މޯލްޑިވްސް ނެޝަނަލް ޔުނިވަރސިޓީ (އެމްއެންޔޫ) ތިނަދޫ ކެމްޕަސްގެ އެކޮމަޑޭޝަންގައި ހުރި އަންހެން ކުއްޖަކު ގިނަ އަދަދެއްގެ ބޭސްތަކެއް ކެއުމުގެ ސަބަބުން އޯވާޑޯޒްވެގެން ފަރުވާދޭން ފަށައިފިއެވެ.
ގިނަ އަދަދެއްގެ ބޭސްތަކެއް ކައިގެން އޯވާޑޯޒްވީ އުމުރުން 18 އަހަރުގެ އަންހެން ކުއްޖެކެވެ. މި ކުއްޖާއަކީ އެމްއެންޔޫ ތިނަދޫ ކެމްޕަސްގައި ކޯހެއް ހެދުމަށް ގޮސް ހުރި އެހެން ރަށެއްގެ ކުއްޖެކެވެ.
”ހުވަދޫ” އަށް މައުލޫމާތު ދެއްވަމުން ތިނަދޫ އަބްދުއްސަމަދު މެމޯރިއަލް ހޮސްޕިޓަލުގެ މީޑިއާ ކޯޑިނޭޓާ ސާލިމް އަލީ ވިދާޅުވީ ގިނަ އަދަދެއްގެ ޕެރަސެޓަމޯލް ކެއުމުން އޯވާޑޯޒްވި އަންހެން ކުއްޖަކު އެމްބިއުލާންސްގައި ހޮސްޕިޓަލަށް ގެނައީ މިރޭ 20:45 ހާއިރު ކަމަށެވެ.
މިކަމާ ގުޅިގެން ހޮސްޕިޓަލުން ވަރަށް ރަނގަޅަށް އެޓެންޑްވެ، އެ ކުއްޖާއަށް ފަރުވާދީފައިވާ ކަމަށާއި ކުއްޖާގެ ހާލު މިހާރު ސްޓޭބަލް ކަމަށް އޭނާ ވިދާޅުވިއެވެ.
ނަމަވެސް އަދިވެސް އެ ކުއްޖާ އޮތީ އެޑްމިޓްކޮށްފައި ކަމަށް ސާލިމް ވިދާޅުވިއެވެ.
މި ހާދިސާ ހިނގުމުން ފުލުހުން އެ ތަނަށް އެޓެންޑްވެފައިވެއެވެ. ނަމަވެސް މިކަމާ ގުޅޭ ގޮތުން ފުލުހުން އަދި އެއްޗެއް ހާމަކޮށްފައެއް ނުވެއެވެ.