އަންނަ ޖެނުއަރީ މަސްތެރޭގައި ކިންގް ސަލްމާން މިސްކިތުގައި ގައުމީ އިސްލާމިކް ލައިބްރަރީއެއް ހުޅުވިގެންދާނެ ކަމަށް އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު މިއަދު ވިދާޅުވެއްޖެއެވެ.
މިނިސްޓަރު މިހެން ވިދާޅުވީ ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި އިސްލާމިކް މިނިސްޓްރީގެ މަސައްކަތްތަކާބެހޭ މައުލޫމާތު ދެއްވަމުންނެވެ.
މިނިސްޓަރު ވިދާޅުވީ ދިވެހިރާއްޖޭގެ ރަށްރަށުގައި އިސްލާމީ ލައިބްރަރީތައް ގާއިމުކުރާ ވާހަކަ ރައީސް ޑރ. މުޙައްމަދު މުޢިއްޒުގެ މެނިފެސްޓޯގައި ބަޔާންކޮށްފައިވާ ކަމަށެވެ.
އަޅުގަނޑުމެން މިކަން އެންމެ ފުރަތަމަ ފެށީ، އީ ލައިބްރަރީއެއް ގާއިމުކުރުން. މިނިސްޓްރީގެ ވެބްސައިޓުގެ ތެރޭގަ މުޅިން އަލަށް އިސްލާމީ ޚާއްސަ ލައިބްރަރީއެއް ގާއިމުކުރުން. އަދި ހިލޭ ސާބަހަށް ފޮތްތައް ޑައުންލޯޑް ކުރެވޭ ގޮތް ހެދިފަ ހުންނާނެ.
އީ ލައިބްރަރީގައި މިހާރު ޖުމްލަ 81 ފޮތް ލިބެން ހުންނާނެ ކަމަށާއި މި ދައުރުގެ ތެރޭގައި މުޅިން އަލަށް 7 ފޮތް ޝާއިއުކުރެވި ލައިބްރަރީގައި ހިމަނާފައިވާނެ މިނިސްޓަރު ވިދާޅުވިއެވެ.
އެހެންކަމުން މިހާރު އިސްލާމީ ދާއިރާއިން ތައުލީމު ހާސިލުކުރާ ދަރިވަރުންނަށް މި ދާއިރާގެ ފޮތްތައް ހޯދަން މާ ބުރަ މަސައްކަތްތަކެއް ކުރާކަށް ނުޖެހޭނެ ކަމަށް މިނިސްޓަރު ވިދާޅުވިއެވެ.
އިސްލާމީ ލައިބްރަރީތައް ގާއިމުކުރުމަކީ ރައީސްގެ ވަރަށް މުހިންމު އަމާޒަަކަށްވާއިރު، ޖެނުއަރީ މަސް ހިސާބުގައި ސަލްމާން މިސްކިތުގައި ގައުމީ އިސްލާމީ ލައިބްރަރީއެއް ހުޅުވިގެންދާނެ ކަމަށް ވެސް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ އިސްލާމީ މަރުކަޒުގައި ލައިބްރަރީއެއް ހުރި ނަމަވެސް މިދިޔަ އަހަރުތަކުގައި ފޮތްތައް ހުރީ ގުދަނަށް ލައިފައި
ކަމަށާއި ނަމަވެސް މި ސަރުކާރުން އެކަން ބަދަލުކުރާނެ ކަމަށެވެ.