މާލޭގައި މިހާރު ކުރިއަށްދާ ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) ވިމެންސް ވޮލީބޯލް ކުލަބު ޗެމްޕިއަންޝިޕް 2024 ގައި މިއަދު ކުޅުނު މެޗުތަކުގައި ނޭޕާލުގެ ޕޮލިސް ކުލަބުން މޮޅުވުމުގެ ސިލްސިލާ ދަމަހައްޓައި އަނެއްކާވެސް މޮޮޅުވެ ރާއްޖޭގެ ކުލަބުތަކުގެ މައްޗަށް ގަދަކޮށްފިއެވެ.
ޒުވާނުންގެ މަރުކަޒުގެ އެތެރޭ ކޯޓުގައި ކުރިއަށްދާ މި މުބާރާތުގައި ފަސް ގައުމަކުން ހަ ކުލަބެއް ވާދަކުރެއެވެ. މިގޮތުން ރާއްޖޭގެ ވެމްކޯ އާއި ޕޮލިސް ކުލަބުގެ އިތުރުން ނޭޕާލުގެ ޕޮލިސް ކުލަބާއި، ސްރީ ލަންކާގެ އެއަރ ފޯސް އާއި، އުޒްބެކިސްތާންގެ ހުމޯ ވޮލީބޯލް ކުލަބު އަދި ތަޖިކިސްތާންގެ ވޮލީބޯލް ކުލަބު ޑިއަމެޑް ބައިވެރިވެފައިވެއެވެ.
މިއަދު މެންދުރުފަހު ކުޅުނު މެޗުގައި ނޭޕާލުގެ ޕޮލިސް ކުލަބު ވަނީ ތަޖިކިސްތާންގެ ޑިއަމެޑް އަތުން ސީދާ ތިން ސެޓުން މޮޅުވެފައެވެ. މެޗުގެ ސެޓުތައް ނިމުނީ 25-15، 25-12 އަދި 25-14 އިންނެވެ. މި ކާމިޔާބީއާއެކު ނޭޕާލުގެ ޕޮލިސް ކުލަބުން ވަނީ މުބާރާތުގައި މިހާތަނަށް ކުޅުނު ތިން މެޗުންވެސް މޮޅުވެފައެވެ.
ހަވީރު ކުޅުނު މެޗުގައި ރާއްޖޭގެ ވެމްކޯ ވަނީ އުޒްބެކިސްތާންގެ ހުމޯ އަތުން 3-1 ސެޓުން ބަލިވެފައެވެ. ވެމްކޯ އިން ފުރަތަމަ ސެޓު 25-19 އިން ކާމިޔާބުކުރި ނަމަވެސް، ހުމޯ އިން ވަނީ ޖެހިގެން އައި ތިން ސެޓު ކާމިޔާބުކޮށްފައެވެ. މި ސެޓުތައް ހުމޯ އިން ގެންދިޔައީ 25-18، 25-19 އަދި 25-18 އިންނެވެ. މިއީ މި ފަހަރުގެ މުބާރާތުގައި ވެމްކޯ ބަލިވި ފުރަތަމަ މެޗެވެ.
މިރޭ ކުޅުނު މެޗުގައި ރާއްޖޭގެ ޕޮލިސް ކުލަބު ވަނީ ލަންކާގެ އެއަރ ފޯސް އަތުން ސީދާ ތިން ސެޓުން ބަލިވެފައެވެ. މެޗުގެ ސެޓުތައް ނިމުނީ 25-12، 25-15 އަދި 25-19 އިންނެވެ.
މި މުބާރާތުގައި ލީގު ބުރުގައި ކޮންމެ ޓީމެއް ކޮންމެ ޓީމަކާ ބައްދަލުކުރާނެއެވެ. އެއްވަނަ އާއި ދެވަނަ ހޯދާ ޓީމުތައް ފައިނަލަށް ދަތުރުކުރާއިރު، ތިންވަނަ އާއި ހަތަރުވަނައިގެ މެދުގައި ލޯ މެޑެލް މެޗު ކުޅޭނެއެވެ. އަދި ފަސްވަނަ އާއި ހަވަނައިގެ މެދުގައި ރޭންކިން މެޗެއް ކުޅޭނެއެވެ. މުބާރާތް ނިމުމަކަށް އަންނާނީ އަންނަ ހޮނިހިރު ދުވަހުއެވެ.