ޤުރުއާނާއި ބެހޭ ޤައުމީ މަރުކަޒުގެ މުދައްރިސުންގެ ފެންވަރު މަތިކުރުމަށް ސިލްސިލާ ޕްރޮގުރާމެއް އިސްލާމިކް އެފެއާޒް މިނިސްޓްރީ އިން ފަށައިފިއެވެ.
މި ޕްރޮގުރަމަކީ ބޭރުގެ މަޝްހޫރު ޤާރީވެރިން މެދުވެރިކޮށް ހިންގާ ސިލްސިލާ ޕްރޮގުރާމެއް ކަމަށާއި މި ޕްރޮގުރާމުގެ ފުރަތަމަ ދަންފަޅިތައް ނަންގަވައިދެއްވަނީ މެލޭޝިއާގެ މަޝްހޫރު ޤާރީ ޑރ. ވަން ޙިލްމީ ކަމަށް އެ މިނިސްޓްރީ އިން ހާމަކުރެއެވެ. އަދި ޑރ. ވަން ޙިލްމީގެ ކުލާސްތައް މި މަހުގެ 17 އިން 19 އަށް ކުރިއަށް ދާނެ ކަމަށް ވެސް އިސްލާމިކް އެފެއާޒް މިނިސްޓްރީ އިން ބުނެއެވެ.
މީގެ އިތުރުން މި ޕްރޮގުރާމުގެ މަޤުސަދަކީ ޤުރުއާނާއި ބެހޭ ޤައުމީ މަރުކަޒުގެ މުދައްރިސުންގެ ފެންވަރު މިހާރަށްވުރެ ހަރުދަނާކޮށް ބޭރު ތަޖުރިބާކާރުންގެ އަރިހުން ދަސްކުރުމުގެ ފުރުސަތު ހޯދައިދިނުމުގެ އިތުރުން ދަރިވަރުންނަށް އުނގަންނައިދޭނެ އާ ގޮތްތައް ދަސްކުރެވޭނެ އިންތިޒާމް ފަހިކޮށްދިނުން ކަމަށް އެ މިނިސްޓްރީ އިން ހާމަކޮށްފައިވެއެވެ.
އިސްލާމިކް އެފެއާޒް މިނިސްޓްރީ އިން ކީރިތި ގުރުއާނާއި ބެހޭ މަރުކަޒުގެ މުދައްރިސުންގެ ފެންވަރުމަތިކޮށް ތާޒާ ކުރުމުގެ ޕްރޮގްރާމެއް ފަށާފައިވާއިރު ޒުވާން ހަތީބުން އުފެއްދުމަށް ޒުވާން ހަތީބުންގެ ނަމުގައި ވެސް ހަތީބުން ތަމްރީނު ކުރުމަށް ޕްރޮގްރާމްތަކެއް ދަނީ ހިންގަމުންނެވެ. މި ޕްރޮގްރާމް ގެ ފުރަތަމަ އަދި ދެވަނަ ބުރު ވެސް ވަނީ ކާމިޔާބު ކަމާއެކު ނިންމާލާފައެވެ.