އާންމު ރައްޔިތުންގެ ސަލާމަތާއި ރައްކާތެރިކަމަށް އަމާޒުކޮށް، ބިދޭސީން ދިރިއުޅެމުން އަންނަ ތަންތަން ބަލައި ފާސްކުރުމަށް ހިންގަމުންދާ އޮޕަރޭޝަނެއްގައި މިއަދު 3 ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.
އިމިގްރޭޝަނުގެ އެކްސްޕޯސްޓެއްގައި ބުނެފައިވަނީ މިއަދު މާލޭގެ ފަސް ގެއެއް ބަލައިފާސްކޮށްފައިވާ ކަމަށެވެ.
މޯލްޑިވްސް އިމިގްރޭޝަނުން މި މަޢުލޫމާތު ހާމަކުރި ނަމަވެސް، ހައްޔަރުކުރެވުނު ބިދޭސީންގެ ޤައުމީ ނިސްބަތާއި އެމީހުން ހައްޔަރުކުރެވުނު ސަބަބުތަކާ ބެހޭ އިތުރު ތަފްސީލެއް ހާމަކޮށްފައެއް ނުވެއެވެ.
މިއީ ޤާނޫނާ ޚިލާފަށް ރާއްޖޭގައި ދިރިއުޅެމުންދާ ބިދޭސީން ހޯދައި، އެމީހުންނާމެދު ޤާނޫނީ ފިޔަވަޅު އެޅުމަށް ކުރިއަށްގެންދާ އޮޕަރޭޝަނެކެވެ.
މި އޮޕަރޭޝަންގެ ދަށުން، އިމިގްރޭޝަން އޮފިސަރުން ވަނީ މާލޭގެ އެކި ސަރަޙައްދުތަކުގައި ހުރި ފަސް ގެއަކަށް ވަދެ ބަލައި ފާސްކޮށްފައެވެ. މި މަސައްކަތް ކުރިއަށް ގެންދަނީ ކަމާބެހޭ އެހެނިހެން މުއައްސަސާތަކާ ގުޅިގެންކަމަށް އިމިގްރޭޝަނުން ބުނެފައިވެއެވެ.
އިތުރުން، އިމިގްރޭޝަނާ ގުޅުންހުރި މައްސަލަތައް ރިޕޯޓްކުރުމަށް ގާއިމުކޮށްފައިވާ "އިމިގްރޭޝަން ވޮޗް" އަށް މިބާވަތުގެ 600 އަށްވުރެ ގިނަ މައްސަލަ މިހާތަނަށް ރިޕޯޓް ކޮށްފައިވާ ކަމަށް މޯލްޑިވްސް އިމިގްރޭޝަނުން ވަނީ ހާމަކޮށްފައެވެ. އިމިގްރޭޝަނުން ބުނި ގޮތުގައި މިމަހުގެ 10 ވަނަ ދުވަހާއި ހަމައަށް 626 މައްސަލަ އިމިގްރޭޝަން ވޮޗަށް ހުށަހަޅާފައިވެއެވެ. މީގެ ތެރެއިން 496 މައްސަލަ ބަލަމުންދާ ކަމަށްވެސް އިމިގްރޭޝަނުން ވަނީ ބުނެފައެވެ.
މި އޮޕަރޭޝަނަކީ ރާއްޖޭގައި ޤާނޫނާ ޚިލާފަށް ދިރިއުޅޭ ބިދޭސީންގެ މައްސަލަ ޙައްލުކުރުމަށް އިމިގްރޭޝަނުން ކުރަމުންދާ މަސައްކަތުގެ ބައެއްކަން ފާހަގަކުރެވެއެވެ. މިފަދަ އޮޕަރޭޝަންތައް ކުރިއަށް އޮތް ތަނުގައިވެސް ކުރިއަށް ގެންދާނެކަމަށް އިމިގްރޭޝަނުން ބުނެފައިވެއެވެ.