”އިމާރާތްކުރުމުގެ ދާއިރާގައި މަސައްކަތްކުރާ ފަންނުވެރިންގެ ގަވާއިދު” އަށް ގެންނަން ހުށަހަޅާ 7 ވަނަ އިސްލާހުގެ ދެލިކޮޕީއަށް އާންމުންގެ ޚިޔާލު ފާޅުކުރުމަށް މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރއިން ފުރުސަތު ހުޅުވާލައިފިއެވެ.
އިމާރާތްކުރުމުގެ ގާނޫނުގެ ދަށުން އެކުލަވާލާފައިވާ މި ގަވާއިދަށް ގެންނަން ހުށަހަޅާ 7 ވަނަ އިސްލާހުގެ ދެލިކޮޕީ މިހާރު ވަނީ މިނިސްްޓްރީން އިއްޔެ ގެޒެޓްކުރި އިއުލާނާއެކު އާންމުކޮށްފައެވެ.
މިނިސްޓްރީން ބުނީ މި އިސްލާހަށް ޚިޔާލު ފާޅުކުރުމަށް އާންމުކޮށް ހުޅުވާލާފައިވާ ކަމަށެވެ.
މި އިސްލާހަކީ ޕްރެކްޓިޝަނަރުން ރަޖިސްޓްރީކުރުމުގައި މި ވަގުތު ހުރި ދަތިތައް ހައްލުކުރުމަށްޓަކައި ގެނެވޭ އިސްލާހެއް ކަމަށާއި އަދި މުޅި ގަވާއިދު މުޠާލިޔާކުރުމުގެ މަސައްކަތް ކުރިއަށް ރާވާފައިވާ ކަމަށް މިނިސްޓްރީން ބުންޏެވެ.
އެހެންކަމުން މި ގަވާއިދުގެ އިސްލާހަށް ގެންނަން ފެންނަ ޚިޔާލެއް ނުވަތަ ލަފައެއް އޮތްކަމުގައިވާނަމަ އެ މިނިސްޓްރީގެ ކޮންސްޓްރަކްޝަން ރެގިއުލޭޝަންސް އެންޑް ސްޓޭންޑަރޑްޒް ސެކްޝަނުގެ crss.cidd@infrastructure.gov.mv އީމެއިލް އެޑްރެހަށް މި 25 ވަނަ ދުވަހުގެ ކުރިން ފޮނުވުމަށް ވަނީ އެދިފައެވެ.