ހއ. މާރަންދޫ ކައުންސިލަށް މެންބަރަކު ހޮވުމަށް ބޭއްވުނު ބައި އިލެކްޝަން ސަރުކާރު ހިންގާ މައި ޕާޓީ ޕީއެންސީން ކާމިޔާބުކޮށްފިއެވެ.
މި އިންތިޚާބު ކާމިޔާބުކުރެއްވި ޕީއެންސީގެ ކެންޑިޑޭޓް އަބްދުލް ހަމީދު އަބްދުއް ސައްތާރަށް 285 ވޯޓު ލިބުނު އިރު، އިދިކޮޅު އެމްޑީޕީގެ ކެންޑިޑޭޓް ޝިހާމް މުހައްމަދަށް ލިބިފައިވަނީ 250 ވޯޓެވެ.
މި އިންތިޚާބުގައި ވޯޓުލުމުގެ ޙައްޤު ލިބިފައިވާ 736 މީހުންގެ ތެރެއިން 560 މީހުން ވަނީ ވޯޓުލާފައެވެ. މި އިންތިޚާބު ބޭއްވުނީ އެރަށު ކައުންސިލްގެ ނައިބު ރައީސްގެ މަޤާމުގައި ހުންނެވި އަޙްމަދު ރަމީޒު، ޖުލައި 13 ވަނަ ދުވަހު ކުއްލި ގޮތަކަށް ނިޔާވުމާ ގުޅިގެންނެވެ.
މި އިންތިޚާބުގެ ނަތީޖާ އިއުލާނުކުރުމާ ގުޅިގެން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ރައްޔިތުންނަށް ޝުކުރު އަދާކުރައްވާފައެވެ. ރައީސް ކުރެއްވި ޕޯސްޓެއްގައި، އިންތިޚާބު ކާމިޔާބުކުރުމަށް މަސައްކަތްކޮށްދެއްވި ފަރާތްތަކަށާއި ވޯޓުގައި ބައިވެރިވެވަޑައިގަތް ހުރިހާ ރައްޔިތުންނަށް ޝުކުރު ދަންނަވާފައިވެއެވެ. އަދި ކާމިޔާބު ހޯއްދެވި އަބްދުލް ހަމީދު އަބްދުއް ސައްތާރަށް މަރުޙަބާ ދަންނަވާފައިވެއެވެ.
ފާހަގަކޮށްލެވޭ ކަމަކީ، ފަހަކަށް އައިސް ރާއްޖޭގެ އެކި ސަރަހައްދުތަކުގައި ބާއްވާ ބައި އިލެކްޝަންތައް ކާމިޔާބުކޮށްފައިވަނީ ޕީއެންސީންކަމެވެ. މި އިންތިޚާބަކީވެސް އެ ސިލްސިލާގެ އިތުރު ކާމިޔާބީއެކެވެ.