޝަނެއް ވެސް ހިންގަމުންނެވެ. މި އޮޕަރޭޝަންގައި މާލޭގެ 10 އަށްވުރެ ގިނަ ގެއެއް ބަލައި ފާސްކޮށް، 30 އަށްވުރެ ގިނަ ބިދޭސީން ވަނީ އިމިގްރޭޝަންގެ އިދާރާގެ ބެލުމުގެ ދަށަށް ގެންގޮސްފައެވެ.