ރާއްޖޭގެ އުތުރުގައި ބަންކަރިން ހިދުމަތް ފެށުމުގެ ގޮތުން މި މަހުގެ 20 ވަނަ ދުވަހަށް ވަމުންދާ ތައްޔާރީތަކާއެކު ދެވަނަ ބޯޓް ރާއްޖޭގައި ބަނދަރުކޮށްފިއެވެ.
އިހަވަންދިއްޕޮޅުގައި "މޯލްޑިވްސް އިކޮނޮމިކް ގޭޓްވޭގައި އިންޓަނޭޝަނަލް ބަންކަރިން ފެސިލިޓީ" އެޅުމަށް އެސްޓީއޯ އިން ވަނީ މިދިޔަ މާޗު މަހު ނެދަލޭންޑްސްގެ ކުންފުންޏެއް ކަމަށްވާ "ވިޓޯލް"އާ އެކު އެއްބަސްވުމުގައި ސޮއިކޮށްފައެވެ. އެ އެއްބަސްވުމުގެ ދަށުން ތައްޔާރީތައް ވަމުންދާއިރު، ހިދުމަތް ފެށުމައްޓަކާ ފުރަތަމަ ގެނެވޭ ދެ ބޯޓަކީ 4000 ޓަނުގެ ތެޔޮ އުފުލޭ ދެބޯޓެވެ. މީގެތެރެއިން ފުރަތަމަ ބޯޓު "މެރިން އެންޖެލް" ރާއްޖެ އައީ މިމަހުގެ 09 ވަނަ ދުވަހުއެވެ. ދެވަނަ ބޯޓު "މެރިން ބެއްލާ" ވަނީ މިހާރު ކުޅުދުއްފުށި ސިޓީގައި ބަނދަރު ކޮށްފައެވެ.
"މެރިން ބެއްލާ" ކުޅުދުއްުށީގައި ބަނދަރު ކޮށްފި
ތެޔޮ ވިއްކުމައްޓަކާ ފެށިގެންދާ ބަންކަރިންގެ މި ހިދުމަތާއެކު ރާއްޖެއަށް ބޮޑު އާމްދަނީއެއްލިބި އިގްތިސާދަށް ބޮޑު ކުރިއެރުމެއް ކިބިގެންދާނެ ކަމަށް ސަރުކާރުން ވަނީ ހާމަ ކޮށްފައެވެ. އަދި އިހަވަންދިއްޕޮޅު ކައިރިން ރާއްޖޭން ބޭރުގެ ބޮޑެތި އާގުބޯޓްތައް ދަތުރު ކުރާ ކަމަށާއި، 300 އަށް ވުރެ ގިނަ އާގު ބޯޓު ކޮންމެ ދުވަހަކުވެސް ދަތުރުކުރާ ކަމަށް ސަރުކާރުން ބުނެއެވެ.
އެހެންކަމުން މިފެށޭ ހިދުމަތާއެކު ދިވެހި ޒުވާނުންނަށް ވަޒީފާގެ ފުރުސަތުތައްވެސް ފަހިވެގެންދާނެ ކަމަށް މި މަސައްކަތް ކުރައްވާ ފަރާތް ކަމަށްވާ އެމްޕީއެލްއިން ހާމަކޮށްފައި ވެއެވެ.